ولدت والحمد لله

مساء الخير يا حلوات..

أنا والحمد لله ولدت يوم 29-10-2012 آخر أيام عيد الأضحى، وجبت بنوتة متل القمر سميتها "ليان" وطبعا هذه المولدة الثالثة، عندي من قبل بنت وولد الله يخيلهم ويحفظهم.

والحمد لله ربنا سهلها وما طولت ولادتي.. واللي صار إنه كان باقيلي 5 أيام وبخلص التاسغ وأنا طبعاً طلعت روحي وكنت كل يوم من أول التاسع أقول خلص اليوم أكيد راح أولد، لإني بصراحة في فترة حملي تعبت كتير وصارت مناسبات وشغلات كتير وهلكت... واتوقعت أولد في أول التاسع بس ربنا ما أراد.
ضع،
المهم قبل يوم من ولادتي كنت أنا وصديقتي في مشوار وقلتلها بدي أمر على السوبرماركت أشتري عيدان قرفة علشان أغليها وأشرب، بلكي ربنا سهلها وولدت بسرعة.

مرينا واشتريت وروحت على البيت غليت كاسة وشربتها ونمت بس ما حسيت بشي...

تاني يوم صحيت عادي وبديت أشتغل وأنظف في البيت عادي وعلى الساعة 11 تقريبا قلت خليني شأرب كمان قرفة، رحت جبت 3 عيدان وغليتهم كويس في ماء وشربتهم.

وبعد ساعتين ثلاثة بديت أحس بشد في آخر بطني من فترة لفترة.. وعلى الساعة 3 أجا أخوي عندي هو وأولاده وضل شوي وأنا كنت قاعدة معه بس الوجع صار يشد أكتر بس كان محمول.

وبعد ما روح صار الوجع يزيد أكتر، قلت خليني أدخل أخد حمام دافي وأورح على المستشفى أشوف شو الوضع.

أخدت حمام واتصلت على زوجي وأجا وصلني على المسشفى، طبعا ما كنت راح أولد في المستشفى هذا بس بما إنه قريب من بيتي قلت بروح أفحص عندهم وبشوف.

المهم اتصلت على أمي وجت أعندي على المستشفى ودخلنا سوى على الفحص، وعملولي فخص داخلي طلع عندي توسع 3 سم وقالولي ولادة.

اتصلت على زوجي وقلته ولادة خلي بالك على الأولاد كانت الساعة وقتها 6 وأخدتني أمي على المستشفى اللي كنت راح أولد فيها وكانت الطريق أزمة بشكل، المهم وصلنا المستشفى على الساعة 7، دخلوني وفحصوني قالوا 4 سم، وحطوني على التخيطيط وأنا الطلق شغال.. المهم بعد ساعة ونص تقريباً قالتلي الممرضة راح أدخلك تاخدي حمام دافي علشان يساعدك ويزيد التوسع بس قبل خليني أفحصك وأشوف، فحصتني وقالت ما شاء الله تقريبا 7 سم خلص بلاش حمام على طول على غرفة الولادة...

دخلوني وحطوني على سرير الولادة وأنا طبعاً بتلوى وجع، وأجت الدكتورة ونزلت مية الراس وبعدها زاد الطلق، اترجيتهم يعوطني أي شي يساعد، قامت الممرضة أعطتني إبرة في عضلة رجلي خففت الوجع شوي بس ما راح طبعاً، بعدها رجعت فحصتني الدكتورة قالت 9سم يالله ادفعي... والوجع يزيد وأنا أتلوى وأدفع غضب... المهم بدا الراس يبان وهي تقول ادفعي وأنا خلص ما عاد عندي طاقة أدفع ومش عم يطلع الراس.. ونبض البيبي بدا ينزل، قامت الدكتورة جابت الشفاطة وشفطت الراس وطلعت بنوتي الحلوة على الدنيا على الساعة 9:25 وحطوها على صدري، وحضنتها وكنت فرحانة في كتير الحمد لله ونسيت كل الوجع.

وبعدها انتظرت الدكتورة نزول الخلاصة بس ما نزلت، قالت راح أستنى نص ساعة كمان، وخلتني نص ساعة بس برضوا ما نزلت، أجت وبدت تضغط على بطني وأنا أصرخ وأترجاها ما تلمسني لإنه الوجع فطيع، وقالت لازم مشان ما نضطر لعملية تنظيفات بس ما قدرت، بالآخر أعطتني منوم ونمت وهي خلصت شغلها وطلعت الخلاصة الحمد لله وبعدها صحيت.

وهذه هي قصتي... والحمد لله اللي ربنا سهلها على خير وإن شاء الله يا رب عقبال كل الحوامل يولدوا بالسلامة