السلام عليكم ورحمة الله وبركاته ..
اخواتي في الله .. بفضل الله الحمد لله ولدت بتاريخ 29 مارس .. وحبيت افيدكم ببعض الملاحظات اللي ممكن تسهل من الولادة باذن الله ..
أول شي احسنوا الظن بالله بانها ستكون ولادة سهلة وميسرة .. ولا تشغلي بالك بالتفكير بالولادة .. انا مع اول تحليل للحمل وانا احمل هم الولادة .. حاولت اتناساها طوال الحمل .. ولكن بالتاسع اصبحت الكابوس اليومي بالنسبة لي .. وسبحان الله ما بنتصح الالام الولادة كم ساعة .. ليش تمدديها هم وقلق لأشهر .. "كلام الوالدة الله يبارك فيها"
ثانيا .. المشي ثم المشي ثم المشي .. ومش شرط انه نتيجة المشي تقرب الولادة قبل موعدها اسبوعين او اكثر .. وكمان مش شرط يفتح الرحم 2 او 3 سم قبل الولادة بفترة .. انا سبحان الله قبل الولادة بيومين ووكان الرحم مفتوح 1 سم بس .. وكنت مكملة شهري .. وصابني اكتئاب .. قلت مع كل هالمشي و 1 سم بس .. بس سبحان الله بتشوفي اثار المشي بالولادة نفسها وهي المهم .. وما تسمعوا ابدا لاي وحدة تقول مشي او بدون مشي كله واحد .. انا هاي ولادتي الرابعة وبقولكم اياها عن تجربه .. في ولادتي التانية للأسف انتصحت من اخت قالت هالجملة ليش اهلك نفسي وركبي ورجولي .. وصدقت كلامها وريحت نفسي طول التاسع .. وللأسف كانت ولادة متعسرة .. وطلق سريع لكن الطلقات باردة .. استمرت تقريبا 14 ساعة ... أمشوا وخدوا بالاسباب وتوكلوا على الله ..
أهم شي بالولادة نفسها .. حتى مع الطلق وان كنتي بتظنيه طلق كاذب .. مع كل الم خدي نفس عميق .. نفس عميق لغاية ما تحسي الهوا ملئ بطنك .. حتى لو كان الالم خفيف .. والاهم وقت الولادة .. ولما تزيد الطلقات حتى لو بتحسي الالم ما بنطاق ورغبتك اللاشعورية بالصراخ .. حاولي تكتمي صراخك وتتنفسي بشكل عميق .. الصراحة عمليا كانت صعبه كتير كانك بتتنفسي وانتي غرقانه .. ولكن سبحان الله .. أول مرة أشعر بأثرها بتخفيف ألم الطلق .. وخصوصا الطلقات الأخيرة ..
الشي اللي ما كنت افهمه قبل خروج البيبي .. بيكون الالم فظيع وبكل ولادة اسمع الممرضات بيصرخوا علي وبيقولولي ما تعصري ما تدفعي ما تصرخي حتخنقي البيبي .. وكنت ارتجف من الخوف بس ما احس انه الموضوع بايدي .. مع الولادة الرابعة عرفت وفهمت وان شاء الله ما ياخد الموضوع معك 3 ولادات لتفهمي .. مع الطلقات الاخيرة .. وقبل الولادة مباشرة حاولي تستجمعي كل قوتك والمهم ما تقومي بعملية الدفع اللي مرات بتكون لا شعورية الا لما تقولك الممرضة او الدكتورة او مع بداية الطلقة مباشرة .. وما تنسي انك لما تحسي برغبتك بالدفع بتشعري بنفس الشعور برغبتك لدخول الحمام للتبرز أكرمكم الله .. لما تشكي بالهشعور خبري الممرضه على طول وما تستني.. انا خبرتها وقلتلها الراس الراس والممرضه والطبيبة شكوا بكلامي وما حسيتهم صدقوني .. ولما فحصتني الممرضه صارت تصرخ "baby nurse" بتنادي ممرضة البيبي ما صدقت وقتها .. قد شو فرج ربنا قريب ..
والله الم الولادة كرب والم في هاي اللحظات كل اللي بتمناه اني اكون نايمة بسريري زي كل ليلة .. الصحة نعمة اشكري الله دايما عليها .. وما تنسي مين ما وقف جمبك بالولادة الموضوع كله بايد ربنا .. قد كنت استعين باذكار الولادة سابقا .. لكن بولادتي الاخيرة .. استعنت باسم الله الرحمن واسم الله الكريم بس .. كانت الممرضة شفقانه علي وكل شوي تقول لي ابرة الظهر مدام .. احسن .. وحتى الطبيبات يقولولي ابرة العضل المسكنة على الاقل .. وانا اقول يا رب يا رحمن ارحمني .. يا كريم اكرمني .. مش علشان انا بستاهل .. لا لانك كريم .. اول مرة يعلو صوتي بالدعاء .. لربنا وكنت اتمنى يشوفوا كرم ربي علي .. وانه ربنا ارحم بي منهم ومن ابرهم وادويتهم .. وربكم كريم سبحان الله وسريع الاجابة ..
ما تنسوا شكر النعمة بعد الولادة .. واذكر نفسي واياكم .. لاني اول يوم بالولادة ما كان على لساني الا الحمد لله .. لكن تاني يوم بلشت مع البيبي والرضاعة ووجع الظهر .. اللهم اجلعنا من الشاكرين الذاكرين ..
لو كانت ولادتكم سهلة او صعبة .. فكله بقدر الله .. وكله خير والحمد لله .. أخدت وقت طويل لاكتبلكم .. ونفسي اكتب اكتر ولكن هاي اهم الاشياء اللي قدرت اطلع بيها بالهوقت .. بتمنى يفيدكم الموضوع .. ادعولي الله يخفف علي بنفاسي ويهديني ويهدي اولادي ... والله يسهل علينا وعليكم ..
أم عباده @am_aabadh_2
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
والله يسهل نفاسك ويهديكى وأولادك ويهدى جميع المسلمين