هلا حبيباتي
اكلمكم الان وانا لي 19 يوم ولله الحمد وبجنبي ولدي حبيبي :04: الله يحفظة لي هو واخوه وابوهم...
المهم
خلصت التاسع واخذت من العاشر اسبوع وقال لي الدكتور لازم ولادة بطلق صناعي جاني خوف مو طبيعي مع اني ماجربت الطلق الصناعي ولا الولادة في ولدي الاول ولله الحمد (اكيد تقولون هذي مجنونه كيف ماجربت الولادة وهي عندها ولد قبل) بقولكم كيف لاني اخذت ابرة الظهر حبيبتي....
قرر الدكتور لي تنويم 6 رمضان صباحا ... ماكنت ناويه اروح بس زوجي وراي وامي تقنعني قلت اوكي بصوم اليوم هذا واروح بعد صلاة التراويح
وبالفعل رحت الساعة 8 مساءا والا هم ينتظرني وحاجزين لي السرير واقعد على اعصابي وسين جيم وفتح ملف وخرابيط
والمني منظر المريضات هناك رايحات جايات في الممر
ووحده الله يذكره بالخير بس تضحك وتسولف وتمر على الغرف .... مضيعه وقتها
المهم جتني الدكتوره فحصتني الساعة 3 الفجر قالت مفتوح الرحم معك 2 سانتي مانتي حاسه بشيء قلت اااابدا...
قالت انتظري والساعة 9 صباحا نعطيك طلق صناعي
جتني رجفه ودموع وخوف وكانهم مقررين لي الموت
وامسك القران واقرا وادعي ومعي سبحه واسبح واستغفر
ومانمت غير غطات خفيفه من التعب...
جت الساعة 9 صباحا وانا لا طلق ولا ولادة ويجيني دكتور سعودي جدا ررررااائئئع وممتاز الله يسعده
قال بشوف الرحم كم مفتوح معك قلت اوكي بس اوعدني تعطيني ابرة الظهر قال ابشري... فرحت كثير
فحص الرحم مفتوح 3 ونص قال بسوي لك تحريض رحم واعطيك فرصة سبحان الله يابنات جاني طلق خفيف جدا وماجت الساعة 12 الضهر الا الطلق يزيد واصيح على الممرضة تعالي معي طلق والا تقولي لسا مدام مافيه ولادة اقولها معي ولادة واصيح ولا حياة لمن تنادي وجاني استفراغ الله يكرمكم بغيت اموت وترحمني وحده هندية قالت ماما نامي انا ابشوف رحم شافت الرحم والا تصيح ولااااااااادة مفتوح 8 ولله الحمد
وبسرعة طيران على غرفة الولادة
الساعة 1 وربع ولدت ولدي حبيبي....يوم الجمعة 7 رمضان
الحمدلله تيسرت ولادتي بس قهر ماخذت ابرة الظهر وربي انها نعمة من نعم رب العباد علينا...
بنات للامانة انا ولدت في مستشفى العسكري بالرياض وهذا ولدي الثاني فيه وكل قريباتي فيه
المستشفى رائع وتعاملهم رائع والاطباء والمراجعات رائع وماني عارفة ليش مايمدحون الحكومي
ولله الحمد ولدت بيسر وسهولة بفضل من الله وبقولكم على سر سهل على الولادة وخفف الامها بعد الله وهو طول الوقت اقراء الفاتحة ولساني يصرخ يارب اجعلها بردا وسلاما علي والله يابنات احس الالم يخف كل ماقلتها
وكل عام وانتم بخير
هذا الموضوع مغلق.
الصفحة الأخيرة
و حمدلله على سلامتك