ولدعمتك ليش خطب اختك مع انك انتي الكبيره(قصتي)

قصتي بدأت لما كنت جالسه انا وامي وقالت ولد عمتك يبي يخطب وحده منكم يعني يا انا يا اختي انا كنت لسه في الجامعه واختي اخر سنه لها بالثانوي دردشنا شوي وقفلنا ع الموضوع بعد كم يوم وانا بالمطبخ اسوي لي اندومي نادتني امي رحت لها ومعاي صحن الاندومي قالت لي اختك خطبها ولد عمتك وش رايك بحكم انك انتي اعقل منها وافهم اناااااااااااااا نشبت الاندومي بحلقي:07:من قو الصدمه اختي تتزوج قبلي وشلون وكيف طيب وانا ؟؟انا وش اللي ناقصني ليه ما اختارني انا ودارت الافكار براسي في هالحظه وسويت نفسي عااااادي قلت والله كيفها اذا هي مرتاحه له ليش لا وانتي استخيري والله يكتب اللي فيه الخير
من هنا بدت معاناتي وتدرون من ورى كل هالخطبه اخوي وزوجته يعني الطعنه جت من اقرب الناس بدت الافكار براسي وش راح يقولون الناس؟وش بتكون نظرتهم لي؟ اكيد بقولون فيها عيوب الدنيا ولا كان خطبها هي مو اختها تعبت نفسيا وماكنت اشكي لاحد ما كنت اشكي غير للي خلقني............
تمت موافقة اختي في ايام فقط بعد الضغط عليها من اخوي وزوجته كانت مغصوبه بس اضطرت توافق بشرط الزواج بعد ماتخلص الثانوي يعني قرابة السنه ولانه من اقاربنا وعاداتنا ماتسمح لها انها ترفض
انا كنت بحزن وضيقه خوفي مستقبلي يضيع خوفي من نظرات الناس ومن بيتقدم لي بعد كذا بالرغم من اني انسانه هادئه وخلوقه وجميله ومحافظه ع ديني والله كنت انام عند امي من التعب والجوع ما كنت اذوق الاكل ودموعي ع خدي من غير ما احس:icon33:
بدت اسألت صديقاتي ليش ماخطبك انتي؟؟؟؟؟؟وليش اختك تتزوج قبلك مع انك اكبر منها وليش وليش؟؟؟؟؟؟؟وماكان عندي جواب
التجأت الى الله في هذا الوقت ومحد غيره عالم بحالي صرت اقوم الليل وادعي و كنت ابكي من كل قلبي وادعي ربي يتقبل دعائي........
مرت حوالي خمس شهور وانا في ضيقتي وهمي واخيرآتقدم لي شاب يعني ربي استجاب لي ياالله يامن تجيب المضطر اذا دعاك كانت زوجة اخوي مبين من نظراتها الغيره لان اختها اكبر مني وما تزوجت تخيلوا اخوي كان يقول لامي اخاف الخطاب يرجعون بكلامهم لانها نحيفه:06: قهرني يابنات والله انامونحيفه لها الدرجه كان وزني46 يعني موهيكل اراد ربي وتمت الموافقه والعجيب اللي اذهلني خطيبي يموووووووووت بالنحيفات وكان يقولي ياويلك تسمنين تخيلوا...يااااااااااي رفع من معنوياتي:D
بعد ثلاث شهور تزوجت وقبل اختي تحققت كل احلامي كان زوجي اغلى انسان عرفته بها الدنيا رجع ثقتي بنفسي وغير حياتي للاحسن
نسيت اقولكم ان زوجي سألني هو ولد عمتك ليه خطب اختك مع انك اكبر منها واااااااااااااااااااااي::11retcher بس معليش كل شي من فمه عسل
وانتهت معاناتي بسلام وسعاده وكل هذا بفضل ربي اللهم لك الحمد والشكر وما انسى امي هي سبب اللي انا فيه الحين لما انخطبت قالت لي والله يابنيتي هذا من دعواتي كنت ادعيلك كل ليله ان ربي يزوجك قبل اختك الله لايحرمنا والدينا ويحرمهم عن النار آآآآآآآآآآآآآآآآمين
العبره من ذكر قصتي ؛هي انك اذا كنتي بمصيبه وهم لاتلتجأين الا لله وحده هو اعلم بحال عباده وهو فراج الهموم والكرب سبحانه وعليكم بالدعاءثم الدعاء ثم الدعاء والاستغفار
قال تعالى (واذا سألك عبادي عني فأني قريب اجيب دعوة الداعي اذا دعان)
والله الله بوالدينكم هم جنتكم وناركم
اسفه ع الاطاله واستنى ردودكم