ولدي الله يهديه 😣

مساء الخير...

انا عندي ولد عمره ١٩ سنة الله بلاني به فيه مِنْ العناد ايش اقلكم ،،، يختلف ١٨٠ درجة عن باقي خواته وإخوانه ... يعني ما يسمع الكلام الا ليمن يغضب عليه ابوه او اخوانه او ليمن دموعي تطيح قدامه مهمشني في البيت لدرجة انه سوا عملية في ظهره و ما دريت عنها الا يوم رجع في البيت بعد ما مكث في المستشفى ٤ ايام ... وبعدين اكتشفت انه مخبر خواته الي اصغر منه وكان يزورونه كل يوم... ويوم قلت له ليه ما قلتلي انا و أبوك قال اذا قلتلك انتي راح تسجنني وتبكين وتقعدين عندي ٢٤ ساعة في المستشفى وراح تزعجيني لا تتحرك وأكل هذا ولا تأكل هذا .... انا انقهرت حيل يعني هذا جزاتي الي انا حريص عليك و ع صحتك

المهم انا لي الحين لي ٥ أسابيع ما أكلمه زعلانه منه حتى ما ودعته يوم رجع لجامعته في الشرقية وهو والله كسر خاطري يوميا يرسل وات ساب بس ما أرد عليه

انا دورت في النت طرق للتعامل في ناس تقول كوني صديقة معه ( حاولت كثييير بس ما قدرت هو اصلا مو صادق في البيت الا وحده من خواته هي الي يفضفض لها كثير و هي بعدين تقولي كان عنده مشكله )

وفي ناس قالت هذا مراهق وصغير وبكرا يكبر ويعقل ( بس انا خايفة انه يكبر ويظل ع حالته ويضيع الولد من يدي )

فيا خواتي هل عندكم ولد مثل الي عندي وكيف تتعاملون معه وهل فعلا اذا كبر راح يعقل .