كمان حابه انبهك على شغله ممكن يكون احد مضايقه بالمدرسه اولاقدر الله متحرش فيه انتبهي على ولدك

والله الضرب عمره مايجيب نتيجه
والولد عمره ١٣ محتاج احد يحتويه ويتحمله حتى لو كان شقي مو يضربه

حاولوا تغيرون اسلوبكم معه،عاملوه على انه كبير، وقبل كل شيء تعاملوا معه على انكم اصدقائه
استبدلوا اسلوب الشده بأسلوب التفاهم والاقتراب منه

الضرب والكلام القاسي لا ثم لا ثم لا
وانصحك اعرضي مشكلته على موقع المستشار بيقولون لك نصايح من ذهب،بس المهم اشرحي مشكلته بالتفصيل ومن جميع النواحي
اكتبي بقوقل موقع المستشار وبيطلع لك


اسفه اذا فيه اخطأ املائيه لاني اكتب من ايباد

يااااااعمري عليه حبيبي رحمته من الخوف اللي تقولين بالليل نصيحه لاتضربينه لاتضربينه ازعلي عليه ولاتضربينه بكره يكبر ويعقل أخوي مثل ولدك يوم كان بنفس عمره خواااااااااااف ولا ينام إلا بنور ودائم مع أمي نرحمه وألقينا حل نقوله انت رجال لاتخاف ويقول انا ما أخاف وينكر فجأة يوم صار عمره ١٥قسم بالله تغير من نفسه تغيييييير راح الخوف ويجلس لحاله وينام بغرفه مظلمه الحمد لله
اللي بقوله لك لا تهتمين شفتي الخوف ذا بيرووووووح بإذن الله
وإذا كان في غرفه لحاله خطيه مع خواته مبدئيا لين يكبر شوي حرام مافيها شئ مع خواته
واللقافه مالها حل والله إلا إذا كبر صدقيني أخوي الثاني كان ملفوف لقاءه مو طبيعيه موووو طبيعيه تدرين متى عقل بس مجرد انه كبر وبلغ والحين رجال الله يحفظه وإذا ذكرناه انه كان ملقوف يضحك على نفسه ولا يصدق
لاتشيلين هم ولدك لانه باالنهايه بيكبر بإذن الله وبيروح يدرس ويتوظف وبتتذكرين أيامه ذي يوم كان صغيرون ومشغلك
بس اهم حاجه لاتضربينه وحاولي انه يكون صديق لك تسولفين معه وتتفرجون مع بعض وتتقهوين معه كل ماجبتي قهوه حطي له فنجال وناديه وسولفي وخليه يسولف ولايكتم وإذا رحتي مشوار خوذيه وخوذي رأيه وسوي نفسك مزنوقه وأنك تشاورينه بيحس نفسه بطل وكذا يعني والله يخليه لك

الدلع في البدايه ويوم كبر صار ينضرب هذا السبب واشوف ان عمره ١٣ مو صغير السنه الجايه اول متوسط
يعنى دلعتوه وبعدها صرتو تضربونه

نفس اخووي جا بعد 4بنات وابوي يدلعه ويضربه
والحين عمره18الله يهديه لسانه طويل ع امي وابوي 
وابوي تربيته جايه غللط يسولف ويضحك معه شوي قلب يخاصم وينافخ عليه وكمان يعطيه كل شي اخذ سيارة ابوي ومايخلي مكان ومع اخوياه ولو ماينفذ له ابوي طلبه قلب الدنيا رأس على عقب ويزعل ويهرب والله انه الجوالات والفلوس في يده
ولايطيع اهلي
الله يصلحه ويهديه يارب