ولدي وأهل زوجي

السلام عليكم ورحمة الله وبركاته،،،
بنات تكفون أبغى مساعدتكم أنا عندي طفل عمره سنه ونص وساكنه بالدور الثاني عند أهل زوجي طبعا أم زوجي خالتي( أخت أمي)...مشكلتي مع أهل زوجي،،، طبعا من يوم كان ولدي صغير( بالشهور يعني )وهم لازم أنزله لهم كل يوم وكنت عادي انزله ماعندي اي مشكله اقول حفيدهم وودهم بشوفته وانزله *مع إنه عندهم أحفاد غيره* المهم الحين بسم الله عليه كبر وصار يفهم ويسولف وصارت كل يوم خالتي وبنتها يدقون علي الصبح أكون نايمه إذا رديت قالوا انتم نايمين والله إني قلت بس أبغى ولدك إذا صاحي نزليه اقوله لا والله نايم بس ابشري تامرين امر اصحيه وافطره وانزله لك وإذا نزلته تستانس عليه ومايردون له طلب لدرجة إنه يسحب ايديهم طلعوني بالسياره ويطلعونه ولو حلفت عليهم قالوا ماعليك حنا اهله وهالشي يوسع صدورنا والمغرب نفس السالفه لو مانزلته دقوا علي نزليه...طبعا تعرفون طبيعة أي طفل وخصوصا ولد يبغى يطلع ويركب السياره المهم كنت ارفض إنهم يطلعونه ويقولون ماعليك منّا حنا هذا اللي نبغى واقولهم اقدر اقنعه ويسكت يقولون لا ماتردينه عندنا ببيتك بسلامتك لكن عندنا لا ..وخلاص من بعدها ولدي تعلق بالسيارات والطلعات وصار يسحب عمامه كلهم طلعوني ويطيعونه وانا ماودي بهالشي وانا بصراحه عندي بالبيت مايطلع مع أبوه إلا مره باليوم ياخذه للبقاله ولا ملاهي بس وباقي طلعات ابوه اقول بابا راح الله اكبر ولا بابا راح رجال ويفهم ويجلس عندي عادي ... لكن عندهم خلاص انا لو تكلمت خالتي وعمي( ابو زوجي) وعمامه يسكتوني فاأخذ بهالطريقه وصرت عندهم مالي أي هيبه عليه...  لدرجة إنه من شدة تعلقه بالطلعات عمامه إذا بغوا يطلعون قالوا دخلوه باأي غرفه لايشوفني وانا طالع... طبعا عمامه الحين الاحظهم بدوا يتضايقون منه لو مسك يديهم قالوا يالييييييل وش تبي😠  ولا يطلعونه بالسياره بالشارع ويدخلون ويتركونه بالسياره لحاله ...انا صراحه نرفزوني يوم كنت اقولهم  لاتاخذونه واهم رافضين هالحين صاروا يطفشوون منه...  وخالتي نفس السالفه إذا اجتمعوا عياله ولا أحيانا تصير معصبه وجاء ولدي يبغاهم يطلعونه جلست تهاوش واعوذ بالله يهالولد تعلق بالسيارات مع إنها كانت هي تلبس عباتها وتطلعه بالسياره عشان يستانس لا بعد واحيانا كانت تفتح باب الشارع وتخليه يتفرج.... وأحيانا يطلب جوالي يبي يلعب فيه أو يشغل أنشوده وكنت اقوله حبيبي بالبيت موب هنا ويسكت وتقولي خالتي والله أن تعطينه ماتردين جنيني طبعا هو يستانس إنها تقولي كذا ويرجع يطلبه لأنه فهم إني ابعطيه عشان خالتي... وقبل شوي كانوا عيالها كلهم موجودين وهو يجي عند عمه يقول طلعني قالت اعوذ بالله والله إنك بس بهالسيارات خلاص عاد وهي تاخذه وتحطه بحضني ويسكت ويحاول ياخذ مني الجوال قالت عطيه إياه خليه بس ينسى الطلعه واعطيه إياه وولدي يشغل انشوده ويروح يتمشى قال ولدها الكبير وش هالازعاج وهي تاخذ الجوال وتطفيه قالت اي والله انه إزعاج  وأنا أخذ ولدي واطلع لبيتي ،،،مع إن بنت ولدها الثاني كانت موجوده وكانت تبكي ماتبغى تشوف عمها الكبير وعيت تسكت ولا تكلمت خالتي ولا كلمه...ماعليش طيب  ولدي نتيجة دلعكم،،لا والمشكله لو اقول لها كذا قالت موب حنا اذكر مرة يوم قالت انه متعلق بالسيارات قال عمي حنا اللي عودناه ناخذه ونطيعه لو طعنا امه كان ماسوا كذا،،؟قالت هي لاوالله اهله اللي عودوه ماهو حنا حنا ماسوينا شي...
اعذروني طولت عليكم وكلامي مو مرتب بس وش اسوي عيشوني بهمّ..آلحين تكفوووووون أبغى منكن فززززعه وش اسوي هل أطنشهم مااوديه لهم إلا مرتين بالأسبوع ولا وش أسوي قسم بالله إني جالسه أصيح يدلعون وآخر شي يحطونها بظهري إني أنا ماربيت ولدي؟؟