السلام عليكم ورحمة الله وبركاته
أتمنى ان تكونوا بأتم الصحه والعافيه وعسى الله يحفظ لكم اولادكم ومن تحبون بكل خير
اخواتي .. جد نفسيتي صايره عدم بسبب ولدي والتغير اللي حصل له
واتمنى اني القى حل او حتى دعوه منكم
الموضوع ومافيه ان ولدي حاليا عمره سنه و7 شهور
ماشاء الله الى قبل شهر تقريبا صحته كانت تمام وجسمه حلوو
يووم كان عمره 9 شهور جبت شغاله بحكم اني موظفه وحامل بالثاني .. ونفسية ولدي تأزمت منها
كانت تعتبره واجب وكانت تأكله بالقووه والسالفه عندها حشي < تحشي فمه حشي بالأكل
ولما قربت اولد سفرتها لإن اللي هاذي طريقتها مع واحد كيف مع طفلين
المهم .. ولدي بعدما سفرتها صارت عنده زي ردة الفعل وصار يرفض الاكل كله
ولما استوعب ان الاكل مو بالقووه واستوعب انها راحت خلاص رجع لوضعه والحمد لله مع كره لبعض الاصناف زي البيض والزبادي
انا ولدت بعدما سفرتها بشهر .. واول الوقت كان وضعه حلوو بالأكل وجسمه صار احلى واحلى من قبل
لكن لما صار لي 15 يووم والده صابه اسهال فظييع وحساسية بمكان الحفاظ ولأول مرره
جلس تقريبا 5 اياام على هالحال .. وبدأ وزنه ينقص بشكل ملحوووظ
ولما عرضته على استشاري اطفال قال ان معه نقص بالكالسيوم وغير له الحليب وعطاني الكالسيوم على اساس جرعتين باليووم
طبعا هو مع ظل هالتغيرات .. نفسيا اندمر .. ابد ماهو ولدي اللي اعرفه .. صار الدواء يرفضه ويصررخ ويتجنش لما اجي ابعطيه ايااه
بدأ يرفض الاكل بجمييع انواعه .. وحتى العصير اللي كان يشربه .. لما حطيت فيه الدواء واكتشف طعمه بطّل يشربه
ولما طعمته تطعيمة السنه ونص وسخن علي يومين كنت اشيل واحط فيه زاد تعلقه فيني وصار يبغاني بس اشيله
صار مزعج بشكل يجيب الجنان .. انا تعبت نفسيا ماني عارفه وشلوون اتصرف مع تعلقه وزيادة الخير كنت نفاس فلكم تتخيلون كيف الوضع بالنسبه لي
قلت اكييد الولد افتقد بيته وافتقد ابووه < مع انه المدلل عند اهلي كل طلباته اوامر والكل يلعب معه ويدلعه بزياده
المهم لما رجعت لبيتي وصرت انا اللي اهتم فيه وبأخته انتكس بقووه
صار مايستوعب بعدي عنه لو ثوواني .. لو اطلع من الغرفه واخليه مع ابووه يجلس يصيح وكأني تاركته لحاله !!
الاكل .. مع اني تفرغت له وصرت اعرض له اكثر من صنف ونشجعه انا وابووه كمان مايأكل
بالعكس .. وضح موضوع الغيره عنده من المولوده الجديده
صار كلما شافني اسوي لها رضاعه جاب لي رضاعته وماما انا
قبل يومين شافووه صاحباتي وانفجعوووا من اللي صاير فيه .. مسمر ونحفاان وصاير راس يتحرك بس !!
ملابسه بالعيد يووم كان عمره 10 شهوور الحين البسها ايااه وتطييح من عليه
مرره جسمه صاير يفجع .. والله اني اكره ارووشه او حتى اغير له حفاظته من كثر مااشوف عظاام
يمكن تحسوون اني ابالغ بس والله ان الحال افظع من كذا .. مدرري وش السبب
متعلق فيني وعناادي ويصحى بنص الليل مفزووع ومايرجع ينام الا وانا جنبه مايحط بفمه شيء غير الحليب
حتى الاطباء كلما رحت لهم تفننوا بسالفة فتح الشهية والمكملات الغذائيه والفيتامينات وهو ماايحط شيء بفمه
وسالفه اني يوميا حررب معه بسالفة الدواء كرهتها وتعبتني .. يقطع قلبي يووم يبكي وينكتم من البكاء
افكر ارجع على حليبه الاول يمكن يرجع يأكل .. واحيانا اقوول الحليب ماله علاقه
وحلوو انه يشربه بكثره يمكن يعوض الكالسيووم .. لكن مو حلوو انه يفقد وزنه وجسمه بهالشكل
العالم تقوولي من الغيره .. وانا والله اني مهمله بنتي عشاانه .. وصرت بس ارضعها صناعي عشاان مااشيلها وتجلس بحضني وقت مطوول وهو يجلس يبكي
وانا اقوول اللي بولدي اغلب الظن انها عين ... لانه جد كان جذااب والكل يطيير فيه من اول مايشووفه
حاليا ارقيه بنفسي .. وماني ملاحظه عليه غير انه ينام وقت القراءة وماابغى اوسوس كثيير
مع العلم اني مااهمل سالفة الرقيه دائما .. لكن وانا نفاس انشغلت عنه من هالناحية غصبا عني
محتاجة ارائكم .. ودعوواتكم
يمكن اكوون غافله عن سبب .. عشان كذا كتبت لكم الوضع بالتفصيل
بإنتظاركمـ
:44:
skooon99 @skooon99
عضوة جديدة
يلزم عليك تسجيل الدخول أولًا لكتابة تعليق.
الحان الطفوله
•
اقري عليه والله يشفيه ويخليه لك
حالت ولدك نفس ولدي بضبط انتي لاتدلعينه زياده عن اللزوم ولا تهملينه ترى مرحلة سنه ونص الى سنتين الله يعينك يبدى يفرض شخصيته
skooon99
•
اقري عليه والله يشفيه ويخليه لكاقري عليه والله يشفيه ويخليه لك
الله يسعدك ويحفظ لك غاليك
مشكووره حبيبتي ماقصرتي
مشكووره حبيبتي ماقصرتي
الصفحة الأخيرة