الحلم بس لأنك قلقانه عليهم وتفكرين فيهم دائما خاصه قبل النوم
ان شاء الله انهم بامان عند ابوهم وأنهم طيبين مافيهم شي بإذن الله
ابوهم واضح انه شاريك ولسى يبيك مو بس عشانهم وانتي سبق وقلت لك
يبيلك علاج نفسي مو شرط حبوب روحي عند طبيب نفسي معروف
و هو يقرر اذا تحتاجين علاج أو لا ترا عادي مافيها شي اذا رحتي
انتي عندك تراكمات واضحه لازم تتخلصين من الحزن و تتركين كل شي راح
٥ سنين ولا تخطيتي ؟؟ مده طويله جدا
الحزن والألم النفسي بعد الشر ممكن يسبب لك جلطه دماغية او قلبية
لازم تتركين هذا الحزن وتتخطين الماضي كله وابدي من جديد وانتي طبيعية
بالنسبة للرجعه لها حلول كثيرة اذا هو تزوج خليه يفتح لك بيت ثاني او ياخذ دور و شقتين وانتي اجلسي مع عيالك
وكل وحده بحالها مع عيالها واذا مو متزوج ارجعي بشروطك وتفاهموا ع كل شي قبل
اذا مره ماينفع ترجعين خليه يفتح لك بيت بالمدينة اللي انتي فيها وخذي عيالك كلهم
والضمان وحساب المواطن تقدرين تفتحين بيت مع النفقة اللي يرسلها
وحاولي تتوظفين لو دوام جزئي او عن بعد
او تسوين اي مشروع شوفي المهارة اللي تتقنينها وخليها مصدر دخل لك و لعيالك
وحده اعرفها تطلقت وعندها ٥ و يجيها دخل ممتاز ما شاء الله سكنت ب مكان بعيد عن الرياض الاجارات فيه رخيصة ونقلت مدارس عيالها وعايشة مبسوطة هي و هما
لا تجلسين بس تكتبين وتشتكين بدون حلول وبدون أي خطوة تسوينها وتمر الايام وانتي في مكانك و تزيد عليك الهموم و تتراكم عليك الأحزان والمشاكل نصحية من الحين تغيري تكفين على الاقل حاولي شوي شوي
تغيرين وضعك للأفضل
يوم عرفه بعد ٣ ايام اتركي كل شي وادعي واستغفري وسبحي قولي كل اللي بخاطرك
و بعدها تحركي بهذي الاجازة خذي قرار ونفذيه فرصة ماتتعوض عندك أكثر من شهرين و كل فترة استخيري و ربي ييسر امرك و يجمع شملك مع عيالك يارب

السلام عليكم
أتمنى تقرين ردي أنا كنت زيك تطلقت وعندي طفل وجلست ٥ سنوات منفصلة لكن حضانة طفلي عندي .
ومع ذلك نفسية طفلي كانت دمااااار
معلمته بالروضة تكلمني انو دايم سرحان مايلعب مايلون تخيلي انو اذا حاولت فيه يلون الواجب ياخذ اللون الأسود
ويلون خربشات .
كان كل يوم يسألني ماما متى أشوفك مع بابا
واسكت تخنقني العبرة
مرة سألني اذا رحنا الجنة بتشوفي بابا هناك
وأسئلة كثييييرة واحلام كثيييرة وامنياته كلها اني وابوه نرد لبعض.
وانا مثلك كنت انتظر معجزة .
واقول مستحيل ارجع مستحيل .
لكن سبحان الله مافي شيء مستحيل ورجعنا لبعض وكانت اسعد أيام ولدي اني رجعت وحس انه حاله حال بقية الناس عايشين في أسرة وحدة
صح انو زوجي فيه سلبيات وتلاقيني كل مرة اكتب مشكلة لأنو مو كامل وحياتنا مو مثالية .
لكن هذا حال الدنيا
لو مهما كانت المشاكل بين الزوجين تبقى اهون من الطلاق بالنسبة للأولاد. الا في الحالات الخاصة جدا
ادعي كثيير ان الله يسهل لك كل عسير ويريح بالك وبال عيالك وزوجك

نصيحة مني لك أرجعي لزوجك واطفالك مهما حصل مشاكل بإذن الله بتنحل وانسي الماضي
مافيه مثل بيتك ومع اطفالك الله يريح بالك
ويصلح احوالكم
وبشرينا إذا رجعت لزوجك وبيتك

ارجعي يابنت الحلال حرام عليك الرجال شاريك وش عندك أحد مغريك انتبهي لحد يخببك انتبهي حرام عليك ارجعي لو جثة هامدة يختي رجلك أبو عيالك ارجعي لو على الورق انتبهي لاتضيعي عيللك او خذيهم عندك انتي مسؤلة امام الله عنهم

ياوردة والله انك منتي دارية وش تبغين

لا انتي راضية بالطلاق وتبغي تكوني قد تبعاته
ولا انتي تبي الرجعة وراضية تتنازلي عن بعض من كبريائك

بالله عمرك شفتي طفل امه منفصله مايتعرض لعدم الإهتمام ؟ والله مافيه طفل امه منفصلة ومستحيل مايكون عنده نواقص عاطفيه لو ابوه واجداده حايفينه حوف

لكن على مرارة هذا الشي ومعرفة الأم بهذي الحقيقة المرة إلا إن ظروفها قد تكون أكبر منها وماتملك تجاه الموضوع الا الصبر والألم

لكن انتي مرة مشتتة تبغي حياة طليقك ورافضة تطلعين من ذي الدايرة وتبغي تكوني بعيدة بدون ماتحلقك تبعات الانفصال
وذا بيدمرك جدا

اجلسي واعرفي وش تبغين ..

وبعدين الاطفال ضروري كل فترة وفترة يكون معاك تعوضيهم لو شوي عن الحرمان وروحك ترجع لك شوي ونفسيتك تتحسن مو معقول هذا الحرمان
ينحرمون منك وتنحرمين منهم وبس تواصل بالجوال
ترى ذا بيأثر عليهم وعليك
مو لانك منفصلة وهم في بيت ابوهم خلاص يبقون هناك ع طول حتى لو قلنا عندك ظروف مادية قاهرة ، اسبوع ماتفرق انهم يجلسون عندك لو غداهم وعشاهم صامولي وجبن ، اهم شي يشمونك ويتشبعون بحنانك

اجلسي مع نفسك وخلاص خذي قرارات مصيرية بدون رجعة انا احتاج كذا وكذا وكذا
وهذا الشي راح يضيف لي كذا ، وتقبلي اي خسارة من ورى اي قرار
وبس يكفي من جلد الذات واجترار هذي الذكريات المؤلمة