ولدي ونظافته الزايده وعناد عيال حمولتي له بسبب طبعه

السلام عليكم ورحمة الله وبركاته

ابي مشورتكم حبايبي ...

عندي ولدي الكبير عمره 5 سنوات فيه نظافه زايده ويقرف من كل شيء ومايبي اي شخص يلمس اكله او حتى تلمسين طرف خبزته او تمسكين ملعقته او كاسه وحتى الاكل مستحيييييل ياكل شيء غريب مايعرفه الا لين يشمه ان اعجبه ريحته اكله ولا تركه ولا يبي اي شخص يقطع له سواء لحم ولا فواكه الا أنا ولا ابوه ويراقبنا ولازم وحنا نقطعله نكون حذرين بقوة مايبي تلمس يدينا مكان اكله حنا تعودنا عليه واهلي واهل ابوه عرفوا طبعه ولكن اشيل همه اذا رحنا للعزايم ولا اي ناس غريبين ولا يعرفون طبعه مايدخل بفمه شيء وحتى كاس الماء يرفض يشرب فيه يقول شغالتهم غاسلته وانا ماعندي شغاله عشان كذا وفي اي بيت فيه شغاله يرفض يشرب بكاساتهم لين اغسلها له وعند الاغراب صعبه ادخل مطبخهم واذا مدوله حلا ولا فطاير او عصير يرفض ياخذه يفشلني وحتى لاكنا نتعشى واذا هاوشته يقولي تبين اكل حوقه ( اكل منحاس )
انا تعوت عليه وجماعتنا نفس الشيء بس اللي يقهرني ان عيال اخواني وخواتي وعيال حمولتي صاروا يحبون يعاندوه عند هالمشكله لا جلس ياكل معهم يعاندوه اللي يلمس مكانه واللي يلمس كاسه واللي خبزته ولا ملعقته وولدي من النوع اللي مايدافع عن عمره يجي يصيح ويترك اكله واذا هاوشت البزارين ماسلمت من السنه امهاتهم لا تدخلين بينهم بزران اللحين يرجعون يتصالحون اولدك مدلع وودلدك نظيف بزياده واللي تقول ترا عيالنا مافيهم سم ووو من هالكلام هذولا اهل حمولتي اما عيال خواتي واخواني ما استحي منهم اسكت مرة مرتين واذا شفت الدعوة طالت قمت عليهم ويجيهم حق الطريق والحمدلله مايزعلون عارفين عيالهم وحريم خواني كلهم من قرايبنا ومعطيني الصلاحيه لكن الموت عيال حمولتي

وش الحل مع طبع ولدي وكيف اخفف من طبعه على الاقل .. والحل مع عيال حمولتي وعنادهم لولدي