ولدي يقول انا مو قليل ادب اختك يا ماما هي قليلة الادب

تهاوشت مع ولدي المراهق لانه طول اليوم نازل ضرب بخواته الصغار ويتريق فيهم وماهم عاجبينه والبنات بس يبكون ويشكون

ساعتها انا عصبت وانفعلت وهزأته وقلت له يا قليل الادب احترم وجودي ع الاقل ولاتضرب خواتك

قال اللي قليل الادب هي فلانه يقصد اختي ماتزوجت

انا جن جنوني كيف تقول هالكلام عن خالتك

قال اسأليها ايش تسوي بغرفتها قلت وانت وش لك فيها

قال مره دخلت انا وفلان يقصد ولد خالته ولد اختي الكبيره بسنه تقريبا يقول مره دخلنا غرفتها وجوالها يدق يدق يدق ومسج ورا مسج يقول فتحنا المسجات حصلنا مسجات غرام اختك ترسلها لواحد وتقول ياحبيبي وياقلبي وقال شفنا رسايله لها مرسل صورته لها وسائط يا وووويل قلبي انا تلعثمت مادري وش اقول

ذكرته وقلت تعرف ان كلامك هذا كبير وفيه قذف قال انا ما اكذب ولو تبين تشوفين صورت اللي يعاكسها عند فلان بالجوال اوريك اياها يقصد بجوال ولد خالته

وش الحل ياناس

اختي هذي عمرها 28 سنه ماتزوجت خلصت الثانوي وبالبيت

طبعا انا ما اقدر اكلمها بالموضوع بتاتا بتقلب الطاوله علي وعلى ولدي اختي قويه

ضاق صدري من كلام ولدي واحس اني طحت من عينه انا وخواتي واهلي تصدقون قال لي لاتقولين مره ثانيه اني قليل ادب اختك اللي قليلة ادب حسيت انه يهزأني انا

خايفه يوصل الكلام لأبوه الحمدلله ما سمعه ولاكان صدق مصيبه

الله يهديه ويصلحه

وش الحل