ولد اوبنت المهم التربيه...قصه واقعيه

السلام عليكم ورحمة الله وبركاته اخواتي هذا اول موضوع اكتبه علشان كذا سامحوني اذا ماعرفت اسيق الكلام واعبر وانسق صح ok:biggthump ادخل في الموضوع اختي ومرت اخوي جابو بنات الحمد لله على سلامتهن بينهن شهر وتعرفون لما احد يجيه مولود يكون البيت فيه من يتشقق فرح ومين يحمد الله على اللي ربي اعطاه المهم قعدنا احنا وحريم اخواني وامي يعني العايله عند اختي نتقهوة وجابو طاري الولد وانه مو مثل البنت سند لهله والبنت نعمه بس همها للممات حتى المتزوجه اهلها يحاتونها ويشيلون همها وهكذا قامت مرت اخوي ماعندها الابنات قالت انا سندي الله ترانا احنا شاغلين بالنا بولد يعني شاغلين بالنا بهم الدنيا نسينا الاخره همي انا الاخره لا العيال ولا الفلوس ولا الاهل ينفعوني ربي وحده سبحانه واعمالي وطاعتي له سندي دنيا واخره وبصراحه كلنا سكتنا صح اللي تقوله محد ضامن شيئ طاعتنا ورضا ربي علينا هو الاهم وكملت قصتها اللي بصراحه لامست جزء من حياتنا كل وحده فينا حست بمعناها هي شوي طويله بس بقولها بختصار هذي قصه واقعيه صايره في الرياض عندنا فيه حرمه عندها اولاد وبنات زوجت العيال من بنات اختها واخوها ومابقالها الابنتها الاخيره كلما خطبوها رفضت الله يهديه ولد عمها ولد خالها ماتبي تقول يدخن او عنده دش اي حجه والسلام لين كبرت وابوها مات الله يرحمه ومافرح فيها وخطبها اللي كان يبغاها من زمان ولد عمها يستر عليها وافقت مع انه متزوج وعنده عيال كبار وزوجته على نياتها مصادقتها ماتدري شيئ بس اختها رفضت وقالت لا توك تبغينه ليش مااخذتيه اول قبل 30 سنه ويش تقول حرمته عندك واهلها وانتي مصاحبتها ... هذا الجزء مسني لاني للاسف كلما جاني عريس تدلعت وامتنعت احسب الجمعات اهلي بعدين بتفيدني يابنات لا يلعب فيكم الشيطان وتقولون بدري ولا بعيد عن هلي اويدخن او او حجج واهيه ترى العمر يجري بس الحمد لله توني مارفضت عريسي:icon30: ترى محد نافعكم ماانسى صوت امي لما خبرتني انه جاي واحد خطبني من ابوي وابوي قال لها انا ابغى ارتاح اخاف اموت ويستلمونها اخوانها صدق مافي احن من الام والاب على الوحده لا اخوان ولا اخوات الله يطول في اعمارهم ... نكمل القصه وفعلا بعد موت الاب البنت تكون مكسوره والام مع الكبر تتعب وتمرض ويزيدد مرضها لما تشوف بنتها قدامها تتحسر وتشوف معاملة اخوانها لها وحريمهم الله لا يوريها لكم انرجع الحرمه سكنة مع ولدها بس شافت مرت ولدها مو مرتاحه وتخلي بنتها شغاله عندها ولعيالها بحجة انها تحتاج مساعده وتعرفون كلام الناس مايرحم فطلعت علشان بنتها ماتتعذب وقالت للناس انها تعبت من الدور الثاني وانها تبغى تسكن بيتها القديم علشان الدرج اسهل ويش تقول للناس مسيكينه تقول مرت ولدها اللي للاسف هي مختارتها بنت اختها تسوي كذا فيها وببنتها سكنت بيتهاوكان ولده الثاني ساكن الدور الثاني الحمد لله عندها سند بينهم باب يعني مستقلين كل واحد براحته بس لااسف محدضامن عياله ولا تفكيرهم ولا اخلاق حريمهم طلع الولد من البيت بحجة انه صار له بيت ملك وخلو امهم الكبيره في السن اللي تمشي بصعوبه واخته لحالهم .... طبعا الحين جينا لاخواتي وامي وحريم اخواني احسهم تأثرو وقامت مرت اخوي حبت رأس امي وقالت لها والله يخالتي تراني مو كذا قالت لها امي ان شاء الله وامي قالت شوفو كلكم ترى البنات تربيتهم صعبه وهمهم مستمر بس حطوها قدام عيونكم لا تخلون بناتكم كذا ربوهم وعلموهم الزين والعيال اذا ماربيتيه زين ماينفعك وقالت اختي احنا موقصدنا نكره البنات بس خوفنا على مستقبلهم هذا اللي خايفين منه لا يورثون ولا يسوقون وكل شيئ عيب ولازم محرم ويارب ماتعنس ولا تفضح اهلها ومصاريف ويمكن زوجها يتزوج عليها او يطلقها اواو طلعت اللي في قلبها وقامت مرت اخوي تكمل القصه قالت انا مادري عن الحرمه ايش صارعليها بس اللي اعرفه انها بتبيع بيتها اللي في الرياض وبتروح ديرتها وبتشتري بيت وبتجلس عند اخوانها بس المشكله اخوانها ماراح يقومون فيها زي عيال بطنها كل واحد مشغول ببيته وبنتها الله يستر عليها كيف هانت على اخوانها يخلونها هي عرضهم وعيال خوالها مو محارم لها. الله يهديهم انا عارفه صدعت رؤسكم بس حبيت اقول ان القصه صدق تعور القلب لما حطيت نفسي مكان البنت تعلمت منها اشياء وهي مثل ماقالت مرت اخوي الله هو السند مو الولد علشان كذا احمدو ربكم جبتو ولد اوبنت كلهم نعمه اهم شيئ التربيه والله لا يحيجكم لغيره قولو امين