ولد خالتي اللي في بالي له علاقات .. معدل

السلام عليكم ... انا متابعه لكم بصمت



بس اليوم بخرج من صمتي واكتب لكم قصتي اللي متعبتني لها سنين وفي الفتره الاخيره تعبتني اكثر



انا وولد خالتي من وحنا صغار نلعب مع بعض ونمون على بعض وكنا اصحاب وامي وخالتي كانو دائما يقولون فلانه لفلان لما يكبرون بس حنا اطفال وبريئين وماهمنا هالشي



.. هم بصراحه مستواهم المادي ممتاز وبيتهم يجنن وكل شي عندهم حلو ... وفي فرق في المستوى المادي والمعيشي بينا وبينهم



كبرنا وانامهتمه بولد خالتي هذا وتهمني اخباره وكنت منتظره واتخيل اليوم اللي اكون فيه زوجته



بصراحه كان حلم كل وحده في عايلتنا وسيم وغني ومحترم ومتدين ومحافظ على الصلاه ومايدخن ... وانا في الكليه اخر سنه تقريبا حنا مو في مدينتهم تتصل خالتي وتعزمنا على شبكة ولد ها هذا ... انا انصدمت مررررره وانقهرت وماحبيت احد يلاحظ علي شي وجاني تعب نفسي مررره وكتمت في قلبي ... كان عندي امل كبير اني باخذه



مارحناالشبكه حقته بس رحت زواجه .. كان زواج حللووووو مره ومرتب والعروسه كانت حلوة ماشاء الله وسافرو شهر العسل خارج السعوديه واثث لها شقه حلللوه ... بصراحه عدت علي ايام صعبه ذيك الفتره وزاد همي اني تخرجت من الكليه وجلست في البيت وماعندي شي اشغل فيه تفكيري غيره ... ومعد صرت احب اروح المدينه اللي هم فيها عشان ماتضايق لوشفته مع غيري



مع الايام صارت مشاكل بين زوجته وبين خالتي وبناتها ... وكل يوم مشكله وحملت البنت وتعبت مع حملها كثير وبعدها فقدت جنينها ... وزي كل الزوجات تصير مشاكل بينها وبين اهله لكنها كانت تدخله في مشاكلها وتسب وتتكلم على اهله وخالتي كانت تتشكى منهاعند امي



وعدت سنتين على زواجه وبعدين طلقها .... وهي في العده كانت تترجاه يرجعها لكن هو رفض واعطاها الصك



بصراحه رجع عندي الامل اني ممكن اتزوجه وكنت ادعيا لله اني اكون من نصيبه ان كان لي فيه خير ...



عدت 3سنين على طلاقه .... طليقته تزوجت وصارت ام اللحين الله يوفقها وهو معد فكر في الزواج وكلمافتحو معه خالتي او اخواته



موضوع الزواج يقول الزواج قلللللق وهم وغم خلوني كذا احسن ... وصار يقول لامه تدور له عروس بس مسيار



قال مابي وحده تعيش معي في البيت على طوووول وتقلقني ...



تجمعناكلنا في عيد الفطر في المدينه اللي هم فيها وكنت مشتاقه اروح واشوف اخر اخباره ...وثالث ايام العيد قالو لنا انه بيسافر



خارج السعوديه عنده شغل في اوروبا ...



بعدها رجعنا حنا لبيتنا ... وعدا كم اسبوع واسمع اخواني يسولفون في الغرفه ويقولون ان فلان اللي هو ولد خالتي تعبان مرره



اناانصدمت وانفجعت مرررره وذبحني الفضول ... مسكت اخوي اللي في الجامعه وسالته ايش السالفه ورفض يتكلم



وجلست ازن على راسه وبصراحه اخوي هذا يمووون علي بزياده ... قلت ويش فيه فلان



قام اخوي وقال بس ماتقولين لاحد .. قلت لا مو بقايله قووول



قال هويوم سافر على اوروبا بعدها راح xxxxx واستاجر شقه وجات عنده بنت يعرفها وعاد انتي كملي الباقي



انا وجهي مايتفسر بجد انصدمت ... قلت طيب ليش تعبان ؟؟ واخوي معد كمل السالفه وراح



واناذبحني الفضوووول والهم واقابل اخته على الواتس واسالها عنه قالت سافر لدوله من دول الخليج



انا معدعرفت شي ... كيف يقولو تعبان وهو مسافر



وانتظرت اخوي حتى جا في الليل وامسكه في الغرفه واترجاه يقول لي



المهم قال خذي الجوال واقري بنفسك رسايلهم على القروب وشوفي اولاد خالاتك كيف مهسترين ويضحك



فتحت الواتس وبديت اقرا ... القروب فيه اخواني واولاد خالاتي وولد خالتي هذا



المهم هوبدا يحكيهم انه يوم راح اوروبا خلص شغله وبعدها راح xxxxxx وكان متعرف على بنت عن طريق الشات الصوتي



وتقابلوفي مدينة xxxxx وراحت الشقه معه ... وقال شفت شي ماعمري شفته



وكل لايام الي عشتها معها احضان وقبل ودلعتني مررره واشترى لها هديه من اوروبا



ويحلف انه ماصار بينهم شي ,,, يقول كنت خايف منها



و بعدمارجع هنا ... تعب ويبغى يرجع مره ثانيه عندها وانه معاده قادر يتحمل فراقها ويحس نفسه تعبان مره



طبعااعضاء القروب بدو يتفلسفون وينكتون عليه وضحك



بس هو موعندهم وباين عليه في كتاباته انه العاشق التعبان ومو طايق كلامهم



اولادخالاتي اتفقو يسافرون معه لدوله من دول الخليج عشان يرتاح ويقدر ينساها


و سافرمعهم



انا في هذي الللحظه بصراحه انصدمت اكبر صدمه في حياتي



لاني ماكنت متوقعه من ولد خالتي الناضج العاقل المتدين يطلع منه كذا



سالت اخوي قلت لا مستحيل هو بس يمثل عليكم



ضحك اخوي وقال فلان والله ماتعرفينه ... حياته كلها علاقات وشرب ومراقص من بعد ماطلق بس xxxxxxاكثر وحده تعلق فيها ماينلام بصراحه يقول جمال غير طبيعي ودددددلع



شوفي كتاباته ايش يقول عن نفسه في الواتس.... ووشفت كتاباته



كاتب اناخلاص انحررررررررررررررفت



اثرت فيني كلمته هذا كثير وحسيت ان الدنيا معاد فيها خير ... ليش انتكس لهذي الدرجه



ولمايسمع ان احد بيتزوج يقوله الله يعينك على القلق وقلة الراحه



انقهرت عليه والله ودي يتزوج اربع مسيار اي شي بس مايمشي في الحرام ودي يرجع زي اووول



للحين مانسيت كتاباته وكلامه في الواتس ماتخيلت انه بيوصل لهذا الطريق ابدا



بصراحه هالموضوع تاعبني من ذيك الايام ليومكم هذا ,,,,, خلاص ماريده بس اللي اريده انه يرجع للحلال والدين



سنين طويله وانا انتظررررررره لكنه مشغول في الحرام



والله يابنات للحين موقادره انسى هالموقف وعايشه في هم من قريت كلامه في الواتس



ودي اشيله من مخي واعيش حياتي بهدوء بس التفكير فيه بالذات من بعد العيد ملازمني



...



بصراحه انا عندي سؤال محيرني .. ليش بعض الشباب لما يطلقون ينحرفون ومعد يفكرون بالزواج والحلال



اثنين من اولاد جيرانا نفس المشكله ... وصلوا للاربعين وهم غرقانين في الحرام بعد ماطلقو



كيف اطلع هالرجال من مخي ؟؟؟ دلوني على الطريقه ؟



الله يرزقني بالزوج الصالح اللي يخاف الله فيني عاجلا غير اجل