بسم الله الرحمن الرحيم
أخواتي في الله. السلام عليكم ورحمة الله وبركاته,,
أكيد تعرفوني وتعرفون قصتي وجزاكم الله عني كل خير ماقصرتو معاي بالنصح والرفع من معنوياتي ولكم كل الشكر والاحترام.
حبيباتي كنت اتمنى يكون موضوعي هاذا بشاره لكم اني تزوجت وارتحت من الهم الي كنت فيه وكنت أاجل كتابتي للموضوع فتره طويله واقول يمكن بكره يكون احسن وتنحل مشكلتي الي زادت وتعقدت وصارت سالفه في القريه ..بس للأسف كل يوم تتعقد أكثر وصارت زي الحلبه وانا الضحيه في النص بينهم ..
خواتي بعد الموضوع الي كتبته لكم اخر مره وقلت لكم ان فيه واحد من جماعت امي تقدم لي وهو انسان خلوق ومحبوب وماكان يعيبه شئ والاهل وافقو عليه بس كانت المشكله عندي والسبب اني خايفه مااكون بنت من الي صارلي وانا صغيره.والحمدلله طمنتوني كثير وزي ماقلتولي صليت صلاة الاستخاره سبع مرات بس ماحسيت بأي شئ تجاه هذا الشخص ولا تجاه ولدعمي..المهم بعد إلحاح من امي وابوي وخواتي توكلت على الله وافقت على ولد اخو امي ..طبعا الموضوع كان ماشئ في هدوء وكان ولدعمي طالع للمدينه عنده دوره اسبوعين ..وبعدها خلاص كانو الاهل يجهزون للملكه لأن خطيبي كان ناوي يسوي العرس هالايام بس فجأه وبدون سابق إنذار جاء ولدعمي وقاطع دورته عشان عرف اني خلاص بملك وجلس مع ابوي في المجلس ماتصدقون وش الشعور الي كنت احسه كنت بموت من الخوف واحس كان فيه حاجه ثقيله جالسه على جسمي وكاني بيغمى على وارجف عشان حسيته قريب مني وفي بيتنا .وكان الوضع عادي فجأه سمعنا صوت ابوي يعلى وصوت ولدعمي اعلى وكانهم بيتهاوشون وركضت امي وصحت اخوي كان نايم بغرفته وراح يركض المجلس وتهاوشو هوشه كبيره وطلع ولدعمي وهويهدد بصوت عالي ويحلف ان ماياخذني غيره وانه بيذبح عريسي لو تجرأ وتزوجني ..ماحسيت إلا امي واخوي يصحوني لانه اغمي علي ويوم صحيت الاابوي فوق راسي واطالع وجهه كانه شخص ثاني اول مره اشوف ابوي كذا واول كلمه قالها لي بس فتحت عيوني قالي وش بينك وبين ولدعمك ..والله يابنات معاد حسيت بالدنيا ولاني عارفه وش اقول غير امي تقوله عيب عليك وش بينها وبينه وتاخذني وتوديني غرفتي وانا انتفض من الخوف خايفه ابوي يلحقني ويذبحني لانه فعلا دخله الشك ...مرت ايام واخواني يهدون ابوي ويأجلون الملكه وابوي حالف يسويها عنادفيه ..وبعدها جاء عمامي ونص جماعتنا للوالد وكانو يبغونه يرد الي خطبني ويقولون ولدعمها اولى من غيره فيها والوالد حالف ماياخذني وتخاصم ابوي مع عمي اخوه الكبير وحلف اذا زوجني غير ولده لاهو اخوه ولايعرفه مع ان عمي قد باركلي وكان بيكون من الشهود على الزواج بس مدري وش صارله ..
ابوي عاش ايام الله لايوريكم عشان اخوه الكبير وهو اصلا الي رباه بعد وفاة جدي الله يرحمه وعمر ابوي مازعله ولارفضله طلب ...الي كان خاطبني جاء للوالد وقال إذا هالشئ بيسبب مشاكل بينكم خلاص انا بنسحب والبنات واجد والله يوفقها اما إذا كانت ماتبغاه وموافقه علي فوالله ماياخذها غيري ولو بعدها موتي..قاله ابوي خير واتفق مع الوالد يأجلون الموضوع فتره لين يهدأالوضع..بس ولدعمي مافيه فايده معاه حاول الولد يتفاهم معاه واخواني حتى اخوي الي يدرس بكندا جاء عشان هالموضوع وكثير من جماعتنا راحو لولد عمي بالمنصد مدري اذا تعرفونه بس هو مجموعه من الكبار والشياب والشيوخ ويطلبونه بفكني لانه قرعني يعني مايخلي احد ياخذني والي يبيني للزواج يطلبني من ولد عمي قبل هلي .أنا كنت اتوقع هالعادات ماتت من زمان بس للاسف ولد عمي رجعها والمشكله الكل شايف له الحق...
المهم قبل كم يوم كلمتني بنت عمي الي هي اخته وقالتلي فلان يبي يكلمك تجمدت مكاني ومعاد عرفت انطق بحرف وفجأه سمعت صوته قفلت الجوال بوجهه وجلست ارجف من الخوف وادعي في داخلي واول مره اسوي كذا اني ادعي بس هذاك اليوم قعدت استغفر وادعي ربي واقول كل شوي توكلت على الله والحمدلله هديت وماصارلي الاحساس بالدوخه والخوف....وفي نفس اليله جاتني رساله من رقم غريب فتحتها لقيته هو ولدعمي يقولي فيها عطيني فرصه اتكلم معاك واقولك الي في خاطري اذاكنتي موافقه ارسليلي رساله اتصل بس ماارسلت شئ ومسحت الرساله وقفلت جوالي بالمره وفي الصباح كلمتني اخته وقالتلي ليش ماتفتحين جوالك وكلمي فلان وتفاهمو وشوفي وش بيقولك بس رفضت وقلت لها قوليله ماابيه وماراح اخذه لوحياتي بيده مااخذته وياليت يخليني بحالي ولايقطع نصيبي ...كنت حاسه احساس كبير انه راح يتركني ويمكن يقتنع اني ماابيه ويحس على دمه .بس للأسف إحساسي كان غلط وماصار شئ من الي توقعته بالعكس مصر على تخريب حياتي وامس صارت بينه وبين اخوي هوشه كبيره ومضاربه وهم في جمعة رجال لانه غلط على ابوي ..
خواتي اسفه طولت عليكم بس حبيت احطكم في الصوره معاي وتشوفون الهم الي على صدري ولحضات الخوف الي احسها كل ماحسيت ان هالانسن بيتسكر على وعليه باب لوصرت من نصيبه
أيش اسوي خايفه على ابوي وهو مريض وعنده ظغط والقلب وخايفه تخرب علاقت عمامي مع بعض وهم اخوان طول حياتهم وخايفه اخذه وهذا الي ودي اموت الف موته ولا اشم ريحته قولولي ايش اسوي في مصيبتي وهمي ؟؟
أدعولي عساربي يفرج همي وهم كل مهموم يارب يارحمن يارحيم...
يبيني وووماأبيه @ybyny_ooomaabyh
عضوة جديدة
هذا الموضوع مغلق.
tom.tom
•
سالفه جدآمعقده .الله يفرج همكم بس لو يدخل على ولدعمك شيخ فاهم ومتعلم يمكن يقنعه
مايجوز يوقف في طريقك الزواج قسمه ونصيب الله يفرج همكم ويلح أحوالكم
مايجوز يوقف في طريقك الزواج قسمه ونصيب الله يفرج همكم ويلح أحوالكم
الصفحة الأخيرة
طيب انتي قلتي انك تزوجتي صح ولا انا فهمه غلط ؟؟!!