أقول ساكنين في بيت لحالنا و صجتني ولجتني كل ماشافتني
قالت اعرس وكل ماشفتها قالت ورى ماتعرس وكل ماشفنا بعض قالت هاه متى تبي تعرس
وقلت لها طيب أبسألك وجاوبيني بصراحة انت تبيني أعرس عشان أوسع صدري والا عشان تكرفين حريمتي في البيت وتخلينها تعاونك قالت هه ( هذي دلالة التوهيق عند *** ) تبي الصدز مهوب علشان تعاوني لا والله الا علشان تشتغل لحالها وأستريح
وبما ان كثرة الطق تفك اللحام على مايقولون قبلت الفكرة مبدئياً وقلت سمي بس بشرط ما أبي أي حرمة قالت خابرةٍ شروطكم وانا امك تبي لك وحدةٍ نحيفة وطويلة وبيضاء وشعرها للي انت خابر
قلت ي**** وما امداني أقول اتس الا والزنوبة لاصقةٍ في جبهتي وصايرةٍ كنها ستيكر
قلت أمزح معك وكانك صاملة تدورين لي عروس أبي لي وحده مثل ***
قالت وشو***ما اعرفه ورني صورته عشان أدور لك وحدةٍ تشبهه
قلت لو منتيب أمي كان أقول الله يخس وجهتس
لو ما اعرس ماخذت وحدةٍ تشبههه مهبول انا ..
أقول ابي وحده زيه يعني زي المواصفات اللي يبيها فهمتي ؟
قالت وشهو يبي قلت اسمعي وش يبي وأبشرح لك زود
: يقول
أبي لي مهرةٍ ماعسفت صغيرة وبنت حصان *-* ابوها اللي يفك المشكلة ويزبّن الجاني
يعني أبي لي وحدةٍ صغيرة فيها شوي قشارة وغرورو عشان أكسر خشمها ههههه الله من زين الشرح لو يدرون عني وزارة المعارف خلوني أشرح قصايد النصوص حق الثانوي
المهم ابي لي وحدة ماعسفت عشان أعسفها لأني مثل خالد الفيصل بالضبط لأني أحب البراد والشعر و أحب عسف المهرة اللي تغلاّ بس انه أطول مني خشم هذا هو الفرق الوحيد
وأبي ابوها يجي جيد مثل اللي في المسلسلات البدوية اللي يجونه واذا صب لأحدهم القهوه قال مانيب شاربها الين تنطيني طلبي
وأخوها لاتعزوى بأسمها فزوله العربان *_* يحق لها الفخر في قولة ال فلان جاني
وأبي اخوها اذا قام يدور في التخصصي أتلى الليل وقعدوا يفحطون وتصادموا مع أحد وتهاوشوا قبل ما ينزّل مفتاح العجل يقول اسمها وانا اخو فلانة عشان يرعبهم وتطقهم النفاضة
أبيها في بحر عشرين لازودٍ ولا نقصان *_* ابيها أقصر طويله والوصوف أشكال والواني
يعني يا اميمتي ما ابيها شمحوطه يطق راسها في الغما الا قامت لأنك خابرة ربعنا يتطنزون باللي حرمته أطول منه على ان مافيه أي مشاكل سياسية ولا اقتصادية ولا خلافها من هالشي ( وركزوا على خلافها )
.. ولا أبيها قزمه تقعد تقلقني الا جيت اناظر مبارة الهلال وهي تصلح العشاء تعال جب له هالقدر ماطلته وامش ارفع لي هالماعون في أعلى الدرج الخ وصح انها تبي توفر شويّ من ناحية تفصيل الثياب بس ولو السلبيات أكثر من الإيجابيات
قالت اميمتي هاه خلصن طلباتك قلت توك مابعد جاك شي
أبي الجبهه كما الصبح وكما القوس أسود الحجان *_* وأبيها ناعسات ونرجسية سود الأعياني
يعني أبي جبهتها تلق وتسطع كنها صبح مهوب تجيبين لي وحدةٍ دهسا كن جبهتها******) يعني ماورى سوادركبتها سواد ..
وأبي حواجبها تصير مقوسه مهوب تجيك شابكةٍ مع بعض كنها خط سريع وعيونها أبيها ناعسه يعني مغمضه شويّ مهوب تجيبين لي وحدةٍ قبلها مبحّرة و مطيرةٍ عيونها كنها ******* الا حسبوا عليه بلنتي
أبي رمشٍ كما ريشٍ يغطي الثلج في الأوجان *_* وأبي جفنٍ يشيل الرمش طربانٍ وكسلانِ
يعني أبي رموشها طويلة كنها ريش دجاج فقيه ( الله ياني أفت شرح ، غطيت على ******اللي شرح ديوان المتنبي )
والا غمضت كذا غطت نصف خدها اللي ابيض من الثلج بها وأبي الجفن الا شال الرمش ورفع يشيله بشويش وهو طربان مهوب تجيبيبن لي وحده تكبس بعيونها ياما رفعت جفونها وياما نزلتها كن فيهن زار
أبي خدٍ كما وردٍ تنمّى في طرف بستان *-* وأبي خشمٍ صغير ومثل حد السيف شاماني
يعني أبي خدها ناعم كنه الورد مهوب تجيبين لي وحدةٍ ممشقة خدودها ونص ميزانية ابوها على الفازلين وليته يسرّ وأبي خشمها صغينون وسلة سيف
أبي البسمة كما البرق وثناياها كما المرجان *_* وشفاها جمرتين وفمّها خاتم سليماني
يعني أبيها الا ابتسمت ينوضن سنونها كنهن برق مهوب يطلع لي سنونٍ كلهن مسوسات وثناياها ابيهن كنه مرجان طالعات وأبي شفايفها حمر كنهن جمر مهوب سودٍ من كثر الديرمان وأبي اثمها صغينون مهوب كبير الا جت تاكل التفاحة تقول بنصفها بعرمة وحدة
أبي شعرٍ مثل ذيل الفرس لاطبت الميدان *_* أو الشلال لامن بات ليله بين الامتانِ
يعني أبي شعرها ناعم مهوب عكاريشٍ نصفه قمل والنصف الثاني صيبان وأبيه أسوووود مهوب أشهبٍ من الغبار والطحين وأبيه منساب ونظيف مهوب متعنفش وثلاثة ارباعة عودان
أبي جيدٍ سوات بريق فضة ناتقٍ مليان *_* وصدرٍ كنه مرايه عليها طلع رمانِ
مهوب تجيبين لي وحدةٍ مالها رقبة والا تجيبين لي وحدةٍ صدرها عليه طلع ( قرَع ) تراي خابرك
أبي ظهرٍ كما الجدول وقدٍ مثل غصن البان *_* وخصرٍ مثل مجدولالعنان وجسم روياني
يعني أبي جسمها زين لا تجيبين لي وحدةٍ معصقلة كنها عارضة أزياء ولا دبيةٍ كنها *******وأبي لها خصرٍ سنع ما ابي كرشةٍ ترجّ
أبيها نابية *** وبطنٍ ضامر جوعان *_* أبيها مدمجة ساق وقدمها لسان ثعبانِ
يعني أبيها أخاف تفهميني غلط وتصفقيني أقول هالشرط متنازل عنه
أبي المشية كما اللي طالع من المعركة كسبان *_* وابيها ترشّ مع خطواتها مسكٍ وريحاني
يعني مابيها تصير مدنقةٍ بعبيتها الا جت تمشي لو يجي ماصورةٍ قبالها صمختها وأبيها الا جت تمشي في البيت أحس اني عند عبدالصمد القرشي من كثر هالاطياب اللي تحط مهوب تحشرني بصناقها وأحس اني ماسك الدائري حول مفرق الحراج
أبيها تنتصر لي من زمانٍ حطني نيشان *-* وتبشر بالغلا اللي مالفى به واحدٍ ثاني
يعني أبيها تعوضنيعن الدهورا للي راحت وعن وقتي اللي رازني على جداار كني قوطي ببسي ومغير يصمخ فيني بهالساكتون
أبي اللي فات واللي فات صعب ومن لقى العنوان *-* يرد العلم والا افضّل ابقى اعيش وحداني
انا قلت وحداني والا ماقلتها مادريت الا والمقرصة قي جبهتي I
وياقليل الحيا وياقليل الذاتية وياقليل المعرفة وياقليل الخاتمة مهنا قليلٍ ماقالته لي ، قلت خير يمه وش فيه قالت وشو وحدانية وانا مامليت عينك قلت هذا الشاعر اللي يقول اصبري مابعد جاء شرحي
يعني يا اميمتي : ابي وحدة فيها كل المواصفات اللي فاتت ولو انها صعبه وان كان احد يخبر له وحدةٍ بهالمواصفات يعلمني والا افضل أعيش انا وأميمتي الله يحفظها وياقاها ( الخوف مليح )
قالت هاه باقي شروط والا قضن .. قلت الا باقي .. وأبيها مدرّسة بعد
مدري وشلون نسى هالصفة *** قالت : مش خشتك بس .. وافرش شدزك مالك الا حصة بنت خالتك .. قلت وشي حصته الله يهديك هالحين أقول ابي لي وحدة أثمها كنه خاتم سليمان وتجيبين لي وحدة كن أثمها أثم عبسي الا تثاوب ،
وأبي لي وحدةٍ خشمها صغير وكنه حد سيف وتجيبيني لي وحدةٍ خشمها كنه بطاطس ايرلندي
خير إن شاء الله وجع ( هذي قلتها في نفسي ) .. مالك الا حصة يعني مالك الا حصة ( أنواع تفخ الخشة )
وهذا لونكم يالشباب الواحد منكم كنه شيفة غلغل ويبي له ملكة جمال
قلت طيب لحظه وأروح اناظر خشتي في المراية ويوم ناظرت قلت هقوتس تبي تطيع حصة ؟
قالت والله ما ادري أبساحرها وكود ماتخالف .. قلت طيب إن عيت قولي لها ترى الوسامة مهيب مهمه أهم شي وسامة الروح
ـ
ـ
ـ
ـ
ـ
ـ
ـ
ـ
منقول من ايميلي اترك لكم المايك للتعليق
الله يسعدك
خليني اضم اخوي معاه نفس المواصفات اللي يبغاها ههههههههه
لنا 3سنوات ندورها وما لقينها
وشكله بنخطب له حصة