ومات الجنين للمرة العاشرة ..

السلام عليكم ورحمة الله وبركاته ...
قبل فترة كتبت قصة اخت زوجي مع موت الجنين في كل حمل لها ..
قصتها باختصار كل ما حملت يموت الجنين في الشهر الثاني ..
تكررت هالحالة معاها لحد الحين عشر مرات ..
والله حالتها حالة يائسة وفاقدة الامل مع انه الامل بالله كبير ..
طبعا هي حامل في الشهر الثاني الحين ..
الاسبوع الماضي راحت للدكتورة وكان الجنين صغير وايد ..
بس شافت دقات قلبه مع انها ما طمنتها وايد بس قلنا ان شاء الله خير ..
واستمرت بالرقية وقراءة القرآن والدعاء ..
اليوم راحت للدكتورة مرة ثانية وللاسف الجنين مات مثل اللي قبله ..
ما اعرف اذا وحدة فيكم تعرف حد مر بنفس حالتها ..
واذا كان فيه علاج استخدمته ونفع معاها ..
بصراحة كاسرة خاطري والله خاطري اساعدها باي طريقة ..
للعلم سوت فحوصات في مستشفياتنا والتحاليل كانت سليمة على كلامهم ..
وكل حمل يعطونها ابر بشكل يومي ..
بس ماشي فايدة ..
وبالنسبة للقرآن كذا شيخ قروا عليها والشفاء بيد الله ..

اللهم أجرها في مصيبتها واخلف لها خيرا منها
اللهم آمين