ازيك يا حبايبى وحشتونى جدا....مش ملاحظين ان لون الملف قلب على غوامق أوي.....ده مش اعتراض لا سمح الله...احنا هنا علشان نفضفض و نسمع بعض...لكن اللى تطول فى الزعل و تستسلمله هى اللى يا ويلها مننا...عايزين يا حبيباتى تجمعنا يكون مكان نفضفض فيه و نستريح بس قبل ما نخرج نكون هدينا ذهننا بقى صافى علشان نحل مشكلتنا مش نستسلم ليها...

نيفو
باحييكى يا حبيبتى على ثباتك و قوتك...الله عليكى يا حبيبتى...ربنا يديكى ما تتمنى و يصلحلك احوالك و ميحرمناش منك أبدا يا حبيبتى....نيفو هانتهز الفرصة و أؤكد على الكلام اللى قالته رمال حبيبة قلبى...خلاص بقى نرمى الزعل و نبص لقدام علشان نختصر الوقت...نبتدي الريجيم و نروح للدكتور و نشوف هيقولنا ايه و نمشى عليه....و انا واثقة انك هتفرحينا قريب اوي...

هوبة
يعنى انتى تغيبى تغيبى و تيجى ترمى القنبلة و تمشى يا قلبى...هبه انا مجهزالك السيخ المحمى لو طلع اللى انتى تقصدية هو اللى جه فى بالى...و سامحينى انا هاتكلم على هذا الاساس...هبه انا لاحظت من توقيعك ان زواجك يا دوب لسه مقفل سنه...يعنى فى عرفى لسه عروسة...يا حبيبتى ده أول فترة ديه هى غير ما ناس كتير فاكرين...ديه بتبقى فيها عز الخلافات نظرا لاختلاف الطباع...و مش بتبقى طباعك لوحدك لا ديه طباع عيلة بتتداخل مع طباع عيلة...وطباع رجل تربى على عادات بيعيش معاكى فى بيت واحد و بتحاولوا تتاقلموا مع بعض...يا حبيبتى احنا علشان نخلط شوية ماء مع شوية فاكهة شوفى بنضربهم فى الخلاط أد ايه...فما بالك بالبنى آدمين..و بالتحديد الرجل الشرقى اللى هو فعلا يعيش بقلب طفل صغير لكن بطباع خشنه بعض الشئ...الامور بتحتاج بعض المسايسة...أتمنى ربنا يخلف ظنى و يكون ما تشكين منه شئ آخر لأن كله يهون إلا التفكير فى الموضوع ده...

دينا.
الحمد لله انك عدتى الى صوابك سريعا يا حبيبتى...و هاقولك معلومة سمعتها قريبا فى برنامج للشيخ خالد الجندي...ممكن تكونوا تعرفوها لكنها كانت جديدة عليا...و هى ان أكر عمل فرح يه إبليس من شيلطينه لم يكن الزنا و لا السرقة و لا غيرها و إنما كان التفريق بين الزوج و زوجته...اللى انتى عملتيه ده انا عملته فى يوم من الأيام...و ندمت عليه بشدة لان فعلا ساعات الشيطان بيعمى عين الواحد عن النعم اللى في ايده...يا ريت يا جماعة كلنا نقاوم الشيطان و لما نتضايق من أزواجنا نستعيذ بالله من الشيطان الرجيم و نتذكر كل حاجة حلوة عملوها معانا...ربنا يهدينا جميعا...

أم أنس
هونى على نفسك يا حبيبتى....احنا ياما طلعت عنينا مع الدكاترة و العك بتاعهم سواء بتجارب شخصية أو بما نسمعه من الاصدقاء و الأقارب...و ده خلانا فعلا خلى الحابل يختلط بالنابل و خلانا منميزش بسهولة من الأصلى و التقليد....
أنا شايفة انك لم تخطئى الخطأالذي يستحق كل هذا الحزن...حبيبتى دكتور عادل فعلا انسان محترم جدا و طبيب شاطر و أمين و بيخاف على مريضه ماديا و معنويا ..وأنا شخصيا من ساعة ما عرفته و انا كل مااعرف حد محتاجله بأدله عليه و أقوله كفايانا تعب مع أنصاف الدكاترة....و من حقه انه يزعل من كلام يسئ إليه على الملأ و بالتالى يدافع عن سمعته و يوضح الحقيقة...لكن برضه يا حبيبتى لا تؤنبى نفسك بالطريقة ديه...زي ما قالت رمال كل واحد بيبقى ليه وجهة نظره ...و انتى وجهة نظرك اكتسبت اللون الأليم و الشك من المواقف اللى مريتى بيها...كان من حقك تشكى لكنى لمت عليكى فى إنك لم تعطى لهذا الطبيب مهلة حتى تناقشيه فى شكوكك و حتى تتأكدي إنه غير أمين...

عموما يا حبيبتى اللى فات مات...و دكتور عادل طبيب ...مهنته تخفيف الآلام ...فلا تزيدي من آلامك ..و خدي الرأي الجامد ده بقى...علشان تصالحيه و كمان تساعدي نفسك...يبقى يا حبيبتى راسليه تانى و اعتذريله و اطلبى منه انه يكمل علاجك ...ده أقوي رد اعتبار لانسان أمين زيه و كمان فيه فايدة ليكى انك تستكملى مشوار العلاج اللى قطعتيه...مش عايزين نضيع وقت تانى يا قلبى...ربنا يسعدك يا حبيبتى

أوشى
عايزاكى على طول مفرفشة...و بصى قدامك دايما يا حبيبتى...ده العمر لسه قدامك ...و اللى محصلش النهاردة يحصل بكرة بأمر الله....عايزة أقولك انى النهارده كنت قاعدة مع جارتى اللى قلتلكم قبل كده انها قعدت مده طويلة بدون انجاب و بعدين ربنا كرمها....مش عايزة أقولكم أول مرة كانت تتكلم عن مشاعرها و الحاجة الجميلة انها فعلا أكدتلى أن كل سنين الانتظار و الألم بتتنسى بمجرد سماع خبر الحمل...بس ساعتها الواحد بيكون ندمان على الوقت اللى ضيعه فى الزعل...و كان ممكن يستفيد بيه فى حاجات كتير قوي...ربنا ما يحرمكن من اللحظة الجميلة ديه و كما ميحرمكمش أبدا من الاستمتاع بالحاضر...

هابى و كنزي و شيمولاتا و غادة و مانولا....فينكم يا بنات مصر...ربنا يطمنا عليكم يا قمرات

مميزات
ربنا يقومك بالسلامة يا حبيبتى و على رأي رمال بلاها وكل جاهز...أنا عارفة ان الممنوع مرغوب بس معلش نستحمل شوية....

كوكر
ألف سلامة عليكى ...ارتاحى يا حبيبتى على أد ما تقدري و حاولى دايما تحافظى على ضغطك و تابعيه ...ربنا يكمل حملك على خير و تقومى بالف سلامة

رمال
حبيب قلب قلب أعماق قلبى....بجد مشاركاتك الجميلة و القيمة بتضفى للموضوع بتاعنا مذاق خاص ..بجد و الله مش مجاملة...لحد يفتكرلك مفوتالى ربع جنيه و لا حاجة...بجد يا حبيبتى باحس انك بتقري المشاركات باهتمام شديد و لما بتردي بيكون ردك وافى و منظم و ده بينم عن إنسانة لها عقلية تحترم و كمان بتتعامل مع أمور أخواتها بكل اهتمام و أمانة...ربنا يوفقك يا حبيبتى و ميحرمناش منك و يقومك بألف سلامة

دودو .....عاملة ايه يا حبيبتى....ربنا يرزقك ما تتمنى و يخليلك جوجو...

طمطم...بجد و الله باحبك فى الله.. ربنا يا حبيبتى يهديكى للى فيه الخير و يسمعنا عنك كل خير يا رب...

بوبا...غطست فين يا جميل...خلاص العلقة عدت...بس فعلا احنا لما قلنالك ان وجع الاشعة بسيط ده مكنش استعباط ده كان واقع فعلا لكن واضح انك خوافة شوية و أعصابك كانت مشدودة...عموما هى عدت ...خلينا نفكر فى اللى جاي...و انا لى رأي يا حبيبتى...يا ريت تتابعى فعلا مع دكتور عادل...و بلاش لف على باقى الدكاترة و ابتدي بقى العلاج علشان منضيعش وقت...و على رأي أم أنس اللى ان شاء الله أنس هينور دنيتها قريبا كل شئ يهون لأجل عيون النونو...

غادة...فينك يا حبيبتى ...تعالى طمنينا عليكى..

والله يابنات بحبكم فى الله بس انتوا عارفين نهاية الاسبوع حبيت بس اسلم عليكم واقولكم وحشتونى وربنا يكرمكم ويهنيكم ويبعد عننا الشر كلنا يارب ويجعل ايامنا كلها فرح وسعادة و وأوأة ياااااااااااااااااااااااااااااااااااااااااااااارب:04: