اشتقت اليك :

بوبا يا حبيبة قلبى...كل الوش ده و لسه سنه و شهرين زواج..بالراحة على نفسك يا بنتى القلق اللى انتى عايشة فيه ده... اقري كويس يا حبيبتى و جمعى أوراقك و رتبى أفكارك....علشان تحددي انتى عملتى ايه و ناقصك ايه...و تابعى مع دكتور واحد تكونى واثقة من كفاءته....و طالما يا حبيبتى بعتى تحاليلك لدكتور عادل...يبقى رايي انك ترتاحى شوية و تستنى تشوفى هو هيقولك ايه....إما يطلب الحاجات اللى ناقصة...يا إما يكون ما أرسلتيه كافى انه يعملك خطة علاج تكسبى بيها وقت....و ان شاء الله ربنا هيقدم اللى فيه الخير... و متشغليش بالك بقى بكل الكلام اللى فات عن الأكياس لحد ما كوكر تقولك على حد كويس تعملى عنده سونار...وممكن يا حبيبتى تاخدي التقرير و تبعتيه لدكتور عادل و هو ان شاء الله هيفيدك.. و بالنسبة لكلامى عن الاكياس و البويضات فركزي و النبى يا بوبا...انا قلتلك فيه اختيارين...او عملنا السونار بعد فترة التبويض و لقينا الجراب بتاع البويضة شكله متعرج يبقى كده اللى كان الدكتور بيقيسه قبلها ده فعلا بويضة و خرجت ..و اللى بيتبقى ده هو الجسم الاصفر اللى غما بيفضل فى الجسم لو حصل حمل او بينزل مع البريود لو محصلش...و لو عملنا سونار بعد البريود و ملقبناش حاجة يبقى مفيش أكياس و لا غيره...أما لو لقينا فبيبقى ده كيس و لازم يتعالج....علشان كده الفيصل مع الطبيب لو شك ان فيه كيس انه يعملك سونار بعد البريود مباشرة علشان يتأكد ...و يارب ما يلاقوا عندك لا اكياس و لا غيره...و يبقى كله تمام و بالنسبة للتحاليل اللى بتدل على التكيس هى ال fsh, LH و بيتعملوا فى اليوم التانى او التالت او الرابع للبريود....و الافضل ان مفيش رقم منهم يزيد عن 10...و علشان نقول ان مفيش تكيس يبقى لازم ال Fsh يكون ضعف ال LH أو قريب من النسبة ديه ...ده الكلام اللى اكدهولى طبيبى...يعنى الخلاصة ان بيبان التكيس لما ال LH بيبقى عالى..و زي ما قلتلك طالما بيتناسب عكسيا مع البروجسترون...يبقى لما البروجسترون يعلى عندك فغالبا ال Lh هيكون قليل مما يعنى ضمنيا ان مفيس تكيس...و ده حصل معايا انا شخصيا ان الدكتور لما شاف تحاليلى لقى اا LH ضعف ال Fsh و البوجسترون قليل...و لما خلانى أعيد التحاليل بعد ما خدت الادوية طلب منى انى أعيد البروجسترون و البرولاكتين بس...و لما لقى البروجسترون على قالى انتى كده بقيتى تمام و هاديكى مهلة شهر علشان تنزلى وزنك... لكن برضه للامان ناقشى طبيبك فى النقطة ديه و اساليه هل تكتفى بالبروجسترون و لا لازم تعملى التحاليل ديه.؟

بوبا يا حبيبة قلبى...كل الوش ده و لسه سنه و شهرين زواج..بالراحة على نفسك يا بنتى القلق اللى انتى...

رمـــــال :

عزيزتى ريهام اهلا بيكى معانا ونورتى الملف بتاعنا :27: .. نتمنى يكون وشنا حلو عليكى ونقدر كمان نفيدك باللى كل تحتاجيه .. بصى الاول بالنسبه لمركز جنين فا هو مركز لا يختلف عليها اثنان وهو من اكبر المراكز اللى بتعالج العقم فى مصر وبيشرف عليه او بمعنى اصح صاحب المركز ده هو دكتور اسمه حسام زكى وهو راجل ربنا يكرمه ويحفظه نحسبه على خير .. انسان متمكن من مجاله بشكل كبير وناس كتير راحت له وارتاحت معاه وهتلاقى برده على نفس المستوى دكتور عادل اللى نيفو سبقتنى وردت عليكى بخصوصه .. وبالنسبه للاسعار فا دى حاجه بتعتمد على حالتك وعلى اللى هتحتاجى تعمليه فا ده شئ بيختلف من مريضه للتانيه ولو كلمتيهم هيقولوا لك فى المركز انه يعتمد على الحاله والفحوصات اللى بتتم ساعه العمليه .. ومن ناحيه بقه نسبه النجاح فى المراكز انا مش هرد عليكى فى النقطه دى لانى مقتنعه تماما بكلام نيفو وكلامها مظبوط ميه الميه فا مش هكرر الكلام بتاعها تانى يا حبيبتى اما عن انهى احسن مركز ابو الغار ولا مركز جنين .. بصى يا حبيبتى الاتنين كويسين ومحدش يقدر يقول واحد افضل من التانى لان الاتنين فيهم اطباء اكفاء بالاضافه الى انهم بيستخدموا اجهزة حديثه ومتطورة وكمان الاتنين سمعتهم واسعه وجيده جدااا .. لكن فى نقطه بنسمعها كتير اوى ان مركز ابو الغار مشكلته فى الانتظار يعنى صعب تاخدى معاد قريب وناس كتير بتستنى دورها وبيشتكوا من ده .. ودى كل معلوماتى يا حبيبتى وانتى ما عليكى الا الاستخارة بس انتى ليه يا حبيبتى عايزة تعملى حقن مجهرى مانتى حملتى قبل كده طبيعى من غير حاجه يبقى انتى مش عندك مشكله تستاهل العمليه يمكن مشكلتك بسيطه وتتحل على طول الحاجه التانيه انا للاسف معرفش المراكز اللى فى الاسكندريه بس اكيد مميزات هتفيدك فى الموضوع ده .. بس مش انتى بتقولى انك عايشه فى الكويت ؟؟؟؟ يبقى عايزة عناوين مراكز فى اسكندريه ليه انتى نازله قريب مثلا ؟؟ وبعدين انتى اسكندرانيه يا حبيبتى انا حاسه ان لهجتك مش اسكندرانى شويه صح ولا ايه ؟؟ ياريت تحكيلنا اكتر عنك ولو انتى عملتى اى تحاليل قولي لنا عليها يمكن نقدر نساعدك وبعدين انتى لما رحتى تكشفى عند الدكتورة دى قالت لك انتى عندك ايه علشان تعمل لك اشعه الصبغه دى ؟؟ وليه عملتيها قبل ما تكملى فحوصاتك الاولى ؟؟طيب ليه كررتيها تانى فى مصر ؟؟ بصى فى اسئله عندى ليكى كتير بس انا هستنى منك معلومات اكتر عنك علشان كلنا هنا نساعدك يا حبيبتى واهلا بيكى مرة تانيه ونورتى هبـــــه .. ازيك يا امى انتى غطسانه على طول كده . .احنا مش عايزين نعرف اخبارك يا ستى كفايه بس تطمنينا عليكى .. بصى بقه انا من الاول مش مقتنعه انك تستنى اربع شهور كده دى مده طويله يا هبه حاولى يابنتى تكسرى الفترة دى وتاخدى قرار يا اما انك تروحى للدكتور اللى بتتابعى معاه وتقولى له ايه الخطوة الجايه ومش هستنى تانى او تغيريه وانا لو مكانك بجد هتخذ موقف واستخير اعمل ايه بس انتى واقفه مكانك يا قلبى ومفيش جديد لمده تلات شهور اهه بيتهيألى الانتظار تانى ملهوش معنى .. ربنا يوفقك للى فيه الخير يالا اتحركى بقه خلينا نسمع عنك اخبار حلوة مميـــــــزات .. حبيبتى ربنا يكرمك ويرزقك ساعه سهله ويكرمك بالابن الصالح الصحيح المعافى يارب قريبا ان شاء الله نيفو ... والله انتى كلك زووووق وكلامك حلو اوىى ربنا يخليكى ليا يا قلبى ويخليكى لينا كلنا هنا ودايما حنيتك مغطيه الكل .. يارب يا نيفو يرزقك كل اللى بتحلمى بيه .. وبالنسبه لمسلمه انا كمان ربنا يعلم مش ببطل تفكير فيها وكل شويه اقول ياترى هى فين وبتعمل ايه ما طمنتناش من ساعه اخر مرة طماطم انتى صحيح هتعملى ايه الفتره دى وقررتى تعملى العمليه ولالا يا حبيبتى .. استخيرى يا طمطم كويس الاول علشان ربنا ييسر لك الامور وييسر لك الاصلح ليكى يا روحى اشتقت اليك ازيك يا حبيبه قلبى .. عامله ايه .. اوعى تكونى مكسله فى الدايت علشان مش نزلتى على الميزان لا حاولى تانى وانتى اكيد جسمك اتشد من الرياضه اللى لعبتيها يعنى اهه جابت نتيجه .. يالا مش عايزين تقصير الشهر ده خلينا نسمع خبر حلو الشهر الجاى بقه دينا انتى فينك يا بنتى .. وباقى البنات فعلا كنت لسه هسأل عليهم بس اشتقت اليك سبقتنى .. فينكوا يا حلوين مانولا وكنزى ودودو ام جوجو وشيمولاتا والبقيه ..

عزيزتى ريهام اهلا بيكى معانا ونورتى الملف بتاعنا :27: .. نتمنى يكون وشنا حلو عليكى ونقدر كمان...

رمـــــال :

السلام عليكم ورحمه الله وبركاته بوبا حبيبتى .. بصى يا بوبى انا تهت وسط الكلام الكتييييير والاشعات والفحوصات اللى انتى عملتيها لانها كلها بتتعارض مع بعضها تقريبا ومفيش حاجه واحده بتأكد حاجه تانيه لا كلها متضاربه بشكل مخلينى مش عارفه ارد عليكى فى ايه ولا ايه .. ولما بوصل انا شخصيا للمرحله دى انا بثبت مكان واحد ودكتور واحد اعمل معاه كل حاجه علشان تبقى كل حاجه بتشرح التانيه فاهمانى وعلشان المسائل يكون ليها تفسير منطقى اكتر من كده اولا بالنسبه للكيس اللى شفتيه اهه الاخوات ماشاء الله ام انس واشتقت اليك وفوا وكفوا ياريت تكونى قريتى الكلام بعنايه لانه كلام مظبوط جدااا وصح وانا شخصيا كنت بشوف الكيس المعووج ده احيانا فى السونار بتاعى بعد خروج البويضه وبالنسبه للالتهابات تقدرى تقولى عليا بقى معايا دكتوراه فيها :rolleyes: لانى قعدت بتاع 6 او 7 شهور اعانى منها معاناه غير طبيعيه وفضلت وراها لحد ما خفيت منها بنسبه 80 % فا اى سؤال فى النقطه دى انا تحت امرك يا عيونى .. بس عايزة اقول لك انتى حاسه بأى اعراض للالتهابات دى ولا تخمينات منك يعنى ؟ وبعدين الانبوب اللى مسدود ده ليه مليون سبب علشان يتسد مش بالضرورة الالتهابات هى السبب خصوصا انك بتقولى مش جتلك اعراض التهابات بالشكل الفظيع يعنى وكمان الدكتورة لما اخدت عينه من المهبل وعنق الرحم مكانش فيها حاجه.. وعايزة اقول لك ان لو كان سبب الانسداد هو الالتهابات كان زمانك حسيتى بيها فى عنق الرحم وفى الرحم وكنتى حسيتى بوجع جامد جدا قبل ما توصل للانابيب يا قلبى .. يعنى بإختصار انا بستبعد قصه الالتهابات انها تكون سبب فى انسداد الانبوب .. ومش عايزاكى تتوهمى ولا توهمى عقلك انها الالتهابات..اتفقنا؟ وانا معاكى انك لو هتعيدى الاشعه يبقى تعيديها فى مصر افضل لانى بصراحه عندى حاله من انعدام الثقه فى الطب بره مصر خصوصا فى دول الخليج وكفايه اللى حصل لك فى الاشعه دى مفيش داعى لتكرار الالم وكمان ما تطلعيش بنتيجه موثوق فيها صح ولا لا .. فا اى حاجه تسمعيها وتستغربيها من الدكاترة هناك فوتيها لحد ما ترجعى مصر (مع احترامى لجمع اطباء الخليج طبعا :cool: ).. فا انسى كده قصه اشعه الصبغه تانى وسيبى النقطه دى لحد ما تنزلى مصر ودكتور عادل ساعتها يبقى يحكم بنفسه ان كان لابد تعيديها ولا لا وان كانت الاشعه دى مظبوطه ولا لا .. وانا عندى احساس ان كل اللخبطه اللى انتى فيها دى هتصفصف على حاجه بسيطه جدا وتتعالج بسرعه بأمر الله ماتقلقيش خالص بالنسبه لقصه الخلطات فا انا ليا فيها قول .. انا مبقتنعش بأى من الخلطات اللى بيكتبوها البنات فى المنتدى هنا .. مع انى كنت بشجعها جدا فى البدايه وكانت اول مرة اشوف بنات بيشكروا فيها وانها جابت معاهم نتيجه ومش عارف ايه واكتشفت بعد كده ان كل ده وهم ولما بقيت اقرأ اكتر فى المنتدى لقيت ناس اخدوا اعشاب عن جهل وللأسف بوظت لهم الدنيا ودخلوا فى المنتدى وحذروا من الخلطات لكن للاسف ناس كتير مقتنعين بيها .. فا بعدت خالص وحمدت ربنا انى ما عكتش .. وقلت لنفسى خلينى فى اللى اعرفه احسن انا مش ناقصه بوظان كفايه اللى احنا فيه فا بلاش اجازف واخد حاجه معرفش نتيجتها معايا هتكون ايه .. برغم ان الاعشاب فى حد ذاتها علاج آمن وانا مش بنكر ده لكن خلط الاعشاب على بعضها هو اللى مش صح طبيا .. وكمان مش بفضل انى اخد اعشاب وخلطات من دماغى لانى مش خبيرة فيها .. طبعا انا بستثنى من كلامى ده العسل الابيض وحبه البركه وحاجه كمان هى عين الجمل ودول لانها حاجات لو اخدتيها مش هتأثر عليكى بالسلب ابداااااا واعتقد ان الخليجيات بيلجأوا يا عينى للخلطات دى لانهم مش لاقيين اطباء كويسين يحلوا لهم مشاكلهم الصحيه فا بيدوروا على اى قشايه يتعلقوا بيها والقشايه دى هى الخلطات والتمريخ وخلافه علشان كده تلاقى عندك فى الكويت موضوع الخلطات ليه شعبيه جامده بس كله بيكون وهم حقيقى .. ولو نويتى تاخدى خلطات يبقى ارجوكى ليا طلب عندك .. اعملى سيرش عليها فى الانترنت الاول وعلى مكوناتها وايه اثارها وايه مميزاتها واعرفى الاول قبل ما تاخديها بالنسبه للتحاليل اللى المفروض تعمليها اشتقت اليك حبيبه قلبى ردت عليكى بكللللل حاجه ضروريه تعمليها يا بوبا انا شايفه انك عملتى تحليلين بس همه الغدة الدرقيه وتحليل البروجيستيرون طيب فين باقى التحاليل اللى قالت لك عليها اشتقت اليك ؟؟ ال( ال اتس )و ال( اف اس اتش) و(البرولاكتين) .. (وخلى بالك ان الاتنين الاولانيين همه اللى بيبينوا التكيس) وبعدين لاحظى حاجه مهمه جدااا ان التحليل الواحد بيختلف من شهر لشهر يا امى يعنى ما تعتمديش على نتايج تحاليل انتى عملتيها من فتره فاتت لا لازم تتابعى اول بأول التطور بتاع هرموناتك من خلال التحاليل دى .. وفى معلومه بخصوص الاندومتريوزيس هى ان المرض ده مش بيبان من اى تحاليل لا ده بيبان بالمنظار وده انا سمعته اكتر من مرة من دكتور عادل فى البرنامج بتاعه وبرده انتى ممكن تتأكدى منه شخصيا .. وبعدين قصه السونار والبويضات دى لخبطتنى خالص يا حبيبتى واعتقد انها عامله لك ربكه لانها كل مرة بشكل وكل مرة فى مكان وكل مرة مع دكتور شكل وده مش صح خالص .. بصى بقه انا لو مكانك هقول تبتدى من جديد الكام شهر اللى فاضلين لك دول قبل ما تنزلى مصر واول حاجه تعمليها انك تستخيرى على اى مكان هتروحى له واى دكتور هتروحى تتابعى معاه وتسألى كويس على دكتور شاطر وان شاء الله ربنا هيسخر لك احسن دكتور علشان تتابعى معاه .. تانى حاجه هى انك ترمى اللخبطه دى ورا ضهرك وتقولى له انك مش عارفه عندك ايه وعايزة تبتدى معاه وتعملى معاه كل حاجه علشان تعرفى راسك من رجلك وعلشان ترتاحى من لخبطه السونار دى وتبدأى معاه بالتحاليل وبعدين متابعه التبويض وتشوفى فى النهايه ايه رأيه وبعدين لما نشوف ايه رأيه نحدد على اساسه هنعمل ايه خلاص ؟ وفى نفس الوقت ده لما تسمعى رد الدكتور اللى عندك تعرضيه على دكتور عادل وتعرضى عليه كمان نتايج التحاليل علشان يقللك ان كان الطبيب ده كلامه مظبوط ولا لا ولو كلام عادل بيوثق كلام الدكتور اللى عندك يبقى خلاص امشى مع اللى عندك لحد ما تنزلى مصر المهم انه يكون كويس علشان مش يبوظ لك حاجه لا احنا عايزين نتابع مع حد كويس علشان يوفر عليكى الحاجات اللى هتعمليها فى مصر خصوصا ان وقتك هنا قليل وكمان ممكن يديكى علاج يوفر المشوار على دكتور عادل وتبقى كده كسبتى وقت فى العلاج الصح وانتى عندك انا طبعا رغيت اكتر من اللازم بس معلش انا حاسه بالدوخه اللى انتى فيها دى وكان لازم نفكر سوا هنعمل ايه :33:

السلام عليكم ورحمه الله وبركاته بوبا حبيبتى .. بصى يا بوبى انا تهت وسط الكلام الكتييييير...