بلنسيا

بلنسيا @blnsya

محررة برونزية

ويسولفها علي عادي

الأسرة والمجتمع

السلام عليكم ورحمة الله وبركاته
المشكلة عن زوجي كاالعادة
يابنات صديق زوجي رجال مسفرجي وعنده خير ولاينجب متزوج من 10 سنوات ولكن ما الله كتبله ذرية
هذا الرجال ملاحظة تصرفاته من اول زواجي مو مضبوطة 
كذا من الله مارتحت له وزيادة موقف بدر منه خلاني انقد على تصرفاته انه انسان مو ملتزم
كنا رايحين نتمشى بالبحرين ووصانا على مطعم وتفاجئت ان المطعم فيه رقاصه وغناء وخمر
هو مو ديسكو لا ارقى شوي بس كمان مو مطعم طبيعي في دولة خليجيه 
وكل المطعم اللهم يا حافظ شيبان الله يستر عليهم ورافعين الكاس ورقص وهم بالطاولة
من شفت ذا الموقف تقززت وطلعت ولا كملت 
زوجي استغرب قال غريبه خويي يقول اذا جينا هنا لازم المطعم هذا انا وزوجتي من أساسياتنا لازم نستانس فيه
قلت وانت معجبك!!
قال لا انا بس مستغرب كيف يروحون هاالاماكن ..
وبصراحه زوجي واعرفه يابنات والله لو ساكته وماهتميت وجلست بالمطعم يمكن جلس وكمل السهره وعادي مااهتم بس شاف ردت فعلي كانت قويه وخاف وقال اللي قاله
 لانه خويه معلمه عن المطعم
المهم من هنا صرت اخاف من خويه هذا واحس مهو سهل 
انقطع عنه سنه تقريبا ورتحت نفسيا حتى زوجي قلل سفر معه 
بعدها رجع يابنات ولا متزوج من بلد عربي 
رجع هنا وجلست زوجته فتره ورجعت البلدها
والظاهر طلقها 
قالي زوجي بكل برود انه كلمها وقالها خلاص فلان طلقك ابتعدي عنه مايبيك مارتاح معاك
وهي على كلام زوجي انه متمسكه بخويه
وقالت انت شدخلك فينا انا ابيه وين رقمه ليش اللغاه
الحين مو هنا الحكاية
يابنات انا ابي افهم سي سيد المنقذ زورو سوبر مان بات مات بقي احد من الابطال ماذكرته
وششششش دخله يكلمها وش يبي فيها 
لا ومن وساعه الوجه يعلمني وش قالها ووش قالتله
قلت يا فلان خويك وطلقها وغير رقمه وانتهى منها ولا يدري عنها انت الحين وش دخلك تكلمها وش تبي فيها ابي افهم يعني زوج وزوجته تطلقو وخلصنا انت وش مدخلك بينهم 
قال يووووه ياغبيني صدق خبل دخلنا بالتحقيق ليش وكيف وماذا انا وشوله اعلمك اني كلمتها انا خبل
قلت ايه بعرف يحقلي وحده تكلم زوجي وش تبيني اسوي
قال حنا نبي نأدبها ونخليها تقطع الامل منه لانه مزعجته وتدور رقمه وتبيه وعشان كذا عطانا رقمها نتفاهم معها 
اسكت غصبن عني وطلعت وتركته
وانا اتحسب على خويه اللي مورطنا بمشاكله 
يتزوج ويورطنا حسبي الله عليههم 
وزوجي الله يبعده عنه بعزة قدير يارب 
زوجي مشكلته لقافته ملقوووووف ودايم يتدخل واعرف ان الرجال خويه ماهو ساحبة بالغصب وقاله هذا رقم طليقتي تصرفو معها ادري ان زوجي تليقف وقال هات رقمها افكك منها 
انا مقهوره بقوووه
ودي اقوله لاعاد تكلمها واخاف يقول زي كلامه اللي فوق انا غبي اللي افتح لك قلبي وانا غبي اللي اعلمك ولا يبدا يكلمها من وراي وانا مدري
عجزت اتقبل الوضع انه يسولف لي عنها عادي ويبيني اسمع واعطيه حلول
ويقولي انتبهي منها ترى يمكن تعرف رقمك وتدق عليك وتهبل فيك لا تصدقينها
قلت كيف تعرف رقمي قال مدري بس قالت اذا ماعطيتني زوجي بخرب بيتك مع حرمتك وبقولها كلام يخرب حياتك
يقول جلست اضحك من وين بتحصل رقمك بس قلت ولو الحرص واجب اعلمك 
وسوالفه عنها بقولكم 
مثال اليوم يقولي قالتله
انت بليس بعينه تفرقني عن زوجي انا ابي رقم زوجي عطيني اياه
ويقولي اقولها زووجك غير رقمه لانه مايبيك انسيه 
ويقولي انه سوى حظر الرقمها عشان ماتدق عليه وقامت تدق من رقم ثاني وتقوله ابي زوجي وعطني رقمه
هذا كلامه عنها 
انا بصراحه متضايقه من ها الوضع 
هو صداقته مع خويه صداقة طفوله
ويعرفون اهل خويه يعني صداقه قديمه لها عمر 
مدري كيف اتصرف 
وادري زوجي بعد له نصيب من المشكله لانه مجاري 
تعبت نفسيا مدري وش اسوي هاالشي مو طبيعي ابدا 
اخاف يشبك معها الحين و زوجي راكبة بليس يقول مانيب حاذف رقمها لما اطيح اللي براسي واللعن خير خيرها ها الكلبه 
لانها زياده على كذا نسيت اخبركم نقطه
ناصبه على خوية واخذه منه مبلغ 50 الف على ان امها مريضه وبيزرعون لها كلى وطلعت السالفه نصب ولهفو الفلوس ومن بعدها طلقها خويه وزوجي قام يكلمها على اساس بيأدبها ولا بيشبكها الله اعلم 
قرررفت عيشتي استغفرالله مقدر اصبر على هاالوضع 
8
2K

يلزم عليك تسجيل الدخول أولًا لكتابة تعليق.

تسجيل دخول

شفته بفرح
شفته بفرح
الله يكفيكم شره
اكثري الأدعية مثل
اللهم إجعل بين زوجي وأصحاب السوء سدا
اللهم إصرفه عنا على خير واكفينا شره
لا حول ولا قوة إلا بالله
غلاهم2011
غلاهم2011
قلي غير رقمك وخوفيه قلي يمكن تعملك عمل تخرب حياااتك المهم لا تنفرينه منك وف نفس الوقت لا تتساهلين بالموضوع الله يسخر قلبه لك ويصلحه
Don't Care
Don't Care
ما ادري ليه حسيت وضع زوجك مو طبيعي مع هالإنسانه


وسالفة انه ينبهك منها لو اتصلت مادخلت دماغي أخاف يكون مصاحبها و اخذت رقمك من تليفونه ( اقول احتمال )


لو قدرتي خذي رقمها و تكلمي معها و حاولي تسحبيها في الكلام وانتبهي تلاحظ انك مقهوره منها خليها تحس انك زعلتي عشانها بسبب الطلاق


على فكره المطعم اللي في البحرين تصورت انه صديق زوجك يروح وقت الغدا اكيد ما حيكون وقتها في غناء و رقص والله اعلم
بلنسيا
بلنسيا
عنده رقم مميز فرحان فيه تبين يغيره عشانها 
مستحيل واساسا معجبه الوضع قاعد على كلامه يطقطق عليها
انا طفشت من ذا الوضع ماتحمل وهو بايعها يقول انا لو حالس اغازلها واعاكسها كان قلت بعذرك تزعلين
بس اتهاوش معها واتلاعن ليش متضايقه كلها فتره واطيح اللي براسي واتركها 

وانا كل خوفي انه يكون أولها ملاعن ومهاوش واخرتها ياحبيبتي وياقلبي ومو بعيده تلهف خمسين الف ثانيه 
مررره متضايقه وعجزت انام وبس افكر 
قلبي ينبض لله
قلبي ينبض لله
امسحي رقمها من جوال زوجك واستودعي الله زوجك