السلام عليكم ورحمة الله وبركاتة
كل عام وانتم بخير
يا هلاوين ومسهلتين ومرحبتين بكم كلكم
الليلة بعلمكم بسالفتي مو تضحكون او تطنزون فيني اوعدوني اول شي
عشان اقولة امزح عليكم بس والله من الحرة الي فيني
بقولها ماأدري ليش اقولها لكم اعتبروها فضفضة او سالفة عابرة مثلا
انتم خواتي وبسولفلكم
اليوم طلعنا ورجعنا وانا نفسي بخشمي وواصلة حدي وزهقانة واحس اني ببكي اي والله ببكي قهر على شاهي الجمر الله يجعلة اكبر همومي
خل اقولكم من البداية
هذا يا طويلات العمر والسلامة
قبل الطلعة هذة بيوم وبالأحرى من قبل العيد ناوين نطلع شوي على
خير
المهم جهزت للطلعة المنحوسة قبلها بيوم
وانا فرحانة تعرفون ايام البراد وناسة الطلعة بالنهار
المهم مالكم بالطويلة
اتفقنا نحن العائلة وعلى رأسهم زوجي المحروس
على انة نطلع على الظهر
وانا اقوم من بدري
واكمل تجهيز واصحي عيالي وافطرهم
واروح ابصحي ابو الشباب ويقول شوي بنام
واروح
وارجعلة ويقول شوي بنام
واروح وارجعلة ويقول
اكيد تدرون نفس الي قالي قبل
وعلى هالحال
وقام الظهر قلت الحمدلله
وانا مجهزة القهوة واتخيل اني قاعدة اتقهوى بالجو العليل
ويوم شفته قلتلة ها يالة جاهزين
الا يوم تجيني الصدمة الأولى قال بفطر قلت نفطر برى وحدة متحمسة
قال اقول اركدي وجيبي الفطور
واروح اجيب الفطور وانا براطمي واصلة خشمي ادري اني بتنكد
اليوم وهم يفطرون وانا والله ميتة جوع ولا افطرت معهم
كله عشان افطر بالجو العليل
المهم قعدو ساعة الين خلصوا قلت جاء الفرج
الا قال بياخذ دش اه ياقلبي ساعتن اخرى انتظر وخلال هالساعة
وادخل المطبخ واصك الباب وافطر تقل حرامي
مرة اكل ومرة ابربر والشغالة كل ما بربرت تناظرتحسبني اكلمها مستغربة كأن بنفسةتقول المدام خبلة الله يخلف علية
وبعد ما خلص قال بيروح مشوار اه ياقلبي قلباة قضى على ماتبقى منة
الحين تدرون اي وقت العصر
يعني راح النهار يعني تخيلاتي الي من امس راحت بخبر كانا
انا والزمن في سباق انتظر وانتظر وانتظر وانا خلاص انتهيت واحلامي
وانا اشرب القهوة بالجو العليل انتهت على وشك المغيب
الا يوم يدق قبل المغرب بنص ساعة تقريبا لكن انتبهوا ماجات الحظة هذة الا وانا عايفتة الطلعة حسيت انها طلعت من عيني مو من قلبي بس وقالنا اطلعوا
وحنا في سباق يانلحق على الشمس ولا مانلحق
المهم طلعنا
ويوم وقفنا بمكانا اذن المغرب ها الحمدلله شفت الشمس بالطريق
وفرشنا وجلسنا وطول الجلسة تخيلو ما تكلمت ولا سولفت
من الحسرة على الشمس يوم غابت
وطول الجلسة بس يناديني ياخطيرة
ويقول لعيالي امكم الخطيرة وانا والله حزينة على الجو العليل الي راح ولا شربت قهوتي عندة ما أدري حنا بشقة اطلع بدريشتي
اتقهوى عشان اشوف الجو العليل
المهم ابو الشباب شب النار وعيالي ساعدو ابوهم وجابو الحجر مستانسين
ويشوي غدانا مادري عشانا
ويوم يشوي اول دفعة الا ويحطة بصحن قدامي وياخذ هذاك الضلع المشوي
وياكلة قدامي ويطلع اصوات من لذة الطعم ويقولي ذوقي وانا يعنني
واقول بستنى العشاء مرة وحدة
ويقول بكيفك وانا سعابيلي تقوطر يوم اشوفة وتجيتي ضحكة واعض على
شفايفي لا
والا يدير ظهرة ويكمل شوي وانا والتفت على باقي الضلوع ولا قدرت اصبر واقضي على الباقي واخليهاعظم واحطها
ولا كاني سويت شي
وشوى وخلصنا وجهزنا السفرة وحط الصحن وانا انتضر الصدمة بعيونة
على احر من الجمر وفيني الضحكة
وانتظر وانتظر عكس انتظاري الاول هنا ابشوف الصدمة على وجهه
ويوم فتح القصدير الا واشوف عيونة تفتح وتسكر مو مستوعب وين الضلوع واحس ان عيونة نقزت بوسط الصحن من الصدمة
ال ويقول وين الضلوع كليتيها وانا اهز راسي بنعم كليتها انا
ويقول هذة الزعلانة وتقول ما أبغى وشلوت لو انتي مو زعلانة
المهم وتعشينا وشبعنا الحمدلله والشكر
والي قام يغسل والي يمشي
وانا اشوف الجمر المولع يغري قلت بسوي شاهي ع الجمر نعدل المزاج واتميلح لأبو الشباب
واحط الأبريق ع الجمر
الا يوم جو العيال وابوهم ويناديني يا وضحى ياوضحى
يقالنا مسلسل بدوي
وفجئة من دون سابق انذار وزوجي المصون وهو واقف يفتح باب السيارة
الا و زر الباب مكسور والادهى ان الثاني من اول مكسور يعني البابين
الي ورى ما تفتح
يعني باقي الاكشن من الحلقة والأثارة
هنا ياحبايبي بدت شياطين زوجي تناقز عند خشمة و يطلق علينا وابل من السيل ما أدري تنقال كذا
ونتلقى من الشتائم والصدمات كلمة تلوى الأخرى
وقشينا عفشنا وحطيناة بالسيارة
وانا في هول وصدمة
وبما ان البابين الخلفية خربانة وش معناتة
ان عيالنا ينقزون ورى وانا والشغالة قدام
طبعا ما تقدر تنقز ورى قدام خلق الله
ورجعنا البيت لا شاهي جمر ولا تقهويت بالجو العليل
وحنا في حال مزري مضحك ماأدري وش اقول
وانتهت رحلتنا العجيبة
والي عندها رحلة مثل رحلاتنا
تنطحة هنا
خلنا نواسي بعض ونضحك
وسلامتكم
* اسطوره انثى * @astorh_anth
محررة فضية
يلزم عليك تسجيل الدخول أولًا لكتابة تعليق.
خخخخخخخخخخخخخخخخخخخخخخخ
تصير في أحسن العائلات ويبقى في الاخير يبقى حب امي وابوي ثم الوطن
تصير في أحسن العائلات ويبقى في الاخير يبقى حب امي وابوي ثم الوطن
الصفحة الأخيرة
ههههههههههههههههه
ملحوقه يا بنت الناس
تو الشتاء باوله
:26: