و الله يا اصحاب ..ايامكم ما انساها

يابنات النوم مو راضي يجيني ..؟


جالسه افكر في صحباتي ايام الدراسه ..

الابتدائي...

والمريول الازرق ..
ايام ماكنا نلعب عسكري حرامي ..
وحشتوني..وين ذيك الايام لما نوقف بالطوابير عشان نشتري
الفطور ..البريك والسمبوسه ...
ايام اذاعه الصباح الله كنا ننشد سوا ونمثل سوا ..
ااااه يامحلا ذيك الايام ..ليتها ترجع ايام الطفوله
والبراءه ..ايام الصدق والعفويه ..

المتوسط ...

المريون الوردي ..تذكرون يوم كنت اسوي ندوات لكم ..(على بالي شيخ)..
تذكرون ابله وفاء وابله حسن ...
تذكرون يوم وفاة اخويا كيف كنتو حواليا ...
وين ذيك الايام ..والله وحشتوني ..
تذكرون جلستنا عند المقصف ..سواليفنا ..حكاوينا ..
خواطرنا ..احلامنا الورديه ..

الثانوي ...

المريول الاصفر ولازم الياقه بيضاء ..والجزمه بيضاء
وياويل اللي يخالف يتهزئ قدام الكل ..
تذكرون يوم كنا نشرد من حصه العربي ...وننزل الساحه
نتمشى واذا شفنا زول ابله اتخبينا عنها ..رغم شقاوتنا
الا اننا كنا علمي ماشاء الله ..وقت الاختبارات مجتهدات ..
تذكرون ابله سهى وابله ملكه الله عليها هالابله اسم على
مسمى مره طيبه كنا نحس انها امنا ..الله يسعدها دنيا واخره
ايام الاختبارات كنا نجلس تحت الشجره ..الاماكن ..اه يالاماكن
اتفرقنا وكل وحده راحت كليه واختارت تخصص..

رحنا الكليه ..

ايام الفله ..ايام الالوان ..ايام الخامات ..وروحات المكتبات ..
الله يذكرك بالخير يابويا كان اوقات ينتظر الين الساعه 4 عشان عندي محاظره ..الله يطول بعمرك ويخليك لي تعبتك كثير معايا..
كنت من اوائل البنات اللي يدخلو المحاظرات ..
انا وصحباتي كنا نجلس قدام ..
ودرجاتنا دايما مرتفعه ..اتذكر مره صحبتي جلست تبكي عشان
كانت ناقصه كم درجه وجلسنا على الدرج هي تبكي وانا اهدييها ...
وينك يادكتوره فاطمه والله وحشتيني ..
وين جلساتنا جمعاتنا ..تذكرون كنت اجيب الشاهي ونجلس سوا نشربه ..ونشتري فطور واوقات نجيب من البيت ..
و اخر الدوام ..تقولون بكره لاتنسي الشاهي جيبه ..
وين رانيا ونوره ونشوى ....
وحشتوني ..
ودي اعرف اخباركم ..وين ايامكم ..كيف حياتكم ..
من تزوج ..من كمل دراسه ..من توظف ..
عندكم عيال..ايش سمتوهم ..
وحشتني سواليفكم ..وحشتني ضحكاتكم ..



وين ايامنا وين ؟؟وين قضيناها ؟؟

راحت في غمضة عين ..ياما حلا ذكراها

ابكي على الاحباب ..دمعي على الخدين

و الله يا اصحاب ..ايامكم ما انساها


صحباتي احبكم في الله ..ومااشيل في قلبي لكم الا محبه
ذكرى ..ووفاء ..
جوى الحب ..



اعذروني ..قد يكون الكلام غير منسق ..بس مدري حسيت اني لازم اكتب وافضفض
اتمنا تتقبلو ذكرياتي وحنيني وشوقي بصدر رحب ..