يااارب تتفركش خطوبة اختي ... تكفون ساعدوني/ استوفى الرد

بسم الله الرحمن الرحيم

بنات تكفون أبغى رأيكم وحكمتكم .،

أختي عمرها 19 في اول سنة من الجامعة تقدم لها واحد صراحة انعم وأكرم يعني مثله لا يمكن ينرد و عمره 27 لكن المشكلة انه متزوج و زود ماله الا 3 سنوات متزوج و زوجته عمرها 24 ، طبعا لما تقدم أبوي رفضه بأسلوب لطيف ، فقال انا أسبابي للزواج قوية و زوجتي هي اللي مختارة بنتك لي ، وأتمنى تفكرون في الموضوع ، وقال اسم زوجته لأبوي
لما قال لأختي سارت زوجته مع أختي مشرفة شبكات. وتشرف على قاعة أختي
بصراحة انا وأمي رافضين الفكرة جملة وتفصيلا
هي توها صغيرة ، و حنا وضعنا المالي و الإجتماعي والنفسي مستقر ، يعني ما فيه اي سبب يخلي أختي تاخذه
بس المشكلة أختي اعجبها الرجال وأكثر شي اعجبها فيه دينه ( هو طالب علم و يسوي دروس وحافظ متون كثيرة ما شاء الله ) وأختي تتمنى رجال زي كذا
وأختي فيها طبع حلو ومو حلو في نفس الوقت اللي هو انها تحسن الظن بالناس بشكل مو طبيعي ودائم تقول حديث الرسول ( التمس لأخيك المسلم سبعين عذرا )
المهم راحت أختي لم زوجته في الجامعة وقالت لها ان فلان تقدم لي وانه يقول انك انت اللي خطبتي له ، قالت صحيح واخترتك انت لأن قلبك طيب وماراح تسير بيننا مشاكل ، والسبب اللي بيخليه تتزوج انها اول زواجهم جاها ورم ليفي في الرحم وانفجر وجاها نزيف حاد و اطروا يشلون رحمها
يعني زوجها بيتزوج عشان العيال
وقالت لأختي ما ابي اي احد في الجامعة يدري انه هو زوجي
ولو سأل احد قولي تشابه اسماء
وهو دق على أبوي وقاله ان راح يسكن كل وحده في بيت و انه راح يعدل وكذا
بس أبوي يقول احس في كلامة انه يحب زوجته من قلبه
وزوجته صراحة أحلى من اختي
اختي مو شينة لا الحمدلله بس ذيك أطول وأحلى جسم و وجهها ما يبين عليه ان عمرها 24

المشكلة الحين ان اختي مره تبيه وعاجبها و ماعندها مشكلة فيه
وانا وأمي مره ما نبيه حنا متزوجات ونفهم زين كيف شعور الوحدة اذا تشارك زوجها مع غيرها
خصوصا انه يحب زوجته الأولى و ياخوفي يخلي اختي بس للتفريخ والحب كله لذيك
غير انها صغيرة يعني توها بيجيها ان شاء الله أحسن منه
بس أبدا مو مقتنعه
وابوي مو مرتاح بس يقول دامها تبيه وهو والنعم ليه أوقفها دام اللي تسويه مو حرام

أنتم يا بنات ايش رأيكم ؟؟؟؟
والله أني بس ادعي ان ربي يصرفه عنها وأمي مره ضايق صدرها
أبوي معطي اختي فترة أسبوعين عشان تفكر في الموضوع قبل ما يرد على الرجال
كيف أقنعها تشيل الفكرة من رأسها ؟؟؟؟