يااارب ترزق كُل من ترد فوق ما تتمنى ـ قصتي مع زوجي لسى ما انتهت

السلام عليكم

أدري قرقت عليكم بقصتي كتير لكن بجد احتاج لو كلمة تصبرني لأني تعبت
سبق وكتبت ليكم قصتي مع زوجي وكيف انو كان متضايق كتير من حملي وهذا الرابط

http://forum.hawaaworld.com/showthread.php?t=2906816

أنا الآن تبين لي انو اللي في بطني بنت ولما عرف زوجي تضايق كتير ورجع لسالفة انو المفروض اجلتي الحمل.
كتير كانوا يقولوا الخطأ منو هوا ليه ماخبّرك قبل الحمل ـ أنا بقول انو هو قال خاطروا الحمل ما يكون الا بعدين بس كان في عرض الحديث ماكان يقولوا ليا تنبيه وغير كدا انا كان معايا تكيّس فكنت شايلة من بالي انو فيه امل احمل هادي الفترة خصوصاً إني ماعالجت

الآن زوجي متضايق اني حامل ببنت يقول البنت مو مثل الولد الولد سند لكن البنت تشيل همّها لحد ماتتزوج
وبعد ما يقرق على راسي يقول قدر الله والحمدلله << طب بعد ايش تقولها ! بعد ما تقهرني بالكلام !
حاولت احببو في البنت بس مو متقبل ابد يقول هادي بنتك انتِ ويحلف انو مالوا خاطر فيها ابد ومجرد التفكير فيها يضيق صدرو
انا بجد كنت اتمنى اكون زي غيري افرح بحملي الأول ويفرح معايا زوجي خصوصاً انو اختي لساتها والد قبل كم شهر واشوفها هيّا وزوجها كيف مبسوطين وكيف زوجها طاير من الفرح بجد حاسة بنكد وبس ابكي
يقول ليا انا ماعليا من حملك هادا راح ادفع مصاريف المستشفى وبس غيرو لا تنتظري مني شي - قصدو لا تنتظري اي اهتمام او سؤال - ويزن عليّا انك أصلاً بتتغيري حتى في الشغلات الخاصة وتتوسعي - اتوقع تفهموا قصدو :(
يعني صرت خايفة من كل شي جاي لا الولادة ولا حياتي معاه

الحاجة التانية انا كنت مكتمة عن نوع الجنين ماخبرت غير أمي واخواتي وحرّصتهم ما يطلع الخبر لكن وحده من اخواتي الله يهديها خبرت جدتي وجدتي ماقصرت ما بقى احد داخل وبرا العيلة ماقالتلوا
حتى اللي كانوا يخبوا عننا نوع الجنين في حملاتهم صاروا يتصلوا يخبرونا انهم عارفين

يعني لاتهنيت بفرحة ولا بمفاجأة - لو كانت أصلاً مفاجأة -

حاسة باكتئاب وماني متحمسة لجية المولودة حاسة كُل شي جاي معاها نكد - استغفر الله العظيم -

.