ياام محمد ادخلي قرة عينتس بوليدتس واي وحده هياها ترفع الموضوع

صباح الخير


مالي بالمقدمات
ورجاء يالمشرفات ترى اول مره اطلبكم الموضوع انساني لا تنقلونه وياليت يكون في كل المنتدى
واي وحده من الاخوات تدخل وتدعي الله يعافيها تكتب دعائها عشان الموضوع يرفع او على الاقل تكتب رفع



امس العصر الساعه 3 ونص تقريبا صلينا العصر انا وامي واخوي وطلعنا لسوق واحنا في حي الجزيره في الرياض واللي تعرف الحي تدري ان جيرانا الفيحاء وهذا المهم
وكنا بنطلع من الجزيره على طريق عبيده بن الجراح امتداد مخرج 16 والطريق سريع
الا ذاك الولد بالسيكل على الطريق جلس اخوي يضرب له عشان يرقى على الرصيف والولد وقف في الشارع العام واخوي يضرب والولد يناظر فينا
انا هنا وقف قلبي قلت لاخوي الولد موب طبيعي ومشى الولد بالسيكل واخوي كان وراه ومشغل الفلشر ومهدي عشان السيارات لا تدعسه بسم الله عليه
الولد التفت وشافنا وراه راح لسيد الثاني والسيد الايسر لسيارت المسرعه وماادراك مالسرعه في الرياض
انا هنا انهبلت بغيت انزل من السياره
وجلس اخوي يحاول يسد عنه السيارت وانا اقوله خذه خذه والولد موب مستوعب الخطر الحمد الله فيه سياره كانت متعطله وتسحبها سياره ثانيه هذي ورانا قلت لاخوي هم ورانا وانت اسقط عليه وامسكه سوينا الحركه ونزل اخوي في نص الشارع العام
والولد يوم شافنا امي في هالحظه لمت راسها وانا اسمي واستودعهم الله اخوي والولد لان كلهم في نص الشارع
ماتتصورون الموقف وانا اكتب الحين اصيح والسيارت مسرعه وتضرب اخوي جلس ياشر لسيارات لان الولد وقف في نص الشارع وانا اتذكر ان معي حلاو واطلع كل اللي في الشنطه واطلع فلوس واشر للولد عشان الفت انتباهه واخوي يقدر يمسكه الحمد الله السياره الثانيه ساعدتنا شوي صارت تحد الولد مسكناه الولد يوم شاف الحلاو ذب السيكل وجاء يركض مسكته وركبته
وقعدت اسمي عليه واعرف وش اسمه
اول ما سألت قال انور جلسنا ندور في حي الجزيره ونسأل عنه البقالات قلنا يمكن يعرفونه وكل من شافه قال لا
وحولنا حديقه اللي فيها ممشى قال اخوي يمكن ان اهله هناك والولد عنده صعوبات تعلم اتوقع لان ماعرف اسمه وهو عمره يمكن 9 او 10 سنين الله يشفيه ويقر عين اهله به و يخليه لهم
ومالقينا احد في الحديقه هو شاف الالعاب نزل يلعب وجلس اخوي عنده
واحنا الحين مالنا الا نبلغ ودقينا على الشرطه وكلها خمس دقايق ويجون والولد يلعب يوم جاء الشرطي انهبل الولد جاء لمي يركض ويبي يركب اخذته وسميت عليه وجلسته عندي هو يقول شرطي شرطي المهم الشرطه قالوا لازم ناخذه للقسم والولد منهبل وانا معيه لان الولد مايستوعب اللي حوله وهو صحته زينه وانا مااضمن احد

طلب اخوي انه يكون عندنا وياخذون معلوماتنا بس الشرطي رفض لان فيها مسأله واخر حل توصلنا له قلنا بنروح احنا للقسم وانا بصير مع الولد لاين يجي احد
وانا طول الوقت اردد دعاء الضاله وان الله يجمعنا باهله

ورحنا للقسم واحنا في الطريق جاهم بلاغ عن ولد ضايع وجلسنا نعطيهم الاوصاف واول انا كنا ندور في الفيحاء والجزيره والولد ياشر لاني اسئله عن بيتهم وكان عادي معي بس يوم رحنا للمنار والولد متغير لانه يشوف الشارع وشكله خاف او ان المكان غريب عليه واول كان حاضني بس اي مدري وش جاه تغير وخاف مره وبعد عني وانا احاول اهديه واقرى عليه واعطيه حلاو لانه مره كان خايف ومتروعو عطشان ياعمري لدرجه اني اساله تبي مويه مايرد ويوم عطيته صار يشرب يشرب بشكل يقطع القلب

الولد كان يردد اسم معاذ وانور ومشاري وكل ماسالته عن اسمه قالي معاذ ومره انور ومره مشاري وبعدين رحنا للقسم وانتظرنا احنا في السياره والولد معي
وجتنا سياره وقفت قدامنا جيب لكزس ابيض ونزل منها واحد شاب لابس قميص اسود والولد ابيض وصال الولد اللي معي يناضر فيه بقوه لان الشاب مره من عندنا وطبعا ماانتبه لان السياره مضلله والولد اللي معي يناضر بقوه لدرجه بغى يطلع من الدريشه انا هنا قلت شكله هم اهله لان من قبل كان يمرون ناس ولا ينتبه لهم كذا
وبعد ماتعدانا الشاب الولد اللي معي بينط للمرتبه اللي ورى عشان الشاب وجلس يقول فوزان فوزان
انا هنا بغيت انزل وصار هو خاله سلم عليه اخوي واخذو ه مننا وهو يلم في خاله وخايف من الشرطه
واللي عرفناه من الخال ان اسمه محمد ماصار لا انور ولا معاذ ولا مشار ي مدري يمكن اخوانه او اخواله


انا كتبت كل التفاصيل
يمكن احد يعرفهم ابي اتطمن عن الام لان الاخو يقول انها حامل ومنهاره والله يلوم اللي يلومها
وجلس اخوي يقول ليش ماقفلتوا الباب الولد بغى يندعس
قال احنا بيتنا كبير واولادهم كثير ماشاء الله وهو كان عند اخواله لان الام في البيت تقفل الباب

بس الحمد الله اننا احنا اللي لقيناه ماجا احد وخذه والله العالم وش بيصير فيه

ابي احد منكم اذا يعرف ناس كذا او يمكن احد من اهله يقرى موضوعي ابي رقم للام او احد يطمني عنها وعن ومحمد ولدها
وبعيد المعلومات
الولد اسمه محمد فيه صعويات تعلم او منغولي الله يشفيه عمره من 9 الى 10 سنين كان لابس تي شرت سماوي وفيه ازرق والولد ابيض وصحته زينه ماشاء الله ولابس شورت ازرق

خاله اسمه فوزان اللي استلمه ومعها جيب لكزس ابيض
والولد يرد اسامي معاذ وانور ومشاري يمكن اخوانه او اخواله واخواله ساكنين في الفيحاء
انا اعرف العايله بس ماابي اذكرها وهم من القصيم

يارب يارب مثل ماجمعت محمد باهله تجمعني بامه او احد يعرفها ابي اتطمن عليها وعلى الولد

يابنات ارفعوا الموضوع الله يجزاكم خير
انا من امس مانمت افكر فر الاميمه حاولت اجيب الرقم من الاستعلامات بس ماصاروا هم
اللهم ياجامع الناس ليوم لاريب فيه اجمعني بام محمد وطمني عليها وعلى ولدها
والله يشفيه ويخليه لهم
ارفع الموضوع وادعوا اني القى الام واتطمن الله يجزاكم خير ولا يحطكم محلها او محلنا لان امس كلنا متقطعه قلوبنا لدرجة ان اهلي في البيت ابتلشوا معنا واخواتي يصيحون ويدعون