ياباهي الوشاح, ياهلا بورد الصباح ,أنت عروس من أبها الملاح؟

بسم الله الرحمن الرحيم
(بالكويتي) ألف الصلاة والسلام عليك يا حبيب الله محمد
(بالشامي)أويييييييه بالصيفيه عرسي,أويييييييييييه ما بعد عرفت راسي من رجلي,أويييييييييييه ماعندي ما عند جدتي أويييييييييييه وصلوا على خير نبي ( للللي لللللي هذي زغروووووووووووطة)
(أبهاوي)مبروك ياللي تزوج وأخذ العروسه ( طرررن طرن) أخذ العروسه وراحوا أبها الجديده
* أرحبووووا مرحبا ألف *
بنوته تحلم بأن تحيي أجمل فرح مو بأبها بل بالشرق الأوسط,وأعوذ بالله أن أقصد بذلك تبذيرأو شهرة و مفاخرة بل بميزانيه معدة من قبل لن أتجاوزها لأني أرى بأن نجاح حفلة الزواج هي بحسن الاستضافه و التنظيم من بداية استقبال المعازيم (ارحبوا عداد ماأمطرت)حتى توديعهم(الله يستر عليكم وعقبال عندكم)
بصراحه دايما المدح لحفلات المدن الرئيسه،وفعلا متوفر عندهم أكثر مننا محلات راقيه وأسعار معتدله وعندنا العكس تماما، أنا أرفض تقليد عادات الآخرين ودفن ما لدينا،وأعشق دمج كل جميل من هنا وهناك ومن ماضي مع حاضر، شعاري بهذا الموضوع لن أخرج عن ماأحل الله لنا،ثم عن عادات القبيله الأصيله مثلا في زواجات عائلتنا الحفل يبدأ المغرب, وأول شي بعد تفتيش جوالات الكاميرا ووضع العبايات, فيه ضيافه تسمى( الوصل أو الطفاة )عبارة عن أكلات شعبيه بالسمن والعسل في غاية الأصاله والجمال وبصراحه أعدادها متعب والله يعين اللي يسويها)عاد البنات يشوفون البرستيج يمنعهن ياكلون منها (اللهم لك الحمد) والحريم يحترونها طول السنه بدون أدنى مبالغة!
نادرا مايكون العشاء بوفيه ,يشوفونها سبه في حق المعازيم الله يديم النعمه!! من تمام الكرم عندنا( مفطحات وذبايح بالعشراااات ).
المطلوب يافراشات أبها:
ملف خاص فينا نناقش فيه :
1-قاعات الأفراح المحترمة( وسع_ وجمال_ وخدمه) ونوضح سعرها في موسم الصيف.
2- جهات تنسيق الحفلات ونبذة عن خدماتهم وأسعارهم وياليت عن تجربة ومعاينة
3-الجديد في طرق ضيافة طاولات المعازيم( الحلى مثلا),وأسماء المحلات اللي تجهزها
4-الحركات الخاصة(((كلنا نحب هالسؤال)))ولو ان أغلب العائلات لاتبدي اهتماما بها لكن أنا أموت في أدق التفاصيل, بالاوتوجراف/ عروض البروجكتور/العطوروالبخور/ وتوزيعات الهدايا / الملبس(أي شي او ستايل جديد شفتيه وعجبك ياليت تذكرينه
5-الزفة من طلة العروس حتى تجلس(هذي بالذات مانبي فيها حركات تثير الضحك زي ما قرأت بالمنتديات)حلاة البنت العقل فما بالكم بعروس ومستحية؟
6- أفضل (كوافير/خياطة مصممه/ ومصورة/وطقاقه)محترمه ذوق في تعاملها قبل ماتكون ذوق في شغلها


ودعونا جميعا نرفع شعار (زواجي يرضي الله أولا فيرضي به خلقه)

*ليه الموسيقى وليه مايكون دفوف فقط سواء الزفه والفرقه, لاتقولون ما يحلى, بالعكس الدفوف ومن واسع تجربه غطت على باقي الايقاعات المزعجه و المحرمه,أو تحملي أوزار جميع من سيسمعها بسببك,وأنت بليلة العمر يجب أن تدعين الله أن يوفقك ويرضى عنك فاختاري رضاه قبل رضا خلقه.
*لماذا التعري الفاضح بفستان الزفاف لماذا لم أعد أرى عروسا الا وقد كشفت الصدر والظهر والبطن ان سترته فبقماش شفااااف جدا وكامل ذراعيها وان كانت من قبل فتاه محافظه على الحشمه فأني أصعق بها بليلة زواجها, عن نفسي قد صممت لنفسي فستانا غاية في الروعه ومميزا وسترت تلك المناطق بتركيب وحدات من الدانتيل والكريستالات وأكمام منفصلة وسلاسل رائع بتجميع أفكار من موديلات متفرقة واضافات التستير من عندي (وبلا غرور أتحدى أذا ما يكون مسكككككككت أن شاء الله موتقولون بدويه ومو عايشه بالدنيا لازم نتحضر بالتعري وغالبا موديل بايخ ويكرر نفسه مليون مرة)
* أما مانتشر مؤخرا فهو الاستعانة بأي شخص آخر لأزالة شعر الجسم من العورة المحرم كشفها سواء بالطرق التقليديه أو بالليزر في العيادات دون خوف ولا حياء من الله وربما كان المختص رجلا فالحرام أكبر وأعظم’فهل تأمنين أن تكون عقوبة الله مرضا خبيثا يصيب هذه العورة جزاء كشفك لها أوأن يكون العقاب طلاقا بعد أن أبتغيت بذلك إرضاء الزوج وفتنته ؟نعوذ بالله من سوء المصير.
* الله الله بالأطفال,حرام ينطردون ابتداء من كرت الدعوة!ليه مانحتسب أجر وثواب فرحتهم حتى لو بالعصير او الشوكولاته أو بالونه,أنا بزواج بعائلتنا كنت أطلب الفرقة رقصه خاصة للاطفال وبأناشيد محببه لهم,ماتتصورون فرحتهم انه انفتح لهم مجال وأشكالهم كانت تجنن مع بض غير الأمهات يصفقوووووون لبراعهم!!والله ماشفت أنهم شوهوا الزواج بالعكس يزيد احترام الناس لكم.

ولتكن طريقة الرد على الموضوع منظمه تسهل قرائتها للجميع ,كيف؟

أتمنى من كل فراشه لديها ماتضيفه أن تكتب رقم الفقرة التي تود ان تدلي بمعلوماتها عنها كما رقمتها لكن آنفا من(1-6) مثلا أنا ببدأ باسم الله وأقول اللي عندي:

2_سمعت عن مشغل أثير بمجال التنسيق وبصراحه ما عاينت بنفسي,قالوا لي انهم بنات سعوديات عارضين عينات منسقة بالمشغل نفسه’حلوة لكن مدري عن التطبيق الميداني!

4-ناويه ان شاالله أضع طاولة استقبال أكشخ ديكورها بصالة المدخل وأحط عليها الأوتجراف وشوكولاته ,وممكن ورد طبيعي ببطاقة أكتب فيها عبارة حلوة أوشكر واللي يمر يكتب ونعطيه المقسوم ولسه كمان في راسي ألف فكرة وفكرة,وبعد العشاء طبعا طاولة العطور والعودة مع مناديل معطرة والملبس (و لكبيرات السن أحط سلة فيها ريحان لانهم يموتون فيه وعن تجربة بزواج أخوي كلهم مدحوه وطلبوا زيادة منه)
وفيه لازم أسويه ,و أنصحكم تحيونه بأفراحنا وبدون رياء,هو توزيع هدايا دينيه مغلفه بشكل لطيف مثل مصحف صغير( أشرطة كاسيت مثلا شريط أعراسنا للشيخ ابراهيم الدويش / كتيب أذكار/ فتاوى وطبعا كلها عن الافراح او موضوع مشابه يخص النساء )ونكسب ثواب باذن الله.

6-كوافير(اليجانس) منتهى الابداع شفت شغلها بعروستين واسمها (زينه) وعملت ميك اب لممثلات خليجيات بفرحهم/ وفي الخياط مشغل( دارنا) والظاهر تغير اسمه /الطقاقات نجود-وسمعت عن فرقة اسمها( رعد الجنوب) لكن ماحضرت لها اللي تعرف منكم تفيد وتستفيد!
والله ولي التوفيق.