يابنات إذا تسلف منك أنسان ولا رد السلف ,, وش تسوين ؟؟ أبغه نصيحتكم الله يوفقكم

السلام عليكم ياحلوين


يابنات طحت برفيقتين .. والغريبة كلهم ماعليهم ماديا .. والأولى ملتزمة مرة ,, الثانية أقل منها ..
بس عقل وأخلاق أحسبهم كذلك ولا أزكيهم ,,
الأولى يابنات من كم سنة تسلفت مني مقدار بسيط وأعطيتها بكل رضى وسماحة نفس وشوي وودي أعطيها كل اللي عندي ,, وتمت شوي وطلبت مرة ثانية وشوي مرة ثالثة وهكذا حتى بلغ المبلغ ( عشرة الآف ) والأعذار متنوعة وتقطع القلب ومنها أنه عندها بس ماتقدر تسحب قدام زوجها فلوس من البنك وعندها كم أرض تبي تبيع وحده وبعدين تسدد ,, يعني ماعليها ماشاء الله ,, المهم يابنات يوم وصلت لعشرة ألآف ,,
استمرت تطلب .. بعدها
أنا بديت أجيب عذر بأدب بدون ماتشعر ,, كأن راتبي راح كذا وكذا ومابقى شئ ,, وبأدب أقولها أبشري أول مايكون بيدي بعطيك ,, وكم مرة أمدد لما حست أني ماحعطيها ,, لاني يابنات أشوفها بعيني بناتها كل يوم لبس شكل وهي كل يوم والثاني عزايم وآخر اسراف وسفريات وروحات وجيات ,,
وتصدقون العلاقة أكثر من 8 سنين وربي ماأقصر عنها نصيحة ووقوف في كرب قدر ماأستطيع بظروفها ,, وبالأخير لما ماعطيتها زيادة ,, تغيرت فجأة علي وقاطعتني وصارت تتعذر كل يوم والثاني أنها بتجيب الفلوس وأنها مانست ,, بالأخير يابنات تصدقون ,,,,!!!!!
تصدقون .....!!

تصدقون !!!
أنها نقلت من بيتها بهدوء بدون ماتقول لي ! رغم أنها تكلمني كل يوم والثاني ,,
وأخفت رقم بيتها ولا ترد على الجول ولا أدري وين بيتها ,,
أتقهرت منها ,, وأقول وين الأمانه راحت في هالزمان ؟؟؟؟
المهم دريت بعدين من رفيقة ثانية لها ,, ( صديقتي ماتوقعت أني أبغه أتصل عليها ) أتصلت على الثانية
بعد مشقة لقيت رقمها .

.قلت لها : فلانة ,, ماشاء الله عليها مبسوطة في بيتها ؟( طبعا ماحاولت أبين لها شئ ) ..

قالت : أيه ماشاء الله دخلت قصر مو بيت وفي حي راقي وتعالي شوفي لبسها وكشختهاوووو ,....

المهم صراحة أنا أنقهرت ياناس ,, حرام ال ( عشرة الف ) ماهي هينة عندي وأنا محتاجة لها ,,
قلت عطيني رقمها ,, وعطتني رقمها يابنات ,, وأتصلت عليها ولا توقعت أكون أنا على الخط ,,
المهم حسيت ضاق صدرها ,, المهم باركت لها وسكت ,, وبعدين أنتظرت كذا أسبوع وأتصلت عليها وردت :
وبعد سواليف وسؤال عن الحال ..
قلت لها : ( كلام طويل كأني أشحذها بحقي وأنا مستحية منها وياااااالله أتكلم وقلت متى تقدرين ترجعينهم )
قالت أبشري ,, فرحت وانتظرت مدة .. ولا شفت شئ ,, ومر كم شهر ماشفت شئ ,,

المهم ماطلت معي ,, لما كلمت رفيقتها وقلت : ذكريها بحاجة بيني وبينها .. !
ذيك الساعة يابنات : أتصلت على وهي خايفة أتكلم عنها وأجيب سيرة السلف عند رفيقتها وقالت :
خلاص أنا بمرك وأعطيك الفلوس ..
فرحت وجتني بعد كم يوم ( ومدت لي 8 ألاف فقط .. وباقي ألفين ) قالت بعدين ..
المهم أنا سكت ,, والى يومكم هذا من حوالي 5سنين ماشفت شئ ولا حس ولاخبر ,,
يعني أستنكر الأمانة لهذه الدرجة وصلت ,,,
ولا حول ولاقوة الا بالله

المهم بعد كذا أخذت درس وصرت أحذر من الناس ,,
مع الوقت تعرفت على رفيقة وماديتها ماشاء الله ممتازة أو فوق الممتاز ..
وبعد مدة من الراحة لها ,, طلبت مني مبلغ ( 3ألاف ) طبعا أول مرة تطلب مني ..
وأستحيت وهي في وجهي غالبا بحكم النسب ,,
المهم قلت : أبشري ,, وعطيتها ,,
مع العلم وعدتني الشهر الجاي ,,
والآن مر شهور ولاشفت شئ ,,
تصدقون مستحية أنبهها على السلف ,,
كل ماجيت أجيب السيرة لو على مزح أنعقد لساني وأحسها بتقول :
هاذي ماتستحي ,, ماصبرت علي ,,!!
مع أني والشاهد الله كل مرة أشوفها تلبس ماركات وتزبرك ببيتها وهي موظفة وراتبها حلو ولا جابت خبر أحد ....

الحين أنا منقهرة ,, كيف أجيب الخبر لها وأذكرها ,,
( أبغه طريقة عفوية ولا تنحسب علي )
لاتقولين تكلمي مباشرة ..
لاني ماأقدر أستحي ,, كأني أمن عليها ,,
مع أني شايفتها مبعثرة فلوسها هنا وهنا وآخر بسطة ,,
وأنا وراي مستلزمات ومحتاجة المبلغ ,,
فيه طريقة عفوية أذكرها فيها
بدون ماتشعر أني متضايقة من تأخرها ...

أنتظر جوابكم الله يجزاكم كل خير ويوفقكم لرضاه ..
دلوني وإن شاء الله أتأدب بعد كذا ,,
أو إن شاء الله ماأتعرض لهذه الإحراجات ,,
لان المسلم لاخوه المسلم ,, وصعبة أرد أحد ..
لكن المشكلة بالآمانات ,, صار عادي عند الناس ,,

الله يوفقك كل من تنصحني لكل خير ورضى من ربي