يابنات تعااالوا بسرعه اقولكم وش شفت والله اني خايفه عليكم من النار..

السلام عليكم ورحمة الله وبركاته..
اولا ..احسن الله عزائنا جميعا في وفاة الغاليه ياربي شكثر اعاني اللهم اجعل آخر عهدها بالمعاناة يوم تلقاك واغفر لها وارحمها وادخلها الجنه بدون حساب..

ثانيا..والله ما ادري وشلون ابدا ولا وش اكتب احس اني مقهوره من اللي اشوفه حولي تبرج سفور غفله خراب ودمار عيني عينك..ووين؟؟في البلاد المحافظه بلاد الحرمين..طلعت قبل كم من يوم لصيدلية الحبيب وجالسه اصرف لي دواء الا قدامي هذيك البنت اللي طاقه الزين وكاشفه وجهها ومخصره عبايتها والله والله لوتبوني ارسم جسمها لارسمه والله ان حد ملابسها الداخليه باين والرجال يمكن اربعه او خمسه جالسين يطالعون في جسمها بنظرات والله انها اشد من السهام لدرجة ان جسمي عورني وهم يتأملون تقاطيع جسمها بهالطريقه حرااام عليها وربي حراااام ..موهي لحالها كل بنت خصرت عبايتها وتغنجت في مشيتها وكشفت وجهها ..اسألكم بالله وش هدفها بالضبط؟؟بتقولون تبي تكشخ؟؟عمر الكشخه والشياكه ماكانت في التبرج والسفور وفتنة الرجال ولفت انظارهم..بتقول عشان اقول للناس اني حلوه؟؟لاياعمري المعصيه لها شؤم وظلمه في الوجه مايعلمها الا الله والرجل ينظر للمرأه اللي تسوي كذا انها تافهه ورخيصه حتى لو طالعها بأعجاب لان الشيطان يزين الحرام لكن لو جايتزوج بيدور على البنت العفيفه اللي صاينه نفسها وحجابها..
البنت اللي تسوي كذا ماتدري ان حكمها حكم الزانيه؟؟؟الرسول صلى الله عليه وسلم قال العين تزني وزناها النظر..وقال ايما امرأة استعطرت ثم خرجت ليجد الرجال ريحها فهي كذا وكذا..يعني زااااانيه..وكلنا يعرف عذاب الزناة في القبر وفي الاخره من حديث الاسراء والمعراج..

يابنات والله ان الرجال نظرتهم للمرأه في الشارع شهوانيه بحته احد اقاربي يقول لزوجته المرأه اللي تتبرج ينظر لها الرجل مثل ماينظر الجائع للساندوتش!!!!ترضون تكونون بهذي الصوره؟؟

تخيلي انك رحتي للسوق وانتي بهالمنظر وشافك رجل وافتتن بك وطلعتي من السوق وجاك حادث ومتي(ملك الموت ماراح يمهلك تغيرين عبايتك)ودفنتي في هذيك الليله وهذا الرجل اللي شاف مفاتنك جالس بفراشه يتخيلك او يفكر فيك وارتكب اثم بسبتك وانتي في قبرك ملفوفه بكفنك والملائكه تسألك وتحاسبك..تخيلي الموقف معي ذنوب تصدر لك وانتي في قبرك وليست اي ذنوب انها..اكبر الكبائر..انها الزناااا..

اسألك يا اختي وش بينك وبين الموت الا هالنفس اللي يطلع وينزل..يعني الله قادر ياخذك في لحظه وحده ويكتم انفاسك..وبعدها وش مصيرك؟؟؟وين بتروحين؟؟طبعا لمغسلة الاموات والمغسله جالسه تنزع منك شبه العبايه اللي انتي لابستها وتمسح عنك الوان الطيف اللي زينت وجهك وفتنتي بها آلاف الرجال ..وتغسلين وتلفين في كفن ابيض ان غلى سعره لايتجاوز 100ريال وعبايتك اللي بمئااات الريالات ستبقى شاهده عليك الى يوم القيامه..لاتقولين توي صغيره ماراح اموت والله في هالاسبوع بس اعرف سبعه ماتوا وكلهم مايتجاوزون الثلاثه وعشرين سنه ما امهلهم الموت اخذهم في لحظات من بين اهاليهم وراحوا بدون سابق انذار بالامس كانوا معنا يسهرون ويمرحون ويخططون للمستقبل واليوم بين يدي الله في اول منازل الاخره مع الاموات

كتبت ماكتبت خوفا عليكم من ناروقودها الناس والحجاره كتبته حبا لكم واسفا على حالكم اللهم بلغت اللهم فاشهد اللهم بلغت اللهم فاشهد اللهم بلغت اللهم فاشهد..

ارجوا من المشرفات عدم نقل الموضوع لان القسم هذا اكثر قسم يدخلونه البنات ولاتنسوا ان صلاح المرأه هو عماد الحياة الاسريه..وفق الله الجميع لما يحب ويرضا