يابنات تعالو اقرو قصتي

السلام عليكم ورحمة الله وبركاته
شلونكم يابنات
انا عضوه قديمه في المنتدى ورجعتلكم بقصه جديده قاسيه ومؤلمه على قلبي خلت حياتي تتغير 180 درجه وحسيت الدنيا مافيها امان حتى من اقرب انسان على قلبي الي هو زوجي ببتدي القصه باختصار
بس فديتكن مابغي احد يدعي عليه لان الانسان مو معصوم من الغلط وكل انسان يغلط بس اهم شي انه يصلح غلطته مب يكابر
من شهر تقريبا اكتشفت زوجي متزوج من خمس شهور زواج مسيار من وحده عمرها 42 سنه ارمله
وعندها اربع أولاد انصدمت وانهرت عنده وقعدت اصيح انقلبت حياتي واسودت الدنيا في عيني لانه مستحيل زوجي يفكر في هالشي واخر انسان اتوقعه يفكر بالزواج مره ثانيه ولله الحمدانا مامدح نفسي بس مب مقصره معاه باي شي وصغيره اصغر من الي تزوجها بعشر سنين وجميله ومتفتحه ومهتمه فيه وفي عيالي وفي بيتي والله اني اخدم زوجي من قلبي ولا اقصر معاه باي شي وحتى اذا قعد في البيت عندي افضي نفسي له وادلعه مساج واسويله الي يبيه حتى مع الهوشه قلتله شلي خلاك تفكر تتزوج علي انا قصرت معاك بشي ياب القران وحلف عليه اني ماقصرت معاه بشي المهم قلتله انا ماقدر أعيش معاك ياانا ياهي وهو على طول حلف قال والله اطلقها انا ابيج انتي وعيالي وماقدر أعيش لحظه من دونكم وزعلت عليه تقريبا ثلاث أسابيع وانا عند اهلي ماحد يدري منهم لانه شي يفشل ولا ينقال وانا اعتبر زوجي قدوه لي وحتى اهلي يعتبرونه مثل ولدهم من طيبته فيني وفيهم بس بفعلته هذي نزل من عيني ماعرف كيف اعبر عن الي في داخلي بس افعاله معاي طول سنين عمرنا تغفرله غلطته صارلنا مع بعض 15 سنه يحترمني ويحبني ولي شافني تعبانه تعب من تعبيه شقولكم انسان حساس واحبه ولا اشوف في الدنيا غيره المهم تميت اطرشله رسايل وكلام قوي بس ماكنت ادري انه يتعب من كلامي وتجريحي لدرجة انه تعب وتنوم وصادته رعشه قويه في ايده اليسار ورجله اليمين لدرجة انها تبهدله حتى وقت النوم حزنت عليه ورجعتله ماقدرت اخليه وهو في هذا الوضع حتى احسه صاده اكتئاب من وضعه وانا اتضايق لما اشوفه يرعش صار ضعيف وماعاد يفارقني انا وعيالي بنات تكفن احد صارله نفس حالة زوجي والدكتور قاله سببها حاله عصبيه ونفسيه انت تعرضت لها وانا احس بتانيب الضمير لاني ضغطت عليه وايد قلتله ماقدر أعيش مع انسان داس على كرامتي وماحترم العشره الي بينا واخر شي تكافئني بزواج ثاني لا ومسيار يعني بمجرد التفكير فيه بس حق فراش يجيها ساعه او ساعتين ويخلص مهمته ويطلع وهو مب محتاجنها بس شكلها هي العبت عليه بالكلام الحلو وزوجي اهبل ينضحك عليه بسرعه وخاصه بالكلام الحلو
اسمحولي يابنات طولت عليكن بس احس محتاجه احد أقوله الي في خاطري وابغي رايكن لو انتن مكاني شو بتسون والي يعرف شي عن حالة زوجي يطمني فديتكن