يابنات تعبنا من مواضيع الاعلانات في هالقسم .. يكفي استغلااااال

السلام عليكم

انا لاحظت في الاونه الاخيره .. لا مو الاخيره بعد من زمااااان

ان مواضيع الاعلانات كثرت .. وكأنها استغلال لتأخر حملنا

ياكثر المواضيع عن مراخه في منطقة فلانيه وانها تعالج وحملوا على يدها كثير

ياختي لو انها مشهوره زي ماقلتي مو معقوله بتحط لها اعلان هنا

لانها مو بحاجه لهلاعلان ابد

او على الاقل الاعضاء بيعروفونها خصوصا اللي من منطقتها لانها اكيد بتكون مشهوره ولا انا غلطااانه؟؟؟؟

وثانيا مواضيع اللي عندي لكم خلطه او تحميله او غيرها وغيرها

مو شي منطقي اني بترك المستشفيات وبجلس على تحاميل او خلطات

ماعرف وش مكوناتها ..

ولا معقوله انه وحده جلست سنين متأخره بالحمل

على مشاكل هرمون حليب وتكيس وانسداد انابيب وغيره وغيره

وتترك علاجات طبيه وتاخذ خلطات او تحاميل

ماتدري يمكن تزيد الطين بله

يابناااااااات انا ماانكر فائدة الاعشاب بالعكس انا مقتنعه فيها

تماما بشرط اني اعرف مكونااااااااتها كاااااامله

وشخصيا فادتني كثير من عسل ولقاح ونخل وحبة بركه و زنجبيل...الخ

وخلطة عيون وليد و دمعة سفر..الخ

يابنات انتو عااارفين ان احنا جالسين نتعلق بقشة

وانا عني ادخل هالقسم كل يوم علي احصل شي ينفعني

ويكون سبب لحملي لكن على الاقل شي معروف

وانا فتحت هالموضوع لاني شخصيا

جربت ممرختين من كلام البنات هنا بالمنتدى

وانواع المبالغات في المدح

ماانكر انهم ماكانوا سيئين لهدرجه

بس بصراحه مايستحقون هالغلاء الزايد اللي دفعته عليهم

وتمنيت لو اني صرفت هالفلوووس على علاج ولا تلقيح صناعي افضل

على الاقل اشوف العلاج بعيني .. اشوف البويضات ووضع الرحم ووو

فلو سمحتوا انا اطلب من الاداره انه اي مواااااضيع اعلانات

عن مراخات خلطات و تحاميل غير معروووفه تحذف

ولاحظوا شي واحد ان اغلب هالعضوات تلاقين نص مواضيعها

عن هالمراخه ,, ومشاركاتها بسيطه وتوها مسجله

يعني السالفه وااااااااضحه واحنا مو اغبياء لهدرجه


عذرووووني بنات على اسلوبي لكن

بجد كل مره انقهر من مواضيع الاعلانات هذي

واحسها استغلال لنا والمشكله انه كثير يصدق

ويخسررر علشان هالشغلات وفي الاخير قد تضر اكثر ماتنفع

يعني احنا بنجيبها من وين ولا وين

والحياه صارت غاليه والعلاج غالي

وانا ماانكر ان بعضهم يحبون يكسبون الاجر ويفيدون

لكن جاوبني كيف اعرف الصادقه او اللي غرضها ماادي

اختلط علينا الحاابل بالناابل


عذروني على الاطاله واي تعليق انا اتقبله منكم برحابة صدر

شي في خاطري وحبيت اقوله

والله يرزقنا ياربي الذريه الصالحه بدون اي علاجات وتعب