يابنات حواء هل اجد عندكم من تسدي لي برأي آخذ به في مصيري

الأسرة والمجتمع


....
السلام عليكم ورحمة الله وبركاته
توجهت قبل اسبوع الى صفحة التسجيل ولم يذكر في شروط التسجيل انه يجب ان تكون انثى
وسجلت بأسم شخص ...... والى الآن لم يفعل هذا الأشتراك .... ماهو السبب لا أعلم ؟؟
وعندما سجلت بأسم المميزه ... خلال يوم واحد فقط اصبح الأشتراك مفعل !!!
عموما ليست هذه مشكلتي انما هي مشكلة القائمين على المنتدى .... ولذلك اعتذر لجميع اخواتي المشرفات والعضوات بانني سجلت باسم فتاه
كي استطيع ان اعرض عليكم مشكلتي لعلني اجد لها حلا عندكم

-------------------------------------------------------------------------------------
اخواتي الاعزاء
اجد نفسي ألجا اليكم بعد الله في مصيبتي وفي محنتي
أي والله انني اعتبرها مصيبه واكبر مصيبه مريت بها في حياتي
قد تستغربون بعد ان ترون الكأس الذي اشرب منه من تهويلي للامر وتكبيره
لكن والذي خلقني انني لا اجد للراحه عنوان ولا اجد بالحياه اطمئنان والنوم جافا العينان
...
اخواتي الأعزاء كان بأمكاني ان اعرض امري على شبان من بني جنسي
لكنني لن اجد عندهم ماارجوه ومشكلتي هي تلمس حياتي الزوجيه وبنات حواء لديهم بأذن الله الحل الشافي لمشكلتي
لذلك اتمنى ان اجد في جوابكم الشموليه والرأي السديد اللذي استطيع ان آخذ به فهو يلمس حياه زوجيه خاصه بي
واجد فيكم المثقفات والواعيات بهذه الأمور ... ولهذا السبب كانت مشكلتي مسطره امام اعينكم يارائدات حواء
...........
سوف افصل لكم مالذي اوجهه في هذه الحياه الفانيه

انا ابلغ من العمر حاليا 27 سنه ......
احببت لي فتاه بجنون ... ويعلم الله انه حب شريف ... اقصد من وراءه الزواج
ويعلم الله انني لم احادث هذه الفتاه يوما من الايام .... ولكنني امتلئت بها حبا وامتلئت لها شوقا
..
ولا اخفيكم بان هذه الفتاه آيه في الجمال ... سبحان الذي صورها ..
....
القصه تبدا من دخولي لمنزل احد زملائي بمجلس الضيافه
( المعذره بنقلب عامي )
وزميلي لم يرافقني للمجلس .. دخل للمنزل مباشره .. لتجهيز متطلبات ضيافتي عنده
وبالصدفه رأيت اخته في المجلس وهي تنظفه .... ماادري وش اللي صار لي وشقيت البنت من راسها الى رجولها من هول ماشفت
ورجعت على طول .... عشان تقدر تاخذ فرصتها وتترك المجلس
انا جلست اسبوع كامل افكر بهالبنت وبجمالها اللي جنني
يعلم الله انها بهالجمال ماشفت ولا رأيت .....
على كثر ماشفت في الفضائيات من بنات روعه بالجمال ... الا بهالجمال ماشفت والله
البنت هذي من مدينه ثانيه بعيده عن مدينتنا
وانا كنت زائر لزميلي بالمدينه اللي هو ساكن فيها
اتصلت على زميلي بعد اسبوع وقلت له ابي اخطب اختك
قال والله تشرفني ويسعدني
وجيته للبيت ... وقلت له الصراحه ابي اخطب اختك
قال عطني فرصه اشوف البنت واشوف رأيها واعطيته صوره لي عشان تشوفها اخته حسب طلبه
وانا مااخفيكم بأن الله منحني وسامه شديده ... ولا امتدح نفسي ولا ارغب ان اصل لدرجه في مخيلتكم بأنني مغرور او شخص متميع لشدة جمالي
لا وربي .. ولله الحمد لم اتجرا في يوم من الأيام بان استغل جمالي بالغرور او النزول والهبوط الى الوحول الدنسه
طبعا خالتي تسكن في نفس المدينه اللي البنت ساكنه فيها
وطلبت من خالتي انها تزور البنت وتعطيني رايها في البنت
وبعد زيارة خالتي لها طلبت من خالتي نتيجة الزياره
قالت لي .... ماادري وشلون قدرت تنقي هالبنت من بنات العالم ... هالبنت بحياتي ماشفت بجمالها على كثر ماشفت
زاد اصراري وزاد تعلقي بالبنت اكثر واكثر
واتضح لي ان البنت موافقه علي .... مع العلم ان الخطاب يتقدمون لها بالعشرات في كل شهر لسمعتها الحسنه ولجمالها المعروف بين اقاربها
والكل رفضته وانا وافقت علي ... ليش ماادري ؟؟
هالكلام استمر تقريبا شهر بيني وبين خالتي وبين البنت وبين اخو البنت والأمر لازال ماوصل للكبار
زيارات خالتي الكثيره للبنت اتضح لها ان البنت بعد تعلقت فيني مثل ماتعلقت فيها
سبحان الله ...... صدفة النظره السريعه لها ولي بالمجلس قلبت راسها وهي قلبت راسي
كلمت امي وقلت ابي اخطب .. قالت خير انشاءالله ومن هي سعيدة الحظ
قلت وحده من المكان الفلاني
بمجرد ماقلت هالكلام واجهت الرفض الشديد
طلبت من خالتي تكلمها وفعلا كلمتها لكن امي رفضت تماما وقالت لو تخطب من برا قبيلتنا لاني امك ولا انت ولدي
وهذي عادات عندنا حجريه نوعا ما وامي الله يهديها متمسكه فيها
..
حاولت في امي بكل الاسباب ورفضت ... جبت ناس يأثرون عليها ورفضت
وانا والله ماابي اعصي امي ولا ابي اكسب فيها اثم وادري ان رضى الله من رضى الوالدين
وقبل لا تطول الفتره اللي اكلم فيها امي واحاول فيها كتبت رساله صغيره بالمره للبنت وطلبت خالتي توصلها
اذكر من الكلام اللي كتبته لها بالرساله
اني احبها بالحيل ومتعلق فيها وترجيتها تحتريني وتعطيني فرصتي مهما طالت فترة تقدمي لها
هالكلام صار له اكثر من سنه ونصف
وان احاول في امي ولا قدرت .... والبنت ردت كل الخطاب بهالفتره تحتريني . لأني ماكلمت ابوها ولا حجزتها ولا خطبتها رسمي
وانا يعلم الله تولعت في البنت بشكل ماتتصورونه
والبنت تركتها .... ولازالت ترد الخطاب لأان عندها امل اني برجع لها .... حسب ماقالته لي خالتي
ومره ارسلت لي رساله مع خالتي ........ والرساله مافتحتها خالتي لأانها امانه بين ايديها ..... كلمه وحده اللي كتبته في الرساله
احتريك لو تبي العمر كله ...
.. يعلم الله ان حالتي تردت بعد هالكلام لكن الشكوى لله امي رافضه تماما .... واعطيت خالتي خبر انها تقول للبنت لاتنتظرني لأن الأمر طلع من ايدي
وهالحين رضخت للامر الواقع ورضخت لامر امي
وخطبت لي امي وحده جميله بالحيل بس مو بجمال البنت الللي كنت ابيها ..
وانا مانظرت لجمال خطيبتي ... لان اخلاقها معروفه بالخير والطيبه
بس لازلت مقهوووووووور ..... مقهور من حالتي ... امي وقفت بطريق سعادتي ...
ولا اقدر اوقف في وجهها لانها امي ولا يمكن في يوم من الايام اوقف في وجه امي واعاندها
.....
بعد الخطبه بفتره تمكلت على البنيه .... وصار بينا بعض السوالف على الجوال .... البنت مسكينه تحاول انها تحسسني انها تحبني كثير
بس انا للأسف ماقدرت احمل لها اي معنى للحب في قلبي
خلاص نفسي انسدت من كل البنات .. واجلت الزواج سنه كامله مع اني اقدر اتزوج بنفس السنه اللي تملكت فيها على البنت
ورغبة هالتاجيل هو اني احاول انسى البنت اللي حبيتها واحاول اني ابدا احب خطيبتي او بالأصح زوجتي
وجلست سنه كامله وانا اصارع نفسي واصارع قلبي
يعلم الله سنه كامله وانا احاول احب زوجة المستقبل ماقدرت ولا قدرت اشيل لها اي معنى للحب في قلبي لها
واقترب موعد الزواج ومابقى الا شهر ويزيد ..... من كثر الصراع النفسي اللي عانيته طلقت البنت اللي كنت متملك عليها
خفت اني اظلمها معي وخفت اني اجحف بحقها واكسب فيها الأثم
وانا ماابي زوجتي تعيش معي بتعاسه ... ابي اشيلها على كفوف الراحه وقت ماتحتاجني تلقاني جنبها
....
طبعا جا كلام وراح كلام وصار زعل من الوالده ومن هالأمور الين استقرت الاوضاع وجلست تقريبا سنتين مالي نفس بالزواج وماابيه
... والحال فيني تردت كثير ...
يمكن تقولون بالغت في حبك للبنت بزود ...
جوابي ممكن اني بالغت لكن يعلم الله ان القلب ماسكن احد غيرها ........
وحسيت نفسي مقهور من فرصة جتني بحياتي ومرت من عندي بسلام من دون مااحرك ساكن
..... وهالحين خطبت لي امي بالغصب وقالت لازم تتزوج .... وملكت على البنت ...
وزواجي بهالاجازه ... ونفس الشئ ماقدرت اشيل لها اي مشاعر في قلبي
...... والله يابناات حواء انا محتار وماادري وش اسوي
ماابي اظلم البنت معي ولا ابي اعيشها بحب كاذب
ابي اكون صادق معها بمعنى الكلمه وابي اكون الزوج الصالح عندها واللي يسعدها بكل شئ بحياتها لكن هالأشياء انا عارف نفسي مو قادر اسويها
لاني مااحمل لها بقلبي اي حب والله
........
واللي زاد بالطين بله جاني خبر من خالتي ان البنت اللي حبيتها باقي ماانخطبت وكل من جاها ردته لانها تدري اني باقي ماخطبت ولا تزوجت
والأمل عندها كبير اني اخطبها ... وهالحين مر على هالكلام من بداية القصه لهالحين ثلاث سنوات
وزواجي بهالاجازه والبنت اول ماتدري اني بتزوج راح توافق على اول خطيب لها لانها بتثق ان الامل انتهى
.......
يابنات حواء اسعفوني الله يثيبكم ... وش الحل ..... انا اموت في هالبنت وهي تحتريني ولنا اكثر من ثلاث سنوات
وامي رافضه تماما اني اتزوجها .... والبنت اللي بتزوجها بالاجازه ماقدرت اشيل لها بقلبي اي معنى للحب واخاف اظلمها معي
عطوني نصايجكم ودلوني تكفون
اتوكل على الله واخذ البنت اللي تملكت عليها .... مع اني واثق تماما ماراح اقدر احبها مهما كانت الاسباب ومهما فعلت لي من اسباب
وبعيش معها مجرد زوج يقوم بواجبتها وبحقوقها الشرعيه على اتم وجه
اما مشاعري ... مااقدر اني اقدمه لزوجتي مهما كلف الامر
او اني اطلقها ولا اكسب اثمها ولا اكسب احساسها بالجفا من جهتي
والله ماادري الحيره اخذت تفكيري والتعب كل يوم يزيدني
دلوني يابنات حواء وفهموني وش هالحاله اللي انا فيها وش اللي يصير لي ....
انتظر ردودكم واجوبتكم لي
56
8K

يلزم عليك تسجيل الدخول أولًا لكتابة تعليق.

تسجيل دخول

ونة خفووق
ونة خفووق
كان الله في عونك..
بصراحة من شدة تأثري ماأقدر أرد الآن..
فلي رجعة..
لكن سؤالي...
كيف مو من نفس القبيله؟؟؟؟
أحياناً فيه امور بكل آسف لازم نوقف عندها...
ونظرتك وتعلقك وتعليق البنت معك وعدم صرف تفكيرك عنها..
هي اللي زادت حالتك..
وكثير تمنوا وحبوا..لكن لأنهم عارفين قدرهم ولا رضخوا..
ونسوا او تناسوا من حبوه..عاشوا بسلام..
وقدروا يعطون..وقدروا ينسون ويحبون غير..
لكن اللي يقعد ويغني على ليلاه..وهي مهيب له او ماتناسبه..
وعارف إنه مهيب حاصله له..
بيظل طول عمره يغني عليها..وبيتنكد...وماراح يحب غيرها..
وصدقني...والله أعلم..
لكن لو عاشرتها..ممكن تتغير نظرتك..
ممكن تستغرب شعورك وهبالك عليها..
ليتك تتذكر الآيه الكريمه..
( وعسى أن تكرهوا شيئاً وهو خيرٌ لكم
وعسى أن تحبوا شيئاً وهو شر لكم والله يعلم وأنتم لا تعلمون)
الداعية الى الحق
ان من رايي ان كان ماهو امر قبائل مستعصي ...بل عادات وتقاليد في القبائل انك ماتضلم بنت الناس معك وتحاول مع الوالدة ...ودعواتنا لك بان الله يهدي الوالدة ويردها لرشدها لما فيه سعادة ابنها ........
اهم شي لا تظلم بنت الناس معك ............
قرية التوت
قرية التوت
اقول ياأخ متميز كان الله في عونك وثبتك وصبرك عموما مالاحظت انك استخرت ولا شاورت احد غير امك وين باقي الاهل وبعدين الزواج مو عشان الشكل والجمال لكن شف الامور الثانيه الاخلاق وغيرها ........

لكن نصيحه اخويه اذا انت استخرت وحسيت انك مرتاح ومرتاح جدا شاور امك وبهدوء وناقشها انه بالامكان الاخذ من قبيله اخرى تساويكم في الاصل ودع احد من اقاربك كابوك واخواتك كاوسيله للضغط عليها ..


والله يوفقك ويختار لك الصالح في الامر...
@ المميز @
@ المميز @
جزاكم الله خير عل الرد السريع والتفاعل منكم لحالتي
.......
اختي الكرمه ونة خفوق ..
الله يعطيك العافيه واحتري ردك ورايك الآخر حينما يتسنى لك الامر
وبالنسبه لسؤالك .... مو من نفس القبيله ؟؟
انا بجاوبك ياعزيزتي ..... انا بالأصل من مشائخ قحطان وعندنا عاده ان عيال المشائخ ماياخذون الا من نفس القبيله او بالاحرى من نفس قبيلة المشائخ عشان على حسب زعمهم العرق مايختلط ولا يضيع
وهالعاده متمسيكن فيها القله من الكبار والشيبان مع العلم ان مافيه احد خالفها الى الآن وبكون انا اول من خالفها
ولأني استشرت بعض اللي اكبر مني وأيدوني على اللي بسويه عشان افتح لهم باب كان مغلق عنهم من زمان
واللي ابي اخطبها وامي رافضتها برضه قبيليه وأصلها سبيعيه .... يعنني ياأختي الكريمه البنيه اصل وفصل وماعليها كلام .....
انشاءالله اني وضحت لك الصوره .......
..............................................................................
اختي الكريمه الداعيه الى الحق
الله يسمع منك ويهدي الوالده
............................
اختي قرية التوت
ابشرك باني استخرت ومن كثر مااستخرت نسيت كم مره والحمدالله انا انسان محافظ وخاصه بالامور الدينيه
وبالنسبه للمحاولات .... كلها بائت بالفشل .... لا عن طريق خواتي ولا عن طريق خالاتي وقريباتي لان امي كلمتها قويه ومسموعه من الكل ولا احد من نساء القبيله يقدرون يقولن لا في وجها ....
حتى وصل اكلام معها اني لو افتح هالسيره معها مره ثانيه بتتبرا مني ليوم الدين
والله عجزت فيها وكل المحاولات فشلت ........
وبالنسبه للبنت اللي متملك عليها هالحين والله ثم والله ماقدرت احبها خير شر
وهالشئ انا واثق منه . وحتى لو قلتوا لي بعد الزواج ممكن بتحيها ..... ياناس اللي مايجي من اوله مايجي بآخره
.......
اشكركم وانتظر المزيد من الآراء
ونة خفووق
ونة خفووق

شف..
إذا الموضوع كذا..
مع إحترامي لأمك..
بس مالها حق تفرض عليك شي مهوب حرام..
صعب تعيش مع إنسانه قلبك رافضها..عشان ترضي أمك!!
أنتَ اللي بتعيش معها وتعاشرها مو أمك..!!!
حتى بتظلمون بنات الناس..
وش ذنب زوجتك اللي تختارها أمك..
بسبب فرض أمك وتحديهاوعنادها؟؟!!
لذا حطها عند الأمر الواقع..
بتزعل وتتضايق..
بس طيب خاطرها بعدين انتَ وزوجتك..
لطف الجو..
وخل زوجتك تتلطف معها وتصبر على كلامها..
يوم هدايا..
ويوم غداء ولا عشاء..
غير الكلام اللي يطيب خاطرها..
وشوي شوي تأخذها على جنب وتحب رأسها وتتطلب رضاها..
صح بتتعبون في البدايه..
لكن قلب الأم مهما وصل من قسوته..
ماتتحمل الزعل عليك وبتلين..وتسامحك..
لذا عليك بصلاة الإستخارة حتى لو كانت مليون مره..
وعليك بالدعاء لوالدتك إن ربي يهديها ويسخرها لك..
شاور من لهم حكمة من قرايبك..
إذا أيدوك...أحسم الأمر...وأتكل على الله..

والله يكتب لك اللي فية الخير لك.