يابنات ساعدوني أختي اقرب الناس لي تسرقني!!

يابنات انا اول مرة اعرض مشكلة تخصني وأبي الاقي الحل والله ماصرت اقدر أنام من اللي صار..

عندي أخت أصغر مني عمرها 20 سنه وانا عمري 25 سنه ولي سنه متخرجه من الكليه بس باقي ما توظفت وأختي هذي كملت الثانويه قبل سنتين واشتغلت بوظيفه راتبها الف ومئتين ريال بالشهر00المشكله من اكثر من سنه في اغراض لي انسرقت وما ادري من أخذها((جهاز جوال ومسجل صغير))بس مع الايام نسيت ولا فكرت اني اشك فيها وقبل سنه لمن كنت برابع كليه انسرق مني فلوس مره ميه ومره خمسين ريال ومره مصروفي حق الكليه وكنت اشك بواحد من اخواني لأنه كان يطلبني وأقوله ما عندي ومع الايام سكت ونسيت الموضوع...وقبل فتره اختي الكبيره متزوجه جت وزارتنا وجابت معها
( دونات) وقالت خلوا الباقي لأخواني اللي نايمين قلنا لها اوكي وخذت امي الباقي من الدونات وحطته بالثلاجه اليوم الثاني قامت امي تعطي اخواني الدونات ما لقتها سألنا الشغاله قالت ما ادري ولمن جت اختي من شغلها سألتها امي لا يكون ماخذة الدونات معك الدوام قالت لا والله ما اخذتها وانا شكيت قلت اكيد هي وفي الاخير اعترفت لأن وحده من خواتي تشتغل معها وبدون ما تدري قالت لوحده من رفيقاتها أختي جابتلكم قهوة امس بس اكيد ما عجبتكم من دون (حلى) قالت لا من قال اصلا هي جابت لنا قهوة ودونات وهنا كانت الصدمة ولمن ردوا البيت علمتني اختي ومسكناها واعترفت قالت اختي الكبيره ليش سويتي كذا ليش تكذبين ردت عليها: خفت وما كنت ادري انها لأخواني قالت اختي خلاص ما عليه بالعافيه وانا سامحتك بس لا تعيدينها.
ولحين قبل اسبوع اكتشفت ان طقمي الذهب اللي جاني هديه من أمي انسرق ونهبلت وما صرت انام اقول يا ربي من اللي أخذه وما حاولت اني اشك بأختي هذي لأني قلت اكيد تابت..بس مع كثر التفكير ولأنها ما علقت لمن عرفت ان ذهبي انسرق شكيت فيها ولان الشركه اللي اختي تشتغل فيها تمنع الجوالات اخذت جوالها لمن كانت بالشغل وقلت لأمي اني شاكه فيها وباخذ جوالها واذا قالتلك شي قوليلها اللي سرق اختك سرقك وحاولت اني ما اكلمها ومن يومها وانا اطنشها وابيها تجيب السالفه عشان اقولها انك انتي اللي سرقتيني.
اللي خلاني اتاكد انها سرقتني ما سألتني عن جوالها سألت امي عنه ولا سوت شوشره بالبيت ابداً وهذا اللي أكدلي انها سرقتني.((وربي اني انصدمت))
والحين جوالها معي من اربع ايام..بنات تكفووون ما ادري وش اسوي المشكله ان أختي هذي انسانه طيبه وحنونه وأخلاقها حلوة مع الناس ومعنا ما ادري ليش انا بالذات تسرقني..واللي قاهرني انها كانت تعلمني عن وحدة من البنات اللي بعملها معروفه عندهم انها مصلحجيه وتسرق من البنات أي شي.. يابنات ابي كل وحدة تشوف مشكلتي تساعدني..والله يجزاكم الخــــــــــيـــــــــــر. :(