يابنات فاض بيا ولا إيش رايكم! ابي حل

السلام عليكم ورحمة الله وبركاته

يا اخواتي بالله ابي المشوره منكم ورايكم
وحل لمشكلتي

اقولكم القصه من البدايه
أنا أتزوجت وعمري 17 سنه وزوجي مهو محترمني وبس يسبسب
ويزعق ويعاملني كاني بنت من بنات العيله ما كأني حرمته
وهوا يبي يتجنن ويخلف وكل ما أحمل سبحان الله من اول شهر يطيح يمكن الين دحين 9اسلابات
وما خليت دكتور في ولا دايه الى ووداني
من 6شهور بعد الزواج وهو موديني ويجيب فيا وأنا ما اتكلمت يقلي يمين امشي يمين يقول شمال امشي شمال
وعمري ما قلتلو لا ولا حاولت ازعلو ولا اغلط عليه
كل دا وانا والله ما جبت سيره لأحد اني مهانه وأبين للناس اني أسعد وحده بالوجود
حتى قدام اهلو
انا أحب أهلو وهم يموتو فيا
وفوق كل ذا أموت فيه والناس كلها تدري
معنو النفسيه تعبانه وتعبانه معاه من البدايه وأهلي كل ما شافوني يقولو أشفيكي اقول بس ما نمت وسهرانا
مع انو وجهي باين عليه
ومن النفسيه سرت ما ابغى اشتغل في البيت
يعني ما سرت زي اول في شغل البيت اسوي يوم واسيب اسبوع بس أغراضو وطلباتو مجابه ومنفذه

سار يدق على أمي ويسبسب فيا وقولها بنتك فيها وتخطيها
وامي عارفه اني شاطره تقولي ما كنتي كدا أقولها خليها على ربنا
ومع الأدويه والمنشطات الواحده تتعب وانتو عارفين
وغير كدا كل ما اناقشو في شي يقول ماني ناقصك وكل شي لا لا حتى اهلي فين وفين أرحلهم

دحين اخر شي سويت اطفال انابيب وتخيلو يابنات قبل ما أحدلل رايح قايل لصاحبو هذي أخر مره لو ما صار حمل بطلقها صاحبو دق على امي وقلها ترى زوج بنتك بايع
صاحبو من كثر ما سسبسب فيا زوجي
سأل اهلو هيا عورا عرجا وحشه فيها شي
قالولو لا ماشاء الله ما ينقصها شي
رحت حللت وطلعت حامل
وبعد اسبوع من التحليل حسيت بالم وصار لي حمل خارج الرحم
فحسيت نفس الالم
قلي روحي مع امك
دقيت عليها وجاتني ورحت المستشفى
قالو احتمال خارج الرحم
ونوموني الين ما يتأكدو
رسلي رساله أهم شي انتي بدهيا في الحمل فرحت من كلامو
وانا ما كنت ادري عن هرجة انو بايعني برخيص
جلست أسبوع بالمستشفى وطبعا اسلبت رحت على بيت أهلي
استنى أحد يدق يسأل يرسل على الاقل
قلت يابنت دقي طنش ارسلي طنش
وكنت اكلم اهلو كل يوم ما كانو يدرو ولا قالولي
جاتني أمي وقالتي على القصه انا انفجرت وطلعت حق الاربعه سنين كلها
تقولي أمي كل دا وساكته الحمد الله انوما بينكم أطفال
ودحين جاتني أخر الاخبار انو أهلو يغصبوه يردني وهوا مو راضي
ويقول ما يمديني افتح بيتين
أقول لأابويا ما ابغى ارجع مدام انو ما يبغاني اخاف بكرا يمد يدو

ودحين انا حاسه براحه نفسيا عمري ما حسيت فيها من قبل 4 سنين

اخواني يقولولي لساعك صغيره 21 سنه الله يعوضك العمر كدامك
بس لا تتسرعي في القرار
انا ما احب شي اسمو مشاكل وزي ما دخلنا بالمعروف نخرج بالمعروف
انتو ايش رايكم يابنات ؟اسيبو ولا استنى الين ما يقرر هوا شاري ولا بايع

لا تبخلو عليا بالمشوره