يابنات لقينا اشياء غريبه ببيتنا بعد ماتوفى ..

يابنات اخوي الصغير تزوج بدري حتى قبل اخواني الكبار عشان يدرس برى وقبل مايسافر زوجناه . زوجته جابتله ولد وحملت بسرعه بالثاني
بعد الاربعين على طول والمشكله انها جايبه ولدها عمليه وعندها التصاقات شديده وحالتها حاله ويوم ولدت تعبت وتعسرت ولادتها

وصار لها خطا طبي وجاها نزيف وجابت بنت وقعدت ثلاث ايام وتوفت
الله يرحمها .. وتزوج اختها لان عياله صغار وخاف عليهم (ابو زوجته اهداها له )
جاب منها ولدين وتوفت بحادث سياره .. تزوج للمره الثالثه وبعد
اخت زوجاته الي قبل وماقعدت معه الا 8 شهور وكانت حامل بالسابع وجاها
تسمم حمل وماكانوا يدرون وقعدت بالبيت وانتفخت ونزل الضغط عليها و
واغمى عليها ووديناها المستشفى الا قد توفت الله يرحمها :44:

جا ابوها للمره الرابعه وكالعاده دق صدره وقال بيزوجه بنته الرابعه
ورفض اخوي قال خلاص ارحم بناتك انا شكل احد داعي علي :icon33:

وقعد اربع سنوات ولا تزوج تعقد واصلا حتى لو خطب اتوقع بيرفضونه
هو موظف بديره ثانيه وعياله عند اهلي وكل اسبوع يجي يشوفهم
وحالته حاله لان سيارته كل يوم خربانه

يعني حظه نحس مو بس بالزواج حتى باشياء ثانيه السياره اذا اشتراها
يقعد يصلح فيها كل يوم وهي خربانه واذا اخذها اي واحد من اخواني
تصلح وتمشي مثل الحصان مافيها شي الين يسوقها هو تخرب
ومن سياره في سياره وتصليحات الله يعينه
وجا مره اشترى بيت وبعد مااشتراه خربت المواصير والتسليك الداخلي
وصلح البيت من جديد وخسر فيه مبلغ وقدره وبعدها باسبوعين بس
انفجر الغاز واحترق البيت وباعه .,. واشيااء كثير ماتوفق فيها

قبل فتره حلمت فيه امي ان عنده سبع اكياس ثقاال ولونها اسود وقماشها خيش وكباار وهو يشيلها وهو تعبان وهلكان ونقل ثلاث منها
وباقي اربع وجا واحد يقوله شيلهم وهو يبكي يقول خلاص تعبت

ومافسرنا الحلم لان ماندور ورى التفسيرات ولاننشغل بالاحلام
لكن جت جاره امي وتقول انها حلمت فيه انه لابس لبس ابيض ومبتسم ووجهه جميل ويمشي وهو حافي والمكان الي يمشي فيه كله شوك وحفر وشافت وحده جالسه بعييييد لكن نورها واصل الى عنده وتقوله تعال هنا مافي شوك وهو يمشي رايح لها والمكان اللي هي فيه بساتين خضرا واوديه يعني المكان حلو .. ولافسرنا هالحلم بعد


بعدها بفتره توفى الله يرحمه يارب ويجعل مثواه الجنه
وكل يوم ولده الكبير يحلم فيه وهو معه صندوق مزخرف ويعطيه ويقوله
خل جدتك تفتحه ..
اول ماعلمنا ولده ماسوينا شي ..
وحلم فيه الليله الثانيه وهو يقوله ليش ماخليتهم يفتحونه ؟
وجا ولده قال لامي وقعدنا ندور باغراضه ومالقينا شي
وحلم فيه ولده الليله الثالثه وهو يقوله روحوا غرفتي القديمه وافتحوه
وعلمنا ولده ورحنا الغرفه وقلبناها فوق تحت ولقينا صندوق
قديمممم وهالصندوق كان حق ابوي وابوي اعطاه لولد خالتي يوم كنا صغار

ولقينا داخل الصندوق مربع اخضر مكتوب عليه ايه الكرسي وخاتم كبير
ومكتوب اسم اخوي من داخل ومن جهه الثانيه مكتوب اسم مانعرفه (اسم بنت )
ولقينا قماش ابيض وملطخ بدم اسود و ولقينا قماش ابيض طويل ومعقود 7 مرات ولقينا عمله معدنيه قديممممممه مره والعمله يمنيه

ومن يوم امي مسكت هاالاشياء وهي مريضه ونبي نوديها عند شيخ وتطيح عند الباب وتنزف دم من كل مكان حتى من فمها وخشمها وينقلونها للمستشفى وتطلع مافيها شي وماهي راضيه تروح الحين للشيخ

والاشياء اللي لقيناه وديناها لشيخ وقال هذا سحر احرقوها وحرقنا الاشياء اللي تنحرق وباقي الاشياء معنا

الحين عياله وامي كلهم مرضى مدري اش سبب مرضهم ونوديهم المستشفى ومايطلع فيهم شي ..

وفيه رقم يدق علينا صوت شاب ويقعد يوصف اشكالنا ويوصف بيتنا
ويوصف قعدتنا واحنا نكلمه بسم الله الرحمن الرحيم حتى ملابسنا وحنا نكلمه يوصفها بالتفصيل ..

والله عايشين برعب وماندري وش نسوي والرقم اللي يتصل مايطلع بالكاشف اعوذ بالله من الشيطان ..

كيف نعرف المتصل ؟ وكيف نعرف من اللي سوى السحر ؟
وكيف نعرف اذا السحر تجدد ؟ وكيف نبطله ؟؟
ووش تفسير اللي يصير انا راسي دار وانا افكر العمله اليمنيه لييه ؟
وصندوق ولد خالتي وش جابه ؟ واسم البنت الي بالخاتم ماعرفناه وماعندنا احد بهالاسم ؟

الي تدخل تدعي لاخوي بالرحمه ولنا بتفريج الكربه والله حالتنا مايعلم فيها الا الله

لكن انا كل مااقرى ايه (ولا يفلح الساحر حيث اتى ) اتفائل واقول ان شالله بتفرج ويارب مايخيب رجاي