يابنات معاناة ال12 سنة مع الرقبة السوداء انتهت في 3 أسابيع ولله الحمد والمنة....

السلام عليكم ورحمة الله وبركاته...
أنا بخش في الموضوع على طول.. أنا كنت أعاني من سواد الرقبة من أول ما بلغت واستمرت هالمشكلة معاي إلين قبل شهر ونص.. كل الحكاية إني كنت أتصفح واحد من المنتديات اللي مشتركة فيها غير هالمنتدى طبعا.. ولفتت إنتباهي خلطة مكتوب عليها خلطة لتفتيح اليدين وأنا أساسا أعاني من أن يدي ووجهي ورقبتي أغمق من باقي جسمي.. قدرت أتخلص من السمار اللي في وجهي بواسطة كريم أشتريته من الحرمة اللي اشتريت منها زيت الوعد اللي نفعني واللي نزلت عنه موضوع في قسم الشعر والله يجزاها ألف خير.. بس بقالي رقبتي ويدي مع إني كنت أدهن من كريم الحرمة عليها بس مانفع معاها إلا شي بسيط بالكاد يبين يعني بالعربي نتيجة ما ترضيني يعني تخيلوا نفسكم مكاني وجه مثل القشطة ورقبة سمرة...
المهم نقلت الخلطة وجبت المقادير السهلة وسويتها ويوم حطيتها في العلبة حسيت إن الكمية نوعا ما كبيرة ففكرت بيني وبين نفسي وقلت ليش ما أستخدمها على وجهي ورقبتي ويدي لأنها خلطة مكونة من مواد طبيعية يعني إذا ما نفعتني ماراح تضرني وفعلا استمريت عليها بلا كلل أو ملل وشفت النتيجة الرووووووووعة بعد ما أكتمل الأسبوع الثالث بياض ونظافة ملفتة لدرجة إن أهلي في البيت ما صدقوا وقاموا يسألوني وش تحطين لا وأكثر من كذا وحدة من خواتي تقول لي لوما أنتي أختي وساكنة معي في البيت وأعرف طلعتك ودخلتك كان قلت أنك مسوية تقشير حق وجهك من ورانا...(((((قولوا ما شاء الله تكفون)))))..
المهم يا قليبي آسفة على الإطالة و الخلطة هي:
ملعقتين كبار كريم جليسوليد+ ملعقتين كبار حليب بودرة+ ملعقتين كبار فازلين+ ملعقتين كبار ماء ورد+ عصير ليمونة صفراء كبيرة كاملة ... وبسسسسسس تستخدم مر واحدة ليليا قبل النوم مباشرة وتغسل الصباح ب((صابونة البابايا )) مع فرك بسيط للتنظيف بليفة بودي شوب اللي على شكل قفاز.. وتحفظ الخلطة في الثلاجة عشان ما تتأكسد وتخرب البشرة بدل ما تصلحها.. وبكذا يا حبايبي وصلت لرقبة ووجه ويدين موردين وحلوين و فاتحين.. وتوتة توتة خلصت الحدوتة (((هذا باللبناني)))...يعني بالسعودي سلامتكم وتعيشون...ههههههه..