يابنت الــ ـ ـ ـ ......هل يتلفظ بها زوج لزوجته؟؟!!

السلام عليكم

هذي قصة وحدة من صاحباتي انقطعت الاخبار بيني وبينها من فترة وامس جاني اتصال منها بعد ما سلمت عليها قلت يا بنت وينج مختفية عسى المانع خير
شوي والا صوتها يتغير انا ادري انه زوجها مو مضبوط من زمان بس ما توقعت اللي قالته لي وقالت لي تكفين حطيها بالمنتدى ابي كل وحدة تحط نفسها بمكاني بعيد عنكم ان شاء الله وش تسوي ساعتها واي قرار تتخذ
تقول صاحبتي ( أنا بعطيكم صفات صاحبتي قبل لا تقرون مشكلتها هي درست معاي بالثانوية بنت هادية وخلوقه الكل كان يبي يتزوجها لدرجة اني خطبتها لاخوي بس عيال عمها كانوا يبونها وعيوا عليها وهي بعد عيت بعدها عن عيال عمها.. بنت ملكة جمال اللي يشوفها يقول حليمة بولند بس هي عندي احلى من حليمة حتى بعد عرسها كانت تنخطب ما يدرون انها تزوجت لا ومن منو من واحد ما عرف قيمتها )

*******

تقول صاحبتي ان زوجها يعاملها بقسوة شديدة ما يضحكلها اول عرسها كان زين معاها وحتى خواته زينين بس بعدين كلهم انقلبوا عليها الا امه عسل معاها لي الحين وتغليها اكثر من بناتها
صاحبتي تقول ان السبب هو انها طيحت ميانة مع خواته يعني صارت حيل علاقتها معاهم اكثر من خوات والطبع هذا ما طلع يناسبهم لانهم قاموا يمسخرونها قدام زوجها ... مرة وحدة من خوات زوجها قالتلها يا صعيدية انتي ولبسج قدام زوجها وزوجها مع خواته بحق والا باطل
واكثر من هذا يقولون
هي ما همها خواته تقول يكفي ام زوجي انها معاي طيبة وتحبني وتراعيني مثل امي وتدري بسوايا بناتها معاي ومهي راضية
تقول مشكلتي هي زوجي دائما يتلفظ علي بألفاظ قبيحة ويعاملني كأنه يعامل حيوان حتى الحيوان يلقى رحمة اما انا محرومة حتى من اهلي وهم ساكنين قريب مني محرومة من الطلعات مع زوجي او مع اهلي خواتي الله يهنيهم مع ازواجهم بنعيم اما انا بجحيم تقول مرة قلت له وهو كان ماسك بنته يلعب معاها احطلك العشا وانا ابتسم تدرون شقال لي .... قال ما ابي عشا الله يلعنج !!! ومعروف انه ما يناديني باسمي لا يناديني ياالك... باسماء الحيوانات !! واردى من جذي مرة كنت جالسة بشقتي واهله كانوا معزومين وانا قاعدة انا وبنتي عمرها سنتين وكنا داهنين شعورنا فجاني وقال لي امشي بنروح مع اهلي للاستراحة فقلت ما عطيتني خبر من قبل طيب انطر نتجهز انا وبنتي فقال لي تروحين الحين معاي جذي فقلت شلون شعورنا دهن ولبسنا لبس بيت.. لحظة شوي نبدل تقول جرني مع شوشتي قال الحين امشي جدامي السيارة تقول وانا بالسيارة بس بجي شلون اروح لناس ما اعرفهم وانا بهالوضع وغيرها وغيرها من المواقف اللي يدمى لها القلب هذا غير انه يطقها وهي بنت صغيرة ليلحين عمرها 22والكل لا زال ميت عليها ... تقول دايما يسب اهلي مع انهم احسن من اهله وحنا نعرفهم خوانها من خيرة الرياجيل لدرجة انه واحد من خوانها لاحظ انها دايما منقطعة عنهم ما تزور اهلها والسبة رجالها اللي مانعها لاحظ اخوها انها اذا زارت اهلها تكون شاردة والضعف ماكلها ومهمومة حس فيها اخوها فقال لها ما فيه روحة لزوجك تقعدين عندنا اليوم لين يتعدل لكن هي اللي ضغطت على اخوها انها تروح زوجها مروعها بحياتها يدش معصب ويسبها ويطلع وهو مبكيها
والله انا قلت لها حرام عليج تدفنين نفسج مع واحد مو صاحي ربي معطيج كل هالزين ومقابله واحد مو حاس فيج روحي عند اهلج لين يتعدل زوجك ويعرف قدرك تقول اكشخ له وهي على فكرة ذويقة لدرجة كبيرة لدرجة ان بنات عم زوجها ياخذون رايها بكل شي حتى ان وحدة تبي تجهز لعرسها طلبت منها تساعدها بجهازها
بس حتى كشختها مو مأثرة عليه تقول اذا اخذ اللي يبي مني زفني وطقني حتى المصروف ما يعطيني وخلاني في بداية زواجي اترك دراستي في الكلية وكان مو باقي الا سنة واتخرج وتركتها عشانه بس الحين شستفدت منه غير النار اللي بقلبي
حتى جوالي يفتشه ويحاول دائما يحطني بمواقف تنكدني واذا درى اني مستانسه ينقهر تقول دايما يتعمد يقهرني وينكد عيشتي ويتحسر على الابتسامة اذا ابتسمت ويفرح اذا شاف دمعتي .. يا ناس فيه زوج كذا؟؟!!
قبل شهر هي كانت حامل باربع شهور وطيحت تقول قبلها اقوله ودني المستوصف عشان مراتجعاتي للحوامل ويرفض بعدها حسيت بالام وقلت له ودني الطبيب قال حيل تعبانه قلت ايه قال احسن ومافيه طبيب تقول لين بعدها بكم يوم جاني نزيف وطيحت باربع شهور ...
شرايكم بهالوحشية ؟؟؟!!

تقول بالنهاية ابي راي البنات لانها تفكر بالطلاق وتقول انا كرهت شي اسمة زواج خلاص ابي اعيش عند اهلي مثلي قبل بنعيم وراحة بال لكن تدرون فيه ناس ليلحين حاطين عينهم عليها يعني هي تتطلق مني راح تنخطب بعدها لانها خلووووقة وفوق هذا ما فيه احد مثل زينها وجسمها

وهي تنطر مشورتكم لا تخلونها