سلام عليكم
اخباركم بنات حوا
كل عام وانتم بخير وصحة وسلامه يارب..
لي فتره مااكتب بالمنتدى كثير ومااشارك مثل قبل ..ليش ؟ .. مدري يمكن خلصت الهذره الزايده :22:
بس لفت نظري شغلات مختلفه عجيبه بحق وحقيقي
اولها
البنات اللي يحطون مشكله ويتمون يرفعون مواضيعهن بالشهور !!
كنت ادرس للامتحانات واختبرت وجات الاجازة وجا رمضان وخلص رمضان وجا العيد وخلص العيد والبنت برضها ترفع موضوعها وماحلت مشكلتها !! :eek:
مع العلم المشكله مهيب صعبه او معقده لدرجة انها تخليها بالاشهور محلك سر وماتتصرف.
قبل فتره كتبت وحده مشكله عاديه والبنات حطولها حلول كثييره وناااجحه وطبطبوا عليها ورفعوا معنوياتها وانا منهم
تدرون البنت وش كانت ترد بعد كل رد طويل عريض مليان حل جذري ناجح؟؟!!
(بنات شكرا على ردكم بس وين باقي البنات يلا انتظر ردودكم) :humm:
او
في بعض راعيات المواضيع مايردون على ردودنا ويكتفون بكلمة
(up)
!!!!
ماني عارفه بالضبط هي تبي حل ولا تبي تسوي مقال وتجمع اكبر عدد من الردود :blink:
يعني لو انها فعلا تعاني من مشكله كان استوعبت اول حل منطقي وراحت نفذته وافتكت
صح كلامي ولا موب صح؟
نجي للشغله الثانيه الي باطه تسبدي <<يبيلها تسبد جديده من بعد التبطبط الي صار لها
وحده تجي حاطه مشكله عن خطيبها ولا زوجها ولا اي واحد يهمها تبي حل
يجون بعض بنات حوا يشمرون ويكتبون الردود الي ماتمت للسناعه بصله <<طبعا مااتكلم عن الكل لان في بنات ماشاء الله ياكثرهم ردودهم تشرح الصدر بس انا اتكلم عن فئة .
من ضمن ردودهم
(اتركيه ) (اذا كان هذا اوله ينعاااف تاليه) (دامك على البر اتركييييه)
مايدرون شلون ردودهم تاثر على البنت واحتمال مشكلة البنت بسيطه بس يبيلها تفاهم عشان تنحل الامور
لكن البنات يشيشونها زياده ويخلونها تتأبط شرا :30: وتخبص الدنيا !!
طب ليش ؟
لو انتي ولا اختك كان كتبتي رد طويل بس عشان تريحين ضميريك وتفيدين الي تهمك لكن بنت الناس عرفتيها من نت ماهمك وش يصير لها. :mad:
مااحب ادخل مواضيع الحياه الاسريه لكن احب اتليقف بعض الاحيان لما وحده تكتب (زوجي خانني ) مو اتلقف على المشكله لاااااااا ..ابي اشوف ردود البنات الجهنميه:09:
امثله للردود الي يمه من قوة قلب الي تكتب هالرد
(انتي مستهينه بنفسك ..بعذره يستمر بخيانته ومايبطل لانه لاقي وحده على نياتها مهما خانها بتقعد ببيتها عنده ومرتبه البيت ومربيه العيال )!!
يعني تبغين فوق خيانة زوجها تحوس البيت وتشرد العيال عشان يستوعب سي سيد انها موب مستهينه بنفسها!!
تبينها فوق مصيبتها والمها ان زوجها يخونها تهمل بيتها وعيالها وتنكد على نفسها وماتطلع من دنيتها بشي كله عشان يفهم الاخ انها حزينه منه ؟؟ :mad:
يعني سعادتها وكل حياتها متعلقه بشخص واحد وليته شخص يستاهل ولا صاحي ولا عنده مرجله! :angry2:
حتى لو ماكان قصدك كذا كان وضحتي بردك القصد مو ترمين الكلام جزافا!!
الوحده مهما خانها زوجها او حتى لو كانت بنت وصعبت عليها امور بحياتها لا نرمي كلمتين ونمشي وهي تدبر عمرها
يعني هي جايه تبي حل لو حل بسيط مهما كانت المشكله كبيره ومعقده
ليش تحسسون الوحده انها ضعيفه وحقوقها ضاايعه دام صارت لها مشاكل !!
في جمله تعجبني ناسيه من قالها مع حفظ الالقاب.. بما معناها (كوني بطلة القصة لا الضحية )
يعني جزاك الله خير انتي وهي خلي التحسر والتحسف والردود الي تجيب احباط لك او لغيرك على جنب وقوي نفسك وتوكلي على الله وشوفي عمرك وسوي اي شي فيه مصلحتك وبس<<طبعا بما يرضي الله.
الرسول عليه الصلاة والسلام قال((إذا قامت الساعة وفي يد أحدكم فسيلة ،فإن استطاع ألا يقوم حتى يغرسها فليغرسها ))
الفسيلة من خلال بحثي عن معناها فسيلة النخل يعني صغار النخل وماتثمر غير بعد سنين !!
يعني الرسول امرنا مع قيام الساعه وهول ذاك اليوم اننا مانترك الي لازم نسويه ..مانترك الي فيه مصلحه لنا حتى عند قيام الساعه .
يعني يحثنا على العمل والعمل والعمل واغتنااام كل الفرص
فما بالك بلي صارت لها مشكله بسيطه مع زوجها او خطيبها او صديقتها او اي شخص مهم بحياتها او اي مشكله صادفتها بعمرها نقوم نحبطها ونبين ان مافيه امل ونقول المقوله المشهوره بهالمنتدى (اتركيه )او مانرد بس نكتب(مدري والله شقولك )او(ماعندي رد بس حبيت ارفع الموضوع)
دامنا بهالدنيا لازم نحارب وندافع عن كل حق من حقوقنا ومانستغني عن شي غالي علينا غير واحنا مجربين كل الحلول المنطقيه ..<<مااتكلم عن المشاكل الكبيره ضرب ,مخدرات ,تحرش الخ.. اتكلم عن اي شي فيه مصلحه لنا او لناس يهمونا .
هذا اللي كان بحلقي وكنت بقوله لكم ..
يارب تفهموني وماترمون علي صواريخكم
عاد اعرفكم تو سهرتكم باديه وفاايقين للهجوم :S_45:
Aشاي اخضر بسكرA @ashay_akhdr_bskra
عضوة مميزة
يلزم عليك تسجيل الدخول أولًا لكتابة تعليق.
معلمة وأم
•
صح لساااااااااااااااااااااااااااااااااانك
نعومه..
•
صح لسانك ونعم فيك وفأمثالك والله بهالمنتدى شفت بنات ينحطون ع الجرح يبرى الله يعطيهن العافيه وفي منهن الله يهديهن
الصفحة الأخيرة