مسكويه*

تتطلقي عشان أم زوجك هذا في رائيي غلط وأكبر غلط
اطفالك ايش ذنبهم في علاقتك مع جدتهم ؟

اذا زوجك طيب ولا فيه عيوب كبيرة ..الا سوء تفاهم يحصل بين كل زوجين
فاشوف مو سبب كبير لطلب الطلاق

وش استفدت من مواجهة أم زوجك والرد عليها ..

أنت تقولين إذا وقفت لها بالمرصاد وأخذت حقي راحت وقلبت زوجي علي..

ردة فعلها طبيعية .. طبيعي بتشكتي لزوجك منك .. لأنك ما احترمتيها .. لكن لو سكت وطنشت .. مالقت عليك طريق .. ومصيرها تمل مع الأيام ..

إذا ابتليت بأهل زوج من النوع هذا .. فمالهم حل إلا التطنيش .. زوجك مرتبط بأهله .. وماعنده استعداد يخسرهم عشان حرمة ..
وهو بين نارين الحين .. بين أمه .. وبين زوجته وعياله ..

وأنت حطي نفسك بمكانه .. لو كان زوجك ما يحترم أهلك وتعامله مو كويس معهم .. بتفكرين بنفس الطريقة .. بتقولين الزوج بداله زوج .. لكن أهلي لا ..

ولما تقولين كلامه مو زين مع أبوي .. يمكن يحس إن أهلك محرضينك عليه ..

والمفروض ما خليتي الموضوع يكبر .. ويمتد لفترة شهور ..

هذي فرصة تراجعين نفسك فيها ...

أنت طلبتي نصيحة والمستشار مؤتمن .. ولا تزعلين من الكلام اللي بقوله ..

أنا أشوف إنك ماحاولتي تكسبين أم زوجك .. أو يمكن حاولتي لكن محاولات غير جادة .. هي ما شافت منك لطف بالتعامل ..

وأنا أشوف إن سلفاتك أذكى منك في التعامل معها .. عشان كذا هي تعاملهم غير وتعاملك غير .. بينما انت تعاندين وتردين وتبينين لها انك ماتحبينها ..

وزوجك ملاحظ بعد انك ماتحبينها بدليل انك ماتبين تروحين لها في الأعياد .. وتتضايقين منها لاجت عندك في البيت .. وتعتبرين ان الغلط من زوجك كونه يجبرك على الذهاب لها ..

في هذي انت الغلطانه مو زوجك ... هذي أمه كيف تبين تقاطعينها ولاتجينها بالمرة بحجة إنك تتجنبينها وماتبين مشاكل معها..!!

وحسب مافهمت من كلامك أنك ساكنه ببيت لحالك .. طيب هذي نعمة من الله .. ماعرفت تستغلينها

لوكنت ساكنه معها بنفس البيت وش تسوين أجل .؟؟!!

غيرك عايشه مع أهل زوجها وتشوف أشكال ألوان من التعامل السيء .. ومع ذلك صابرة ..

اللي تسوينه الحين .. انك تتواصلين مع زوجك .. وتبين له انك عرفتي اخطائك وراجعت نفسك .. ومستعدة لأي تغيير يبيه منك .. وتجينه بالكلام الطيب .. مافي انسان ما يغلط .. وسامحني ع التقصير .. وما تجيبين أي طاري لأخطائه هو .. عشان يتقبل كلامك ..

ترى بالطريقة هذي بسرعه يتنازل .. لأنه في الأساس ما يبي يخسرك .. بس انت اللي وصلتيه للمرحلة هذي .. لأنك ماتتنازلين لأمه ..


الله يصلح أمرك ياررب .. ويجمع شملك مع زوجك ..

بلغينا وش يصير معك ..

السلام عليكم
حبيبتي انا مريت بنفس مشاكلك وزوجي مثل زوجك تحسينه مهملك ومطنشك ويفكر في نفسه بس واذا ولدتي مايعبرك لكن خلال تسع سنوات عرفت طبعه كل اللي يسويه من جهل وعدم معرفه شخصيته ضعيفه ويتأثر بالغير يتهرب من المشاكل بالسفر مايعرف يحل اي مشكله وعنييييد لأبعد درجه شوفي مع الايام راح يتغير بس لازم صبر وطويلة بال وتظهرين له دايم انه اهم شي عندك لازم تعلقينه فيك فيه اشياء كثيره مااقدر أشرحها الان مايمديني لكن لا تطلبين الطلاق ولا تكلمينه يرجعلك خليه براحته اصبري عند اهلك وعيشي مثل ماهو عايش انبسطي وسوي كل اللي ماكنتي تسوينه عنده حاولي تغيري في شكلك علشان نفسيتك تتغير وفوضي أمرك لله واطلبي منه يختار لك الخيره الطيبه انتي انسانه طبعك حار وهوه عكسك باااااارد علشان كذا يصير بينكم صدامات انتي نشيطه وصاحبة قرار وتحبي الاستقلاليه وهوه استرخائي ومتردد الحين سوي اللي قلت لك عليه وبعد ماترجعين اقلك كيف تتصرفين معاه واهله مالك الا التطنيش وخليك مبسوطه لاتبينين زعلك قدامهم والله العظيم اني عانيت مثلك واكثر من اهل زوجي ولازلت أعاني لكن قلت ليش أخرب حياتي علشان امه او اخته كلها كم يوم او كم ساعه وأكون في بيتي ورب الكعبه اني اقرأ المعوذات والأذكار وادعيه وانا رايحه لهم كل هذا علشان ارتاح من مشاكلهم وتدخلاتهم في حياتي حتى في زياراتي لأهلي واقاربي انقطعت عن الكل وكاني جيت من دار أيتام مالي احد اهلي في منطقه ثانيه مااشوفهم الا في الصيف يجون يصيفون المهم ان كل بيت وفيه مشكله مافيه احد مرتاح في الدنيا واصلحي علاقتك بالله ابتعدي عن المحرمات البسي لبس ساتر ابتعدي عن البنطلون والقصير عند الكل الا زوجك ولا تنمصين حواجبك ترا الحين صار شي عادي عند الحريم ونصيحه نصيحه نصيحه ابتعدي الأغاني والمسلسلات والله انها خراب البيوت ولا تنسين الصدقه والدعاء لها مفعول عجيب ادري طولت عليك لكن والله انها من قلبي مابغى احد يمر بشي مريت فيه واذا احتجتي شي ابشري الحين انبسطي وزعلك ماراح يغير شي غير يجيب لك قولون لا سمح الله وتذكري ان الأمر كله لله وماراح يصير غير ماكتب الله اسأل الله يكتب لك السعاده ويريح بالك ويجعلني واياك من اهل الجنه

ادعي اللهم ان في تدبيرك ما يغني عن الحيل