ياحكيمات ادخلوا ساعدوني.

السلام عليكم ورحمة الله وبركاته
انا ودي اطرح عليكم مشكلتي لعل منكم من تدلني على الصح ،انا متزوجة لي خمس سنين زوجي انسان طيب وحليل لكن الزين مايكمل زوجي انسان من عشاق القنص يعني المقانيص للبر وصيد الطيور وطبعًا رحلات تكون خارج مدينتنا وتكون شوي بعيده يعني اقل شي يجلس هناك ثلاث ايام واحيان يمتد الموضوع لأسبوع اذا عنده إجازه وطبعًا على راس شلته مجموعه نفس وضعه تحب القنص المهم هذي هوايته وآمنت بالله واقتنعت قلت زين ان عنده هواية يمارسها لكن زاد الوضع صار كل اسبوع يروح متخيلين يروح ثلاث ايام كل اسبوع غير ان عمله نظام استلامات يعني يمر الاسبوع ونشوفه بلمح البصر ويكون مكركب فيها ويجهز لروحه من رصاص وعزبه الخ ...المهم ياطويلات العمر انا ساكنه في حارة اهلي والبيوت قريب من بعض يعني هو يروح ويقول انا ماخليتكم في الخلا عندك اهلك واخوانه ساكنين بنفس العماره يعني قصده اذا احتجت شي فيه من يقوم فيني ،فكبرت عقلي وكنت لاهيه بجامعتي بس ذي السنه تخرجت وحسيت بالملل وحسيت انها فعلاً مشكلة تحتاج حل حاولت فيه يخفف واسبوع يطلع واسبوع يجلس لكن مافيه فايده يقول طيب وابشري واذا دقوا عليه ربعه فز وراح معهم بدون تفكير المهم اني بديت استقعد له على ذا الموضوع لكن دون جدوى لكن صار اليوم شي ماتوقعته ،قلت له امس اني بطلع مع اخواتي للمشوار تمشيه انا وولدي وقالي خلاص مو مشكلة موافق لكن اليوم جاني وقال دقوا علي الشباب بروح معهم وانتي روحي مع اخواتك انا هين ماقدرت امسك نفسي ليش ان شاء الله وش دخل اخواتي فيني اركب معهم (للعلم اخواتي كلهم متزوجين اخوانه احنا عيال عم )قال انا ادق على اخوي واقوله يشيلكم مع عياله ،وهذي حركاته اذا ابغى مشوار وهو بيروح ضبط الوضع مع اخوانه وانا غلطي سكت من البداية المهم قلت منك رايح ولاانا بروح كلنا ننطق بالبيت واذا بروح انت اللي توديني والا بلاش قال ماتبين تروحين لاتروحين وانا طالع مسكت الباب حق الصاله وقفلته ووقفت عليه قلت معليش ماراح تروح لو مدري وش يصير والمهم تشادينا بالكلام وسحب يدي عن الباب ودفني وبصراحه الموقف صدمني جلست مبلمه وقال هذا اللي تدورين عليه انتي من اليوم وطلع وماراح يرجع الا بعد ثلاث ايام انهرت من اللي صار وماتوقعته ابد والحين وش الدبره معه ايش اسوي ادخل احد من اهلي اروح لاهلي والا وش اسوي ؟!؟مخي مشلول دايم مشاكلنا اعديها واحل الموضوع بس هالمره غير عندي ولد عمره سنتين الله يحفظه..