شموع الدرب @shmoaa_aldrb
محررة
ياحوائيات .. أحذروا من التخفيضات في السوق وفتحوا عيونكم ... خاصة .....
السلام عليكم ياأحلى حلوات وحوائيات
بنات ... أنا صار لي موقف في محل في صحارى للاسف من المحلات الكبيرة .... وموقف يقهر ويغيض
رحت من كم يوم لصحارى .. وأشوف هالتخفيضات في هالمحل 50% .... واجمع تقريبا سبع قطع بعد مادخت وحولت عيوني لي ولخواتي ,,,
المهم وأروح للمحاسبة ,, وأحط القطع وأنا كلي ثقة ( وحول :icon32: ) الله يخلف علي .
ويقول المحاسب 790 ريال ( تقريبا )
وأقوم وأطلع الفلوس وأنا معتمدة وواثقة .... وآخذ الفاتورة وأدقق <<< الله يادّباشة
وأشوف كل تسعيرة .. ومكتوب نفسها عالفاتورة ,,, قلت أيه أكيد عملوا تخفيض عليها من قبل.
لإن عندي ثقة أن التخفيضات تُحسم على طول من الكمبيوتر ...
المهم وأرجع للبيت ونقيس أنا وخواتي ....
ولأول مرررة يابنات ماعجبت خواتي وأنا 6 قطع ... يعني أول مرة أرجع 6 قطع مرة وحدة لمحل .... بس عجبتنا قطعة وحدة ,,, والباقي اللي ماعجب خواتي واللي قياسها غلط ....
المهم وأحرص أرجعها ثاني يوم ,,,, عشان يرجعون لي الفلوس <<< هم حددوا لي 24ساعة فقط للترجيع .
وأقوم أرجعها .... وأخوي ينتظرني بره ,,, المهم والا ذاك المحاسب الهندي <<< شكله هندي
يرجع لي حول 300 ريال فقط ... والمفروض يرجع لي 750 تقريبا بدون القطعة اللي أخذتها ...
وأجي آباخذها أنا ووجهي ,,, وأنا طايرة عيوني ,,, قلت وش ذا ؟؟
قال مدام فيه تخفيض !
قلت وش تخفيضه ... أنا أخذت ال6 قطع كاملة ب750 وأمس دفعتها كاش ..
قال : خلاص الحين فيه تخفيض ...
ويجي محاسب مصري ... ويكلمني ويقول خلاص خلاص ( محصلش حاجة )
خير وش ماحصل حاجة !
والهندي يقول مافي الا هذي فلوس ويقوم يسفهني ويحاسب الحريم وأنا مرزوعة مطنشني ..!!
الا وأتصل على أخوي كان ينتظرني برا وجاء ... يوم شافوه المحاسبين الباقين ... يتركون زباينهم ويتفرقون في المحل ,,, ويتركون الهندي لوحده ...
وقام أخوي كلم الهندي بشويش ... تعال شف حسابنا !
والهندي طناش ... بعدين بعدين حساب كله صح ...
وكم وكم مرة ويقوم أخوي يرفع صوتهبالاخير .. ويفضحهم ويقول هذه سرقه علنية وأنا ماأطلع من المحل ألا وجايب شرطي ومن هالحكي ...
ويقوم الهندي .. يجي وينقز لعندنا ...
قال شوف بابا ... مين أمس حساب ؟؟ << يعني يسألني من اللي حاسبني أمس , منه الكاشير ؟
قلت ماأذكر شكله بس كأن لهجته ( .... ) ... ويقوم ينقز المصري .. يقول لالالالالا
حنا المصريين مانحاسب ... كان تونسي أو من هالجنسية ...
قلت : الله أعلم , ماأحط في ذمتي .. ماأذكره ...<< مرة ثانية أباخذ له صورة أحتياط .
قال الهندي : الكاشير اللي أمس حاسبك هو غلطان ماعملك تخفيض لازم تخفيض 50%
يعني لازم آخذ ملابس كلها تقريبا ب350 وهو حسبها ب790ريال تقريبا !!
..
هذه المشكلة الآولى .
طيب قلت الآن أبغى فلوسي ... ويقعدون ربع ساعة يسووون حالهم مشغولين ومهتميين ويحووسوون بهالكمبيوتر .. وآخرتها يطلعون 400 ريال ... تخيلوا .... ويقولون الكمبيوتر صح .
وهي يمكن دفعت 400 وتحسبها 790 <<< تخيلوا
ويقومون يوروني الفاتورة ... ويقولون لآخوي :
شف أحنا أمس عملنا تخفيض
ويأشرون على السعر الحقيقي مثلا ( 110 ) وتحته رقم ثاني مثلا ( 42 ) ويقولون هذا هو التخفيض !!
حسبنا الله ونعم الوكيل ..<<< يستغبونك لآخر درجة
وأرد عليهم ... هذا رقم المقاس ( مقاس البلوزة ) مو سعر التخفيض .
وعلى هالمنوال يمكن ساعة وهم يروحون للكمبيوتر ويرجعون ويحوسون ويرجعون .
آخرتها وصلت معي ..ومع أخوي ,, وقدام مجموع حريم بيحاسبون .
قال أخوي ,, هذه سرقة .. وأحد منكم ناهبها أو الشركة وجهازها تتلاعب فينا .
وفوق كذا ماعملتوا تخفيض ,,, وأستغفال بعد أنا بجيب شرطي وفوقها أبفضحكم على النت وأبشكيكم ... والنا س كلها تتفرج .
يوم قالها بجد وبقوة ... ويقومون يحوسوون بالجهاز 5 دقايق .. ويطلعون المبلغ كامل ويتأسفون ..
ويقولون : مانعرف مين اللي حاسبك ومين اللي ماخفض لك هو غلطان <<< طيب هو غلطان وأنتم ليش مدوريني السبع دورات ولا ترجعون فلوسي كاملة اللي دفعتها مقابل اللي رجعته .
الزبدة بعد هالقرقرة ......
أنا لاحظت للاسف من نفسي ومن كثير من الخوات .... وانتبهت حتى للحريم اللي جوا يحاسبون وأنا واقفه ... كلهم يرمون القطع ... وينتظرون بس هو يقول كم ؟ وهم يطلعون الفلوس .
الشئ الثاني : إذا أشترينا كم قطعة ... مانشوف الفاتورة بعد استلامها وقبل الخروج من المحل ..
وهل سعر القطع نفس المكتوب ؟
وهل التخفيض محسوب أم لا ؟
أنا للاسف توقعت الكاشير اللي يشتغل على جهاز , مايقدر يغش ... لآن كل شئ مسجل بالكمبيوتر .
لكن للاسف غش وعلني وحنا نستاهل ماندقق ... نثق ونرمي الفلوس ..
مو مثل ماشاء الله بعض هالأجانب ... تتفحص قطعة قطعة وتحسب ريال على ريال ,, وتبقر عيونها في الفاتورة وماتمشي الا وهي متأكدة .
وحنا للاسف ...
سوبرماركت والا محلات كبيرة .... عيوننا طايرة ..
وبس ننتظر كم ندفع ؟
وندفع وحنا الله يخلف علينا .
مين مر منكم يابنات في مثل موقفي علشان نتذاكر ونتوعى ونشغل العقل اللي وهبه الله لنا .
بلاش أستغفال زايد لنا ... رغم أننا نستاهل ,, لاننا متساهلين ومعتمدين .
وبالاخير ,,,, أتمنى دعواتكم لي
لاني تعبت وأنا أكتب ... بس مقهوررررررررة لا أحد يوقع بمثل وقعتي
وحبيت أنبهكم وأنتم نبهوا اللي حواليكم . وانشروا بالمنتديات ,,
كفاية دباشة منا .. وكفاية غش منهم ..
180
13K
يلزم عليك تسجيل الدخول أولًا لكتابة تعليق.
حسبي الله عليهم سبع التحاسيب علميني وش اسم المحل تراني انا انواااااااااااااع الدباشه انا مش من النوع الي يدقق احاسب وامشي
جزاكم الله كل خير
واللي طلب اسم المحل هو محل ( السواني ) اللي في سوق ( صحارى )
اللي قدامه ( ستار بوكس كوفي ) .
لكن الله أعلم ... الغش من نفس الشركة وجهازها أو نفس الكاشير !
على كل الأحوال ... الغلط مننا .... المال السايب يعلم السرقة .
ومشكوووووووووووووورة لدعواتكم ..
اللي ماكتب كلمة وتنبيه على الأقل يدعي :)
واللي طلب اسم المحل هو محل ( السواني ) اللي في سوق ( صحارى )
اللي قدامه ( ستار بوكس كوفي ) .
لكن الله أعلم ... الغش من نفس الشركة وجهازها أو نفس الكاشير !
على كل الأحوال ... الغلط مننا .... المال السايب يعلم السرقة .
ومشكوووووووووووووورة لدعواتكم ..
اللي ماكتب كلمة وتنبيه على الأقل يدعي :)
الصفحة الأخيرة
وبارك الله فيك على التنبيه
الله يجزيك كل خير يارب
ربنا يوفقك ويعينك ويعطيك على قد نيتك
اللهم اميين