ياحياتي يالعروسه.. الكل يبي ياكل منك قطعه.. وش الحل؟؟

صبحكم الله بالخير كلكم
كيفكم مع العيد واستعداده<<< ماعندها اعياد مرتاحه

المهم بادخل بالموضوع على طول >>> تو طفشت كتبت موضوع وروقت عليه واخرته ينقطع الاتصال ويروح كللللللله

المهم
بما اني عروس .. حالي حال كل العرايس كل تفكيري وش بيكون شكلي يوم الزواج مكياجي تسريحتي فستاني التصوير الزفه .... الخ <<< والله هم ماكن طلتي عليهم ساعه وحده بس.

المهم..
مسكت ارقام الماكييرات والكوفيرات اللي بالرياض ودقيت اسال عن الاسعار والشغل

المهم..
جاني احباط ان كل الناس يحسون ان العروس قاعده على كنز والا مهرها خرافي الكل لازم ياخذ حقه مني << مو باقي الا الخدامه تقول " انا راتب هدا شهر الف ريال عسان انتي في زواز"

من جد شي يقهر
المكياج اقل شي 2000 ريال وانتي طااااااااالعه وهو مسيرك بتمسحيناه قبل تنامين..
الشعر اقل شي حصلته 1500 ريال وانتي طالعه وهو اكيد بتغسليت العماره اللي فوق راسك قبل تنامين او على الاقل تفكينها..

ليش التضرب هذا علينا؟؟؟ والله المكياج مايفرق يقولون لك اضاءاه ومادري ايش وهم يحطونها اصلن للزباين العاديين مو بس للعرايس..
حتى لو كانو يحطونها للعرايس بس... انا مابيها..
قلت لوحده انا عروس بس مابي تحطين لي مكياج عروس ابي مكياج ثقيل بس..
تدرون شسوت ؟؟ عصبت ونافخت وسبتني قلت لها ليه عشاني قلت لك الحقيقه انو بالاصل مايفرق الا شي بسيط مايكلفك 50 ريال.. قالت هذا سوقنا يعني اعترفت بدون ماتحس..

والله المسأله بو بخل بس مسالة عقل ياناس يعني اذا المكياج الثقيل ب300 ريال عند اغلب الماكييرات سوي العرايس ب 500 - 600 ريال لكن مو تشطحين للآلآف.

المهم
استفساري الان لبنات الريـــــــــــــــــــــاض:
1- ابي كوفيرة شعر حلوه سعرها اقل من 1000 ريال وماتكثر سبراي وتجيني بالقاعه.
2- المكياج حصلت وحده اسمها ريما سعوديه بس لسا ماسويت بروفتها تقول ب900 ريال العروس .. حبيت اسال عن شغلها اللي جربته او شافت احد مجربه علما باني ماحب المكياج اللي كنه بودره او طحين على الوجه احب يكون كنه طبيعي بس تكون فنانه في رسم وتظليل تفاصيل الوجه والعين.

3- ابي رقم مصوره يكون اخراجها حلو وتجي من بدري تصور استعداد القاعه وخطوات مكياجي وشعري قبل الزفه لين ماطلع من القاعه ويكون سعرها معقول.

4- استوديو نسائي للتصوير الديجتال الفتوغرافي لاني تلخبطت ( ناس قالوا استوديوا ريما وناس قالوا لي اضواء ... انتوا اشرايكم)



بالنهايه حبيت اقول كلمه ياليت تكونون صادقين معي يعني مو مجرد دعايه اما لنفسك او لوحده ترجين من وراها منفعه وتسوين لها دعايه.. صدقوني مو سوء ظن فيكم بس لان الموقف هذا صار لي هنا في المنتدى وانصدمت انو في ناس يمدجون انسهم كذا لمجرد الدعايه... يعني جزاكم الله خير تحروا الصدق في هالايام الفضيله

والله يجزاكم خير ويدخلكم الجنه من اوسع ابوابها لانكم بتفرجون لي
الله يوفق اللي ماتزوجت ويرزقها الزوج الصالح..
والله يوفق المتزوجه ويسخر لها زوجها ويخلي لها عيالها..
والله يوفقني بزواجي وكل اموري ... ويخلي لي والديني..
والسلام عليكم ورحمة الله..