بسم الله الرحمن الرحيم
السلام عليكم ورحمة الله وبركاته
جت العطلة الصيفية والكثير من الناس سافروا اللي لمكة واللي للشرقية واللي لأبها
لكن أم سالم ماسافرت مثل الناس
سألتها إحدى المعارف ماسافرتوا يا أم سالم بها لعطلة
ردت عليها قالت
(وهـا لعجوز خلتنا نسافر!!)
العجوز اللي تقصدها أم سالم هي أم زوجها
بعد ما كبرت بالسن صارت تتعب وتمرض
وفي هذا الصيف دخلت المستشفى وأم سالم تتناوب على أم زوجها مع خوات زوجها
هذي تطلع وهذي تدخل
أم سالم تقضي وقت بمرافقة أم زوجها
تاركة بيتها
لكن الأهم هل احتسبت الأجر
بعض الناس يعملون خير وممكن يضغطون على أنفسهم لكن مع الأسف لا يحتسبون الأجر
مادام الوحدة قايمة قايمة بالعمل أو قد تكون مجبرة على خدمة أم زوجها عليها إنها تحتسب الأجر ولا تضيع أعمالها بالتأفف من أم زوجها
طيب أم زوجها مالها ذنب يوم إنها تتكلم عليها كذا
لو هي نشيطة كان ما حرمتهم من السفر
لكن المرض مو شي بإ يدينها يوم إنها تلومها على حرمانهم من السفر!!
,,,
وهذا أبوناصر سافر مع عياله إلى إحدى المدن للاصطياف رغم إن أم أبو ناصر تعبانة وما تتحمل الطريق ومع ذلك ماراعوا ظروفها واهتموا بصحتها وأثناء الرحلة تعبت عليهم ودخلت المستشفى!!!
إلى هذي الدرجة السفر مهم ولو على حساب صحة الوالدين!!
لو أم الزوجة هي اللي تعبانه هل الزوجة تسمح إنها تمرمط أمها وتسافر فيها عشان تنبسط هي وعيالها على حساب صحة أمها!!
لكن هذي أم زوجها ماهمها وبعض الرجال مع الأسف ما يراعون أمهاتهم
ألزم ماعلـيهم رضا زوجاتهم ووناسة عيالهم
,,,,
وهذا أبو محمد مارزقه الله بعيال ماعنده إلابنتين
البنات متزوجات ولاهيات بحياتهن
وزين منهن إذا مروا على أهلهن يسلمون عليهم
عنده زوجته تخدمه وكبرت وتوفت الله يرحمها وجلس وحيد وبناته ماعندهن استعداد يخدمونه
وجزاها الله خير وحده من محارمة تبرعت وأخذته عندها وقامت فيه تخدمه وتأكله وتغسله وكل شي تقوم ما شاء الله عليها تبـي الأجر من الله نحسبها كذلك ولا نزكي على الله أحد
,,,,
وهذا بيت فيه شيخ كبير بالسن لكن الله يرحم حاله
ما يراعونه ويقدرونه
إلى درجة أن الصغار يحاولون يثيرونه ويستهبلون عليه وأهلهم مع الأسف ما ربوهم على احترام الكبير
حتى أحيانا يشوفون عورته ويتغامزون بينهم ويضحكون عليه !!!
والأهل ما يهتمون باللي يسوونه عيالهم هذا مجرد عندهم واحد كبير ومخرف وموحاس باللي يصير حواليه!!!
يا سبحان الله هل الرجل إذا كبر بالسن خلاص ماله حق بالرعاية والاحترام !!
إلى هذي الدرجة التبلد عند بعض الناس ماهمهم إلا أنفسهم وعيالهم لكن أبوهم وأمهم مو مهم عندهم
خلاص نسوا يوم إنهم صغار
نسوا يوم أهلهم ما يبون أحد يضحك عليهم!!!
ويا ويل اللي يقول لهم شي!!!
,,,,
وهذولا عندهم جدتهم بالبيت و حا طين لها الخدامة
يطلعون ويروحون و يجو ن
وجلسة مع الجدة ما فيه!!
تعاني من الوحدة ويا ما نادتهم يجلسون معها
لو سوا ليف لكن لا حياة لمن تنادي
يعطونها أكلها بدري عشان ما تاكل معهم أو تتعشى معهم
وكل أمور حياتهم يخبونها عنها
حتى زواجات بناتهم وعيالهم آخر من يدري هي!!
قد يكون لبعض الناس العذر أنهم يخافون إنها تطلع أسرارهم لكن مو كل شي يخبونه !!
ومو معقول إنها آخر الناس تدري بخبر زواج أحفادها !!
وأحيانا تسمع من الناس أغلب أخبارهم وهي عايشة معهم بنفس البيت !!
لكن حيل الله قوي
,,,
وهذي تقول لإخوانها بعد ما توفى أبوها
خلو أمي تسكن بجنبي عشان أقوم فيها وأخدمها
وإخوانها ما رضوا
وش السبب؟؟
عشان الناس ما يلومونهم يقولون حطوها بجنب أختهم عشان يرتاحون منها
ويا ليتهم سكنوها عندهم
سكنوها ببيت بلحالها وما يزورونها إلا بالسنة حسنة
الحمد لله والشكر الأخت تترجاهم إنهم يسكنون أمها بجنبها وهم ما همهم إلا وش يقولون عليهم الناس !!
,,,
وهذا الجد من قل القدر له حاطين له مفارش وبطانيات قديمة
وتطلع منها روائح كريهة من قل الاهتمام والنظافة
البعض حجتهم انه كبير بالسن ويتبول على نفسه طيب هو إنسان من حقه أنه ينام على شي نظيف حتى لو ما ينتبه أوضيع فكره
أجل الصغار ليه نهتم فيهم ونلبسهم أحسن الملابس ونعطرهم وهم صغار مع أنهم ما يفهمون
هل ما نهتم بالواحد إلا إذا كان يعي ويدرك اللي حوله
لكن أحيانا يكون فيهم الخير
إذا خبروا إن أحد بيجيهم ويزورهم حطوله بطانيات نظيفة عشان ما يتفشلون من الضيوف!!
ليت الضيوف يجون بالصبح وبالليل عشان يهتمون فيه دايم,,,
وإلا لو تصير عزيمة بمدينه ثانية وما لقوا أحد يظفه طاروا به لو بعز البرد مع ما يجيه من تعب وبرد بالسفر لكن عندهم عادي
أهم شي ما يحرمون أنفسهم من العزيمة!!
,,,
المسنين يحتاجون منا رعاية واهتمام وكلمة بسيطة وطيبة تطيب خاطرهم
ومع كبر السن مايحبون الإزعاج والصجة فإذا حبوا ينفردون بحالهم نخليهم على راحتهم ولا نضايقهم
وإذا طلبوا شي نفذها لهم
واهم شي نعود عيالنا على إحترامهم وتقديرهم ومساعدتهم وتقديم الخدمات لهم
وسلوكنا تجاههم أبلغ مثال لعيالنا
فكل ماعاملناهم بطيب عيالنا بيقتدون بنا ويعاملونهم معاملة حسنة
أكلهم لازم نراعيه انه مايكون مضر بصحتهم خاصة اللي مريضين بالسكر والضغط وهذولا يحتاجون أكل خاص لهم
أحيانا يعانون من الوحدة فيحتاجون للطلعات أو زيارة صديق لهم أو قريب
و يوفر له بغرفته تلفزيون وإذاعة
الأم ممكن تسجل بتلقات تحفيظ القرآن عشان تستفيد من وقت فراغها
,,,
قال تعالى
(وقضى ربك ألا تعبدوا إلا إياه وبالوالدين إحسانا إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولا كريما,واخفض لهما جناح الذل من الرحمة وقل رب ارحمهما كما ربياني صغيرا)
,,,
لو فكر الولد أو البنت أنه بيجي يوم يمر عليه مثل ما مر على أمه وأبوه وش يسوي لو جحدوه عياله مثل ما هم جحدوا أمهم وأبوهم !!
إلى هذي الدرجة الإنسان واثق بصحته وعافيته
وإنه ما يتوقع أنه يوم يبي يحتاج عياله!!
ما فكروا إن برهم بأهلهم هو سبب في رضا الله عليهم وسبب في صلاح عيالهم بإذن الله,,,
يا أخوات كل هذا شي واقعي وهذا اللي أعرفه
لكن اللي ما أعرفه يمكن يكون هوا يل !!
اللهم أرحم ضعفهم وقل حيلتهم اللهم لا تحوجهم لغيرهم وارفع عنهم واغفر لهم
واجعل خاتمتهم حسنة
،،،
وصلى الله وسلم على سيدنا محمد وعلى آله وصحبه أجمعين
,,,
المهره الاصيلة
,,,
الرجاء نقل الموضوع للمنتديات العامة ليطلع عليه الرجال ويعرفون واجباتهم تجاه والدينهم
,,,
المهره الاصيلة @almhrh_alasyl
كبيرة محررات
يلزم عليك تسجيل الدخول أولًا لكتابة تعليق.
الصفحة الأخيرة
والبر سلف