ياربي سامحني اذنبت بس مجبوره عطوني شوركم

السلام عليكم

يابنات يمكن بعضكم يعرف سالفتي مع زوجي

ومرضه الي مالقينا له علاج المهم مابقى الا الحسد وصرنا ندور الحاسد

امس صدفه كنت مستقبله زميلتي من زمان عنها

المهم جلست تمدحني وتقول ماشاء الله عليك ياحظ ابو فلان فيك

ضحكت وقلت وش ينفع الحلا لا صار مافي حظ قالت لا ان شاء الله مافي ردى حظ

قالت يمكن زوجك محسود عليك ضحكت قلت شدعوا لو صدق انا اتضرر مو هو

قالت لا يمكن احد يبغاك وحاسده مااخذت الامر جد لين صارت تسئل وتدقق

قالت فيه احد من زملاه يكون عارف تفاصيل حياتكم وممكن يحسدكم لان حياته مو مستقره

فكرت مالقيت احد الصراحه ماخلينا احد حتى الهنود اخذنا اثرهم

قالت لا احد مو مرتاح مع زوجته وتحسينه مهتم بعلاقتكم

وسبحان الله جاء في بالي زميل لزوجي معدوم ماديا تقريبا

كانت لي علاقه بزوجته بس هي طيبه وعلى نياتها كانت تسولف له كل شي عني انا وزوجي

وتمدح قدامه وتجي تقولي سئل عنك قال كذا وكذا

وايام سفريات زوجي كان هو يجيب له بنات على حسابه وهو محتاج هالفلوس

والي خوفني انها كانت تقول انه يدري بكل صغيره وكبيره بعلاقتنا لانه كان يفتش جوال زوجي

ويقرا رسايلنا وكانت تدق ايام الزعل تسالني وش صار تقول ابو فلان قال دقي شوفي وش الاوضاع

زوجي يصير رئيس القسم الي يعمل فيه زوجها

مالكم في الطويله جت فبالي وخصوصا بعد ماتعمقت علاقتنا في عايلتهم تزوج على زوجته مرتين

وكلهن الله يستر عليهن ومو مرتاح معهم ابد على حد علمي

الحرمه من زمان قطعت علاقتي فيها وحذرت زوجي بس ماسمع

عاد جت فبالي السالفه وقلت كيف اقول لزوجي

لاني لو اقوله محسود علي بيصكني على جبهتي بيقول من زينك عاد :22:

فكرت وفكرت قمت دقيت عليه

سالته اخذت اثر فلان خويك قال تصدقين مااخذت منه هو الوحيد :o
وقبل مرض زوجي بيومين كان عنده

قلت تراني حلمت فيه حلم :(

استغفر الله وانا اكذب بس شسوي اعرفه مايسمع مني

قلت حلمت ان حرمته في الحلم تقول ان زوجها الي حاسد زوجي

وقال خلاص انا بجيب اثره

والله لا تلوموني لي سنه اعاني من سالفه مرضه وكاسر خاطري حتى السياره مايقدر يسوق

وليله بكى ونهاره تعب وعجزنا من شيخ لشيخ

المهم ابي اسألكم

وش حكم الكذب بالحلم بهالسالفه << انا عارفه حكم الكذب بالحلم انه حرام وانه يؤمر ان يعقد بين شعيرتين

بس كنت ابي اصلح الاحوال ومالقيت غير هالطريقه لانه مستحيل زوجي يقتنع

الشي الثاني هل من الممكن ان شخص يحسد زوجي على علاقتي معه وزوجي الي يتضرر مو انا

لان وضعه غريب مرات عسل معي ومرات يكرهني ويسبني بدون سبب

الي بترد بدعي لها من كل قلبي ولها الاجر ان تشافى زوجي ان شاء الله