ياربي لاتخسرني الأجر فاض بي لاتلومني يارب .. أبغى أفضفض لكم شوي

السلام عليكم ورحمة الله
راح أبدأ بقصتي على طول بداية من طفولتي .. أناالبنت الصغيرة في عايلتي وتحتي أولاد ذكور ابوي رجل متسلط من صغري تعودت على ضربه واختلافاته مع امي شبه يوميه يعني تربيت وسط جو عائلي متكهرب طبعا خواتي واخواني ماصدقوا يكبرون تزوجوا وتقريبا انقطعوا عنا بقيت أنا عند امي وابوي امي انسانه بسيطه طيبه ضعيفه استغل ابوي طيبتها وضحت بالكثير عشانه حتى تدهورت صحتها من صغري وفيها ضغط وسكر ..بعدما فضا البيت وتزوج اخوي الصغير قعدة امي صار البيت أكثر كآبه يمر الاسبوع ما دخل علينا أحد .. أنا موظفه ومو مقصرة مع أهلي ماديا .. المشكله بدت من جت امي أول جلطه قبل حوالي 5 سنوات وألزمتها دخول المستشفى لاجراء عمليه خطيرة طبعا كنت أنا المرافق لها بحكم عدم ارتباطي باسرة وهذا حق طبعا .. من هنا بدت قصتي وبدا عذابي اكتشفت بعد هالجلطه وشلون امي كانت شمعة البيت وصعوبة عيشتي بدونها خاصة مع ابوي الي للأسف الى هاللحظه ماقدرت أحبه أرحمه إيه بس أحبه لا .. مع اني عديت الثلاثين .. المهم امي بدت صحتها بالنازل من بعد هالعمليه وبعد الجلطه الاولى بسنتين جتها جلطه ثانيه بسبب صدمتها بسفر اخوي ( قعدتها ) مع زوجته دون مايعطيها خبر فارتفع ضغطها ونقلناها بالاسعاف للرياض والحمدلله على كل حال .. اخواني بعد مرض امي ازدادوا بعد عن البيت ونسوني صرت غالبا وحيدة كنت ذيك السنين حوالي 25سنه تقدملي كثير كنت أرفض عشان امي , صراحة تحملت مسؤوليه أكبر بكثير من قدرتي من طيحة امي صرت ام وبنت ويمكن أب بعد .. هلكت من الضيوف واستقالهم الحالي يوميا من بعد العصر الى بعد العشاء يتحمدون لامي على السلامة تعبت وعشت حياة جديدة وكبيرة والأمر مافي أحد جنبي ولا وحده من خواتي ولا بناتهم حاولت مرة تقف جنبي ولازوجات اخواني وياويلي أتكلم صبرت وعانيت بس عشان امي كل شي يهون , ابوي طبعا ماتركنا بحالنا صار بس يهاوش ويدور عالمشاكل صارت نفسيتي زفت والحمدلله ام مريضة وابو متسلط ولا اخوان ولاخوات تخيلتوا ومع هذا أشكر ربي عمري ماشكيت .. سبحان الله صار مرض امي سبب بقربنا لبعض تعودت علي وتعودت عليها أو بمعنى أصح أنا تعلقت فيها بزيادة ربي لايحرمني منها .. لكنها للأسف تسمع لكلام الناس بي , يعني مثلا اخواني وخواتي يحرضونها علي يقولون منى مسيطرة عليك منى ماتبغاك ترجعين زي أول منى تبغى تحكم البيت وصارت تفرغ هالشحنات بي صارت بيني وبينها مشاكل بسبتهم حسبي الله عليهم !
واذا جاء لها موعد مراجعه للرياض قامت قيامتهم لاتروح معاك منى مالها داعي ليش ؟ عشان مايبون يجون هنا عند ابوي يسون لها فنجال قهوة وفنجال شاهي طيب وامي مين يصلح دواها ويتابعها يقولون هي مو عاجزة !! طيب أنتم وشلون دريتوا انها مو عاجزة امي تنسى بشكل مو طبيعي ومافيه عندها تركيز وأخاف تغلط بأدويتها ..
أوقعوا بيننا لحد ماخلاص فاض فيني قلت الله أكبر هلحين أيام تنويمتها ماوقف أحد منكم عليها ولا قد استقبلتوا ضيوفها وانكسرت ظهوركم ولا قد استاذنتوا من الدوام لو مرة علشاني ترحموني من أنحرج من مديرتي يسكتون وامي تقعد تهاوش تقول لاعاد تخدميني ماأبغى منك شي وهي بدوني تضيع واقسم بالله عمري مامنيت عليها ولا حسستها اني تعبانه ولا حتى متضايقه ومع هذا ماسلمت .. ابوي هلحين قاعد يعصب علي يقول منى لاتروح للرياض معاك مراجعه واخواني رافضين يودوني معاها وخواتي شايلين يديهم حتى الشغاله رافضين ياخذونها عندهم يومين لحد مانرجع وابوي يقول ماتقعد عندي الشغاله قبت لامي البارح خلاص يمه روحي بلحالك وأنا أقعد عند ابوي وربي يابنات عشانها .. قسم بالله يضيق خلقي بلحالي ويفضى علي البيت اذا سافرت وأتوحش وابوي مقابل الدش 24 ساعه الله يهديه وأنا ملتزمة ماأبي هالخرابيط فما أقعد عنده .. بعد ماقلت لامي خلاص روحي صارت مشاكل بعد من اخواني وخواتي مو راضين بعد لأنهم ماتوقعوا أبتنازل لهم هالمرة فسووا مشكله جديدة وأنا من العصر لازمة السكوت بس عيوني حمر ودموع ومحروقه ومقهورة وشايله هم لسفر امي وقعدتي مع ابوي لأن ابوي مايطيقني وأنا خوافه منه بشكل مو طبيعي اذا شفته قمت أتنافض وهو يعرف اني أخاف منه من صغري بس ماقدر يزيل هالفجوة بيننا !! ابوي مأثر بنفسيتي مرة مرة خوافه وماعندي ثقه بنفسي من كنت صغيرة زميلاتي بالمدرسة يضحكون من ارتباكي وتنافض يديني والسبب ابوي يابنات أكرهه عجزت لاأحبه أخاف منه بجنون مع اني مسايسه الجدار يعني مو راعية حركات أصلا ممنوعه من المكالمات والطلعات والنت يالله بالله توسط لي اخوي وأقنع ابوي وحطه وياويلي تجي الفاتورة فيها مكالمات داخليه مع اني أنا ألي أسدد .. تخيلتوا يابنات وشلون وضعي !! وامي مسافرة بكرة ان شاء الله مع ولد اختها وأنا اقعدي قابلي الجدران وتهزئ الوالد .. يارب تفرجها والله تعبت راسي مصدع من كثر الصياح ولا ودي أشكي بس غصب عجزت أتحمل

دعواتكم يابنات ربي يختار لي الخيرة واذا بالموت راحة يعجلي فيه لأنه انسانه مالي أي خانه بين أهلي بالعكس أحس اني عاله عليهم ودي بالمعزة ولايذلني أحد بس ماعندي من يعزني عن منتهم والزواج ماقدر عجزت أوافق عمري ماحسيت ان الزواج حل بحالتي بالعكس أخاف اذا تقدملي أحد وتزود معاناتي حتى أنا مادري وشفيني بس تعبانه من هالحياة يارب تفرجها