السلام عليكم
و الله ماني عارفة كيف حصل كده ورررربي حسيت بخوف ورجفة غير طبيعية
جنب بيتنا في مشغل تشتغل فيه كوفيرا اثيوبية و كانت اعز من اخت بالنسبة لي فجأة مرضت و قعدت 8 شهور مريضة بامراض كثيرة و الله اعلم ايش كان السبب بس اظن كانت عين ماصلت ع النبي لانها كانت شاطرة و كانوا كل الزباين يطلوبها و بعد ما مرضت سار شكلها يفجع جسم ضعيف و هزيل و عيون ذبلانة و قبل اسبوعين دقت وحدة تعرفها و كلمتنا انها متنومة في المستشفى 3 ايام و كنا مفكرين نروحلها عشان نتطمن عليها بس ماتت في نفس اليوم اللي كنا حنزورها فيه و ما بلغتني امي الا قبل لا اروح عملي ب5 دقايق انا خلاص ذهلت و طول داكة اليوم عقلي يكذبني مو معقولة ماتت مو معقولة تكون خلاص راحت عن الدنيا وربي قاعدة اكتبلكم و عيني تدمع عليها و قلبي مفطور عليها و اني ما قدرت اروح عزاها .. امي راحت وواست زوجها اللي انكسر قلبه لموتها كيف لا و هي اللي كانت تصرف عليه لما قعد 7 شهور بدون شغل و كانت قايمة ببيتها و زوجها و عيالها و بسبب انهم اجانب كانت عيشتهم صعبة وولدها اللي عمره 6 سنين مدري 5 كان يفرش سجادته على اخر الليل و يدعيلها بالشفاء و كانت تحكينا كيف لقى محفظة جاره و اخذها و لمن سألته من فين جبتها قال لقيتها ضايعة و هو كذاب و لمن اصرت عليه قالها انا دايما اشوفك تدي بابا فلوس عشان السجاير عشان كده كان يبغى يعطيها عشان ما تكون محتاجة شي و ببنتها اللي ما كملت الاربع سنوات اتخيلها تقول فين ماما فين ماما و قسم بالله خنقتني العبرة و سرت اتخيل نفسي اني ممكن انام و ما اقوم تاني يارب رحمتك بأمتك الضعيفة
ما حسألكم بالله لكني اتمنى تدعولها بالرحمة و المغفرة و انو مرضها و الامها تكون تكفير ذنوبها
يارب اجعل مثوها الجنة و ارزقها من اعظم خيراتها و اشربها من نهر الكوثر و اشفع لها و اغفر لها ذنوبها و ارحمها انت مولاها و ارحم بها من جميع خلقك
اللهم اتنا في الدنيا حسنة و في الاخرة حسنة و قنا عذاب النار ولا تزغ قلوبنا بعد اذ هديتنا
اللهم احسن خواتمنا و توفنا مسلمين و ارزقنا نطق الشهادة عند الموت
و الله يا بنات سرت اخاف من الموت سرت اخاف من النوم و كل مااشوف اي عداد احس انو بيعد الثواني اللي حعيشها يارب ارحمنا برحمتك
سوسة المكسوفة @sos_almksof
عضوة فعالة
يلزم عليك تسجيل الدخول أولًا لكتابة تعليق.
يارب اجعل مثوها الجنة و ارزقها من اعظم خيراتها و اشربها من نهر الكوثر و اشفع لها و اغفر لها ذنوبها و ارحمها انت مولاها و ارحم بها من جميع خلقك
الصفحة الأخيرة
اللهم اتنا في الدنيا حسنة و في الاخرة حسنة و قنا عذاب النار ولا تزغ قلوبنا بعد اذ هديتنا
اللهم احسن خواتمنا و توفنا مسلمين و ارزقنا نطق الشهادة عند الموت