يارب رحمتك قامت المشاكل تتحاذف على اهلي

السلام عليكم حوائيات
انا مهمومه وحزينه :44:


انا ماابي حلول من احد بس ابيكم تواسوني

لاني في الحاله هذي مااقدر اشكي لا لأمي ولا لأبوي
ولالآحد من خواتي لاننا كلنا مهمومين

مااقدر اشكيه غير لله سبحانه ثم لكم

السالفه يابنات ان اهلي ساكنين في حارة كلها مشاكل في مشاكل
من الى وطبعآ اغلبها من الشباب
وكانوا اهلي ساكنين ومرتاحين لين بلغوا اخواني الشباب

وصاروا يطلعون في الشارع ويحتكون بعيال الحارات اللي جنبنا

وآه آه من عيال الحارات هذي مااحد يصدق ان الثاني يطق او يهاوش او حتى يتكلم على الثاني
على طول على الشرطه شوى وتجيه الشرطه تستدعي المشكي

واخواني من ضمن المشكيين:angry:
تخيلوا بنات
اخواني ثلاثه كل واحد في مرحله اللابتدائي والمتوسط والثانوي

هالشهر كل ماطلع واحد من الاحداث دخل الثاني

الاول مشكلته دخل في هوشه مع واحد طب في سطح عمي واستفزعه ولد عمي وراح معه اخوي وضربه ضرب

لين نقع في دمه يقول وش جابه في سطح عمي وهو مافيه الا الحريم
ولان ولد عمي وحيد ابوه يعني ماعنده اخوان شباب اخوي مارفض له طلب
وقام هذا المضروب واشتكى على اخوي وووقفوه في دار الاحداث 4ايام:buck:
وبعدها تنازل وطلع لانه هو بعد عليه حق انه طب في سطحهم مقابل انهم بعد يتنازلون عن المضروب لان عمي شكاه على هالسالفه
انتهت مشكلة اخوي اللي في الثانوي

جت مشكلة اللي في المتوسط

كان حاضر مضاربه في الحارة وواحد من اللي في المضاربه
يصير صديق اخوي وهالواحد ضرب له واحد ثاني ضرب قوي كسر اسنانه

ويوم جت الشرطه لموقع المضاربه كلهم هجوا

ومادرينا الا الشرطه عند باب اهلي تقول ولدكم مستدعى وراح الوالد الله يعافيه
وقال وش السبب ولدي ماله دخل ولا ضرب احد
قال بس المضروب قال انه صديق اللي ضربه
وولدك يعرف بيت اللي ضرب ويقول انه صديقه
واخوي جحد انه يعرفه وانه حضر المضاربه
لان قال له خويه اللي ضرب
داخل على ثم عليك انك ماتقول له وين بيتنا ولا انك اصلآ تعرفني اذا سألوك

واخوي قال خويي ترجاني ومانيب مخيب رجاه فيني

حاولنا انه يعترف عليه ورفض قال انا مانيب حرمه اغير كلامي

والمشكله ان اللي ضرب سافر لاخوه في الشرقيه علشان مايلقونه الشرطه اذا فتشوا بيت اهله

والولد المضروب قال انا مااتنازل عن خويه يقصد اخوي لين يجيب لي اللي ضربني هو يعرف وين راح

واخوي جحد
ونقلوه لدار الاحداث وجلس هناك اسبوع وبعد ماشافه خويه طول جاء وسلم نفسه
وطلع من الدار بسلام


وبعد 4 ايام بالضبط

جت سالفة اخوي الللي بالابتدائي

وهذي اللي هلكت حيلنا واتعبت نفسياتنا :icon33:

اخوي ذا حاله حال نفسه:lookaroun

ماله في المشاكل

وهو طالع امس العصر للبقاله
لقى ولد من عيال الحارة
بس اصغر منه
يمكن في رابع واخوي في سادس
يقول اخوي لقيته ماسك قطوة
ويضرب فيها الجدار وهي حيه
يقول وانا اطقه وافك القطوة منه

بس يقول ماطقيته قوة بس ضربته كف ودزيته

يقول مادريت الا طالع لي اخوه الكبير بالمتوسط

يقول يوم شافني طقيت اخوه يقول وهو يتلفظ علي بكلام غير اخلاقي

وهو يضربني بكيسه معه على راسي

عاد اخوي يقول هو اكبر مني وماقدرت ادافع عن نفسي

قام اخوي طعنه بالقلم في ذراعه

ورجع للبيت وحالته حاله بعد ماعلمنا بالسالفه

اليوم اخوي طلبته الشرطه ورفض يتنازل ابو الولد وقال ابيها شرع

ابوي قال اللي تبيه حاضرين به والمسأله ماتحمل حتى هو تلفظ على ولدي بكلام واقدر اشتكيه ورفض ابو الولد

وسجنوا الولد لان ابوي اتهمه بالتلفظ على اخوي وحولوا اخوي بعد قلبي لدار الاحداث قبل شوي

وماندري ايش بيصير

القضيه بتتحول للادعاء العام

امي حالتها حاله:icon33: والبيت قايم قاعد وابوي احسن انهد حيله كل يوم مشاكل في الشرطه
وهالحارة مايملون ياشاكي يامشكي

ابوي من اليوم ناوي يدور حارة غير الحارة ذي ملينا اذا طلع احد نخاف انه يطيح في مصيبه
حتى اخواني صاروا مايحبون يروحون للبقاله يقولون نخاف احد يتبلانا.


ادري طولت عليكم بنات بس سالفتنا سالفه
اختي نفاس عند اهلي بدل ماترتاح جت في عز المشاكل الله يعين بس:09:



انا ماابي منكم غير الدعاء لنا ان الله يفرج كربتنا ويهون على امي المسكينه حالتها حاله كل مارتاحت من مصيبه طاحت في الثانيه..


ورجاء اذا فيه ردود مالها داعي فاأنا في غنى عنها مانيب ناقصه مغثه اللي بتقول خير جزاها الله الف خير
واللي ماهيب قايله خير الله لايسامحها.



:26::26::26: