يارب لك الحمدحتى ترضى..قصة ولادتي في الحبيب الريان

هلاوالله بكل الصبايا الحلوين الرشيقات حبيت اقولكم قصة ولادتي ببنوتي الثانيه 
انا دخلت التاسع من نص رمضان ولافكرت امشي خفت لااولد في رمضان ، مع انه تعب الا انه الحمدلله تم الله لي صيام رمضان ، وعيدت واستانست يالله لك الحمدوالشكر ولامشيت ولاسويت اي شي من المسهلات خفففت من الولاده لان هذي ثاني ولاده لي وخابره كل شي الولاده والطلق والوجع ،المهم قبل العاشر بيومين يوم الاحد 13/10
مشيت ساعه الاربع وحسيت بعدها بالام خفيفه ونمت وقمت الصباح ع اوجاع مره تشتد معي ومره تخف لكن ماهي متواصله وكلمت زوجي  في دوامه وعلمته قلت ترى معي الام خفيفه تروح وتجي خل جوالك مفتوح ومن بعد الساعه 10الصبح يوم الاثتين اشتد معي الألم رحت تروشت بمويه دافيه مايله للحراره وخف الألم وصارالوجع يجيني كل ساعه وتحملت الألم وكل ماشد الالم معي تروشت بمويه دافيه مايله للحراره وصبرت اليوم كله ع الألام لانه مانزل معي لامويه الجنين ولادم وخفت اروح المستشفى ويتعبثون في ، وقعدت انظف البيت ولاجتني الطلقه قعدت وكااان فيني نوووم بس لاانسدحت ع ظهري زاد الالم وماقدرت انام ،جت الساعه 12،30الليل وانا مااكلت خفت لاتجيني الولاده وارجع الاكل لانه بولادتي ببنتي الاولى اكلت قبل الولاده ورجعت وحست الدنياوكل شوي اغير لبسي من الترجيع ، بس الجوع ذبحني تعشيت واثناء ماكنت اتعشى جتني طلقه قويه ماتحملت وجعها ، واروح اركض للحمام وانتم بكرامه واتروش بالمويه الدافيه والحمدلله خف الألم وانا فيني نووم
مانمت من الفجروواروح انام وانا قاعده سانده ظهري ع الكنب لانه اذا انسدحت شد الألم ونمت وبعد ساعه ونص صحيت ع الم قوي ولاجاني النوم قمت تمشيت في البيت ولاجتني الطلقه وقفت وكان فيني نعاس رهيب ، بين طلقه وطلقه يجيني نووم دريت ان الولاده قربت ، بس تحملت لانه مانزل معي شي وقعدت للفجر امشي واستغفروصليت الفجر والوجع كل ماله يشتد والساعه ست رحت اتروش بمويه دافيه وبعدها شربت كاس بابونج ويانسون ودهنت ظهري بزيت سمسم داافي وخف الالم الحمدلله وقعدت على هالحاله والالم يروح ويجي الى الساعه 12الظهرمن يوم الثلاثاء ومن بعدها الالم مايحتمل فقمت ووولمت شنطة المستشفى واغراضي ورحت للمستشفى مع انه مااودي اروح للمستشفى وموية الجنين مانزلت معي ، ورحت للمستشفى الحبيب الريان ودخلت الطوارى وجت الدكتوره بتكشف علي وقالت خلاص ولاده الرحم مفتوح 5سم ورقوني فوق للغرفة الولاده وسئلوني من تبين يولدك قلت الدكتوره خالده لاني متابعه عندها وماشاءالله من جيت في غرفة الولاده الاالدكتوره خالده عندي وتكشف علي ووصت الممرضات يسوون لي قسطره ونزلت لعيادتها ، وجتني ثاني مره الساعه 3العصر وسوت لي قسطره وقالت للدكتوره اللي بالطورائ فكوا موية الجنين وفكت المويه والالم زااد مايحتمل ويعطوني ابره مهديه والاكسجين ولكن الالم مازال شديد معي واناجوووعانه ماااكلت شي وجتني الممرضه قالت لازم اكل شي البيبي نام واشرب عصير ومن بعدماشربت قالت الممرضه تحرك بيبي ،ومن بعدها قعدت ارجع كل شي قالت الممرضه كوويس قريب البيبي بيطلع وجت الساعه 4،30حسيت شي قوي ابي ادفع واقول للممرضه بادفع قالت خذي نفس وتكشف قالت شاطره الحين ولاده وتنادي الدكتوره خالده ويجتمعن الممرضات حولي وخلال ثواني جتني الدكتوره وتقول يالله ادفعي وانا اصارخ من الالم قالت يابنوته ترئ هذاالصياح ماراح يفيدك امسكي نفسك وادفعي وادفع ومع خامس دفعه طلعت بنوتي يالله لك الحمدوالشكر،والدكتوره كان عندهاحريم تولدهم كثير ذاك اليوم وقالت باخيطك بعدساعه وراحت وجتني تخيط ووالله حسيت بالام الخياطه ،بس الدكتوره والطاقم كله عسل واخلاقهم حلوه وبعد ساعتين من الولاده طلعوني لغرفتي وعنايتهم جدآ ممتازه وغرفهم تهبل وتوته توته خلصت الحتوته.
النصائح /
إحسان الظن بالله ان الله بيسهل ولادتك وبييسرها(اناعندحسن ظن عبدي بي) .
كثرة الاستغفار والدعاءبتسهيل الولاده.
التروش بماء دافي مايل للحراره له مفعول عجيب بتخفيف الام الطلق.
لاتعبثين بروحك وتاكلين من هالمسهلات متى ماالله راد بيكتب لك الولاده.
المشي حلو للتسهيل الولاده مع انه في الشهرالتاسع مامشيت الامره وحده قبل مااولدبيوم ولكن بعدها بدأت الام الولاده.
قراءة ورد الولاده ع نفسك.