يارب لك الحمد أنا حامل تعالو شوفو قصتي مع تأخر الحمل وضعف التبويض..

بسم الله الرحمن الرحيم
السلام عليكم ورحمة الله وبركاته..
اللهم لك الحمد كما ينبغي لجلال وجهك وعظيم سلطانك..يارب ماأكرمك وما أجزل عطاياك..
رب اني لما أنزلت الي من خير فقير..
غالياتي بنات حواء كلنا تشاركنا الألام والمعاناة والبشرى لكل وحدة منا تعني الفرحة للجميع..
الله لا يحرمكم من أحلى لحظة وهي كلمة
أنت حاااااااااااااااااااااااااامل...
بفضل الله وحدة أنا حامل :27:...بعد تأخر 3سنوات و6 شهور عانيت فيها الأمرين وعرفت من هو الصاحب الحقيقي وانصدمت من أشخاص عزيزة علي ((الله يسامحهم ))
طبعا مرت هذه السنوات طويلة وفي كل شهر أحن وأتألم وأكتب رسائل لطفلي المنتظر..
حاولت أنسى الحمل بس ماقدرت كل شي حولي يذكرني في الأطفال عاد أنا أموووووت في الأطفال..
السنة الأولى من زواجي ماحملت لأن زوجي كان يعزل وكنت أحترق وأبي أحمل وحسيت بالأحباط ..وبعد سنة ماقدرت أتحمل الوضع وكنت أبكي كثير وأقول ليش زوجي أناني ومايحس فيني..؟
وصادف أنه قرأ مذكراتي وقرأ رسائلي لطفلي الذي لم يأتي بعد..واتأثر كثييير وانصدم من مشاعري..
وبطل يعزل طبعا سبحان الله كانت دورتي منتظمة وفي السنة الثانية تلخبطت بقوة وتأخرت 10 أيام قلت خلاص أكيد حامل..
رحنا المستشفى وحللت ويوم طلعت النتيجة قاللي الدكتور مدام انت مو حامل وعندك لخبطة شديدة في الهرمونات وطلب أني أوزن وكانت الصاعقة الثانية أن وزني 82 بعد ماكان وأنا عروس60 :06:تخيلو كله بسنة وحدة قسم بالله نسيت الحمل وقعدت أصيح من وزني وحولت على طول على أخصائية تغذية وتابعت معاها ومع الرياضة والنادي وخلال 9 شهور نسيت الحمل تماما وكان كل همي أني أنحف ونزل وزني ل66..وقلت خلاااص أكيد بحمل قريب وكل من سألني أقول بثقة قريب إن شاء الله ..((وحدة مصدقة نفسها مرة))
المهم انتظمت دورتي بعد مانزل وزني ودخلت بالسنة الثالثة وكانت أصعب سنة مرت علي بسبب التجريح من الأهل والجيران واكتشفت أن عندي ضعف شديييد في المبايض حاولت أنشطها طبيعي بالعسل والحلبة لمدة 5 شهور بدون فايدة وقلت مافي ألا الكلوميد ودخلت معاناة التنشيط وكان حلم عمري أن توصل البويضة بس 17 مل..
جلست عالكلوميد3 شهور وكل مرة مايصير إباضة وريحت شهر وبديت من جديد وبعد شهرين صار إباضة وحجم البويضة 15 وعطتني ابرتين تنشيط على مدى يومين ولما وصلت البويضة 18 عطتني ابرة تفجير وكنت أول مرة أخذها وقلت خلااااااااااااااااااااااااااااص بحمل أكيد أكيد:hahaha:
المهم بعد14 يوم نزلت الدورة ونصدمت كثيييير بس أول مرة أقول اللهم اجرني في مصيبتي واخلف لي خيرا منها..
المهم ضليت حول 6 شهور يصير تبويض وأبر تفجير ومايصير حمل ..خلاص من جد جاني احباط وأكثر شي حطمني وكسر نفسي أن أمي حملت وخبت علي وماعرفت الا وهي بالشهر 3 من خواتي ولما سألتهم ليش تخبي عني قالت لي أختي أن أمي قالت العين حق وبعدين هي_اللي هي أنا_ محرومة أخاف تزعل..
أنا انجنييييييييييييييييييييييت وبكيت من كل قلبي:44: وصادف أن كذا وحدة من معارفي حوامل وحدة بالشهر 5 ووحدة في 6 ومخبييين علي وصادف ولادات صديقاتي كلهم طبعا بالثاني مو الأول..
والله لوأوصف من الحين لييييين بكرة حزني وبكائي مابخلص..أدريييي طفشتكم بس تحملوني ..
أنا في هالفترة تركت العلاج..
ورحت الدمام في عيادة شروق الهدى وعطيت الدكتورة ارشيفي وسوت لي سونار
وانصدمت ..قالت ياقلبي انت مشكلتك بسيطة وأنا شايفة بويضااات كثيرة وكبيرة وشكلها من دورات سابقة ..
يعني تخيلو كل البويضات اللي كبرو ولاوحدة خرجت من المبيض..لأن في كيس على المبيض منع خروجها ومافي حل ألا أني أسوي تخريم للمبيض..
رجعت البيت وجلست على سجادتي أشكو ربي ..يارب أنا ضعيفة ومالي أحد غيرك..يارب تعلم أني لم أتسخط من قدري يارب لا تخيبني ..وبكييييت من كل قلبي
هنا خطرت ببالي الحجامة وقررت وعزمت أني أسويها وانتظرت الدورة ومن ثاني يوم دورة_لازم ثاني يوم_رحت للمحجمة وقلت لها حالتي وطمنتني وأول مرة ينشرح صدري وسويت الحجامة على المبايض ..
ورجعت البيت وأخذت زيت زيتون وقريت فيه سورة البقرة وصرت أخلي زوجي يدهن ظهري مكان الحجامة كل يوم..
وبعدين رحت أتابع التبويض لأني حسيت بألم المبايض علما أني ماأخذت كلوميد بس الحجامة ونسيت أقولكم استخدمت ولأول مرة خلطة عيون وليد ((الله يجزاها ألف خير))المهم بفضل الله كان في بويضتين وحدة 17 والثانية 19 وأخذت ابرة تفجير ورجعت بعديومين أتأكد أن البويضات تفجروا((لازم تتأكدو))والحمدلله انفجرو
رجعت البيت وقريت سورة البقرة ودعيت ربي أنه يرزقني ولا يحرمني وظليت مواظبة على القراءة وقيام الليل والإستغفار ..وسبحان الله صادف اباضتي قبل يوم عرفة بيوم واحد وفي يوم عرفة حلمت حلم جميل وهو أن الدورة جاتني لكن بدل ماينزل دم ((وانتو بكرامة))نزل من مخرج الدم وردة جميلة ومسكتها بيدي أتأملها ..ولما فسرت الحلم قاللي هذة رؤيا مبشرة بالإنجاب ..استبشرت خير..
.وبعد 15 يوم بالضبط من الأبرة التفجيرية رحت للمستوصف((طبعا قلت لزوجي أنه عندي التهابات وماقلتله أني بحلل)) وحللت دم وماأخذت النتيجة رحت البيت وكان عندي طمأنينة أنه حتى لو مافي حمل عااادي ربي بيعوضني..
المهم سويت شوربة وجالسة توي بشرب الا التلفون يرن..
رديت الأدكتورتي تقوللي وينك يامدام أنت ليه مستعجلة ؟؟
قلت خير إن شاء الله؟؟
قالت خلاص تعالي بكرة أديك مثبتات وحمض الفوليك..
قلت بانفعال ..طيب ويش النتيجة؟؟
قالت في حمل..
قلت بدون وعي ..
كذااااااااااااااااااااااااااااااااااابة ..((خخخخ مدري من الصدمة))
قالت ..مالك يامدام إحنا مصلحتنا إية لما نكذب عليكي..قمت ابكي قلت لأن هذا أول حمل لي بعد 3سنوات و6 شهور
قالت مابعد الصبر الا الفرج..شكرتها ..وسكيت السماعة ..
وقسم بالله أن الجو كان بارد وانا زي النار قاعدة أغلي وودي أبشر زوجي بس كان في العمل ..رحت توضيت وصليت ركعتين وسجدت سجود شكر وحمدت ربي ودعيتة أنه يتمم لي على خير ..
طبعا الشوربة رجعتها القدر ماقدرت أبلعها من الفرحة..
ولما جا زوجي ..جلس يتعشى وانا سااااكتة..وقال لي تدرين وأنا جاي وش قاعد أفكر فيه؟؟قلت شنو..
قال تخيلتك تقولين لي أنك حللتي وانك حاامل ..بيكون أحلى يوم في حياتي..
هنا ماقدرت أتحمل دموعي طاحت وقاللي أسف اذا جرحتك..
قلت لااا يالخبل..((أول مرة اسبة في حياتي لكن بعد من الصدمة خخخخ))
أنا حااااااااااااااااااااااااااااااااامل
قال أسألك بالله؟؟ قلت إي والله..تدرون انه صار أحمر وأزرق وقام عن الأكل وفتح المكيف وقلت له انت مجنون الجو بااارد وجيت بضمه الا ألاقية زي الناااار ياعمري ولا قاللي ولا كلمة..
اتفقنا مانعلم أحد الا لما نتأكد وبعد اسبوعين بالظبط سويت سونار وسمعت نبض البيبي وشفتة وكان صغييييييييييييير مرة :04:وقمت أبكي الحين حسيت أني حامل من جد..وخبرت أمي وأمة ولزمنا محد يتكلم..بس جدتي من الفرحة قالت لكل النااس..وأكثر شي أثر فيني جدي بكى لما سمع الخبر وقال الله يبلغني وأشوف بنت حفيدتي ..
وبس هذة قصتي أتمنى تكون عجبتكم ..الله يرزقكم ولا يحرمكم ..دعواتكم لجنيني انه يثبت ويكون طفل صالح تام الخلق والخلقة وبار فيني وبأبوه..