يارب ولا وحده تشوف اللي شفته بحياتي .. الحمد لله على كل حال

السلام عليكم ورحمه الله وبركاااته


شلونكم حوائيات عساكم بخير , اناعضوه جديده وماسجلت الا عشان تشاركوني همي و تحاولون تلقون لي حل لاني والله في هم عظيم لايعلم فيه غيررب العالمين
انامن فتره افكر اقول موضوعي هنا او لا بس تشجعت لماشفت انكم هنا بالمنتدى كانكم عايله وحده ووتتشاركون بكل شي ماشاء الله فحبيت اشاركم .

انا باختصار تزوجت وانا صغيره ورحت مع زوجي من مدينه الى قريه ماكان فيها حتى التليفونات والاضاءه كانت تشتغل بالدينمو , متصورين كيف وضعي صار ؟؟

كنت صغيره بالعمر وزوجي اكبر مني بـ8سنين , وتزوجني لانه بس يبي يكون برستيج قدام اخوياه وعيال عمه , البيت الي سكنا فيه كان لاخوه وجلست 11 سنه و جبت بناتي عندهم , كان طول وقته مسافر مايجلس بالديره الاوقت الدوام وغير كذا طول اجازته برى مسافر راح لكل ديره ,وصل حتى اندونيسيا والفلبين ,

كنت اخاف منه لانه عصبي ومستعبدني و مايعرفني غيروقت المعاشره , يمنعني من كل شي حتى السوق ما اروح له , بناتي كنت احبسهم بالغرفه عشان ماحد يضربهم من عيال عمهم لانهم كبار , وامهم كانت ناشبه لي بالطلعه و الدخله وكانت تكرهني , حتى الطبخ ماكنت ااعرف اطبخ وكانت تحسدني و ماتعلمني لما اسالها ومع كل هذا كنت اسكت وامشي الى ان زوجي فكر انه ينتقل و يروح يسكن بمدينه لان هالقريه ماعاد فيها غير الشيبان , وانا اخر من يعلم بالنقله هذي الكل كان عنده خبر الا انا .

يوم نقلنا سكني فشقه اقل من المستوى , مع انه باستطاعته يسكنا قصر , سكت و تحملت حتى غرفه ماكانت لي غرفه كنت انا وعيالي ننام على الارض و البطانيات الي كنت جايبتها معي من قريتهم , جلسنا كذا ثلاث سنين , حتى الملابس اقسم بالله احطها بكراتين , وكان يتاجر بالسيارات يبيع ويشتري ووقت الاجازه يرميني عند اهلي حتى ريال واحد للمصروف مايعطيني اياه و اهلي هم الي يصرفون علينا انا وعياله وكنت ساكته وماحسيت بشي مضايق اهلي بالعكس اذا جيتهم فرحوا بي انا وعيالي و شالونا شيل ,

ويوم جاء زواج خواتي والله يا بنات ما مد لي غير 800 ريال , و هو عرس خواتي مو اي احد , وش تسوي الـ800 اشتري لي و الا لعيالي و الا وش اسوي , مع هذا قالت لي امي اسكتي و يوم جيتها اشترت لي انا وبناتي احسن لبس و عيالي اشترى لهم خالهم وحطيت احسن مكياج والناس تحسبه منه .

المشكله يمد لبنات اخته و اخوه بالالووف وهم مو بحاجته هو وفلوسه بالعكس يكرهونه , ولما تجي علي يقول لي ابوك تاجر روحي خذي منه فلوس .
حسبي الله و نعم الوكيل سكت وماقلت شي , يتحكم بكل شي وهو ماله وجه من الاساس ,بعدها بكم سنه طاح بالقروض و الديون و الربا , وجلسنا على الحديده , والله مانلقى شي ناكله و لاعندنا فلوس للملابس اوحاجات طفلي الي كنت توي جايبته , اخرتها صرت اشربه حليب بوني , لان ماعندنا فلوس نشتري حليب له .
وكل هذا و انا صابره وساكته ومتحمله وماحد عرف بالحال , حتى امي صرت بالاعياد ماروح لها تسالني وش صاير اقول تعبانه و الا اقول مسافر و الا اي شي مابيها تحس بشي واذا جاتني ماعندي شي اقدمه لها لاتمر و لاقهوه ولاشي , وعرفت هي وحست من جسمي الي صرت عظم وجلد ومن عيالي الي صاروا كانهم من افريقيا من النحااااافه , حتى الصغير ..
صارت امي تعطيني فلوس امشي فيها حالي , الى ان رجع له راتبه كامل بعد سسسسسسنين ..

نسينا الطلعات و الروحات و الجيات و الوناسه , نسينا فرحة العيد و خصوصية رمضان و نكهته الخاصه ,

حتى الجيران يسالونه وش فيكم طول الوقت جالسين , طبعا ممنوع يجونا اونروح لهم بسبته بس سؤال من بعيد لبعيد
وبعد كل هذا اكتشفته انه يكلم بنات و يقابلهم , وجمعت عليه ادله وواجهته فيهم ,وانكر المرات الاولى بعدين قال بكيفي وموانتي الي تتحكمين فيني واخذت جواله وخبيته وقلت باتصل على اخوي واخوك يجون يشوفون لعبك وخيانتك وترجاني فالبدايه اني ما افضحه بعدين بدا يضربني باقوى ماعنده واي شي تجي عليه يده , ومسكته كم مره وهو يشرب خمر من يوم نقلنا المدينه و الى هاليوم .

وكم مره مسكته وهو يكلم , ووصلت فيه الجرأه انه يصعد على وحده من الجارات يوم سافر زوجها عشان ينام معها .
يحشش و يشرب خمر و يخون بكل انواع الخيانه وفوق كل هذا مريض نفسيآ ويتعالج , وصابره ومتحمله عشان عيالي اللي الحين كبروا وصاروا بسن الزواج , عمره فوق الـ50 سنه والى الحين على حاله , بناتي ماانخطبوا ولا مره منه ,و عيالي ماعندهم شخصيه بسبة اسلوبه وفضايحه .

واخرتها جاه مرض السرطان والحين منتشر فيه و رمضان الي فات يوم جاء من جلسات الكيماوي دخل علي وطلقني بالثلاث ,من دون سبب , ماقدت اطلع واترك بناتي مع واحد مجنون ومو عارف وش يتصرف ,

اهلي تغيروا علي مو مثل قبل امي عشان اختي الصغيره سحبت على كل الناس .

وانا كبرت بالعمر الحين عمري بالاربعيات , وين اروح لاهلي ؟؟

يعامل بناتي الحين اسوء معامله و انا حابسه نفسي بالغرفه وما اطلع . عقب هالصبر انحبست بغرفه بس عشان ما اتفرق انا وعيالي الللي طول هالسنين تحملت كثير عشانهم ما اقدر الحين اطلع واخليهم بكل هالسهوله وبنفس الوقت ما اقدر اجلس اشوفهم يتعذبون قدامي . كل يوم يضغط عليهم ويقول امكم ماطلقتها وهي الي مسويه بنفسها كذا . انا ماسويت باحد شي

24 ساعه يشتغلن حتى المنديل ما يقوم ياخذه ينادي وحده منهم عشان تمده له و نعاله يلبسنه والشراب و الثوب و كوي الملابس كل ربع ساعه , والله ان شعورهن شيب وهن باول العشرينات , الي يشوفهن يقول اعمارهن بالستين لايهتمن باشكالهن ولا بنفسيتهن ولاشي وما الومهم ..



يابنات ادري اني طولت عليكم بس اقسم بالله اكتب وقلبي يعتصر ما ادري وش اسوي ..
اللي عندها حل تقول لي و الله لا ادعي لها بالثلث الاخير من الليل .. وربي شاهد على كلامي .

ابي حل يخليني اطلع انا وعيالي ونسكن بشقه بعيده عنه هو وهمه من دون فضايح .. ولاتجريح من الناس


انتظر الحل ..