ياريت تدخلي يا أخت tamo باقي الأخوات ايضا للمساعدة وأخذ العبر

السلام عليكم ورحمة الله وبركاته انا ترددت وايد في كتابة موضوعي هذا لكن بعد تفكير قررت ان من الواجب ان الكل يعرف قصتي وياخذ منها العبر واللي يقدر يشور علي فارجو ان مايتردد في طرح المشورة. انا كنت فتاة هادئة ملتزمة والحمدلله ومالي مشاكل مع أي حد والكل يحلف بحياتي من طيبتي وكرمي وحسن أخلاقي انا مو جميلة جدا لكن ينقال عني جميلة وما فيني عيوب شكلية شديدة وشخصيتي كانت مثل الذهب عمري ما زعلت احد وما احب ان احد يزعل مني حتى لو كان الطرف الثاني هو الغلطان ما اقدر انام الا لما اراضي الكل ولو غلط أحد فيني ما ارد الغلط عليه أبدا .كنت متفوقة جدا وتخرجت بتقدير امتياز في تخصص صعب ونادر جدا وكنت الأولى على كليتي بمختلف تخصصاتها وكنت محط اعجاب الكل من والوالدين واخواني واهلي كلها وكل اللي شافني حتى لو ماتعامل معاي وايد شباب حاولوا التودد لي في الكلية وبعد الكلية لأنهم كانوا معجبين بتفوقي ورصانتي واخلاقي ومستواي الاجتماعي وأدبي وحبي لمساعدة الكل كملت 23 سنة بطولها وعرضها من غير ما أتعرف على شاب او ادخل في علاقة حتى لو كانت سطحية كنت محصنة نفسي تماما اني ما اسمع لأي شاب ولا أحتك بأي أحد لأني كنت أخاف الله وغير جذيه انا ما كنت افكر في الجنس الاخر نهائيا وحتى لما كنت أفكر فيهم كنت أفكر اني اتزوج شخص على قده اهو يحبني من بعيد من غير مايصارحني وابني حياتي معاه وحده وحده عمري مافكرت بواحد غني ولا ماحد عنده سلطة ابدا وبالعكس كنت دايما اخاف من الزواج مع اني تربيت في اسرة محبة لبعضها البعض وامي وابوي يحبون بعض وايد المهم بعد التخرج حسيت بفراغ كبير فكنت اقعد على الانترنت ادور مواقع وصور مناظر طبيعية وكروت وغيره المهم مع الوقت دخلت على الايرسي الشات وكان عالم جديد بالنسبة لي وكنت اكلم الناس واغلبهم بنات او على الاقل هذا اللي كان يبين منهم وكنت اكلم شباب احيانا لكن من غير مواعيد ولا ارسال بريد ولا صور ولا ارقام تلفوانت ولا أي شي خاص مجرد كلام عادي وخلاص وصادف مرة اني تحدثت منع شاب من غير جنسيتي وما ادري شلون انجذبت حقه مع ان كلامنا كان عادي واقل من العادي جدا وبعد فترة دخل معاي في طور الحب وقعد يتكلم عن نفسه وبين لي انه مسكين كل البنات يستغلونه وانه تعرف على وايد بنات وحبهم بجد لكن كانوا يخونونه او يرفضون حبه او يستهزئون فيه فحبيت صدقه في كلامه وكسر خاطري وبديت اتعلق فيه لكن ما صرحت بهذا لأني كنت خايفة الموضوع يتطور للحب وبعدين لو تقدملي اهلي راح يرفضون لاختلاف الجنسية المهم ظل يلح ويلف ويدور وحصل المحظور وحبيته من غير ما اشوف صورته ولا اكلمه بالتلفون حتى الهمم ان جاء لبلدي لأن اهله ساكنين في بلدي اصلا المهم تطور الوضع بينا وحبيته بشدة وهو عرف يمثل علي دور ا لحبيب وصدقته ومع مرور الوقت ابتدى يتملعن علي ويدوس على كرامتي ويعيب على شكلي ولوني واسلوبي واهلي وغيرها مع انه في الآول كان علطول يمدحني ويثني علي مع الوقت ابتدا يكثر من الاهانات وكانت غلطتي اني سكت وتحملت منه كل شي شين لأن حبه تمكن من كل ذرة فيني فكنت ابكي بحرقة لما يظلمني ويعاملني بقسوة ولكن بمجرد ما يكلمني عادي حتى من غير ما يعتذرلي كنت اسامحه علطول واقسم بالله باني كنت افعل له ما لا تفعله له والدته ولا اي احد في الدنيا يسويه مهما كان طيب , كنت اقف جنبه واسانده واكلمه مكالمات دولية كلفتني الغالي والرخيص وحتى بيع ذهبي واستلاف النقود مع اني كانت دايما عندي عزة نفس ما اطلب فلوس حتى من اخوتي ولا من امي لدرجة ان امي كانت تحط الفلوس غصب بجنطتي المهم كل هذا تغير بديت اطلب فلوس اكثر واتسلف من اخواني حتى اخوي الصغير خذيت منه فلوس وبعت ذهبي عشان اعرف اكلمه لأن كان يطلب مني اني اتصل فيه دايما المهم كان خلال فترة امتحاناته يطلب مني اوقف جنبه واشجعه واكلمه علطول وكانو اهله ياخذون اخباره مني وبمجرد ما يخلص امتحاناته ينقلب علي بشكل بشع للأسف كانت شخصيته واضحة جدا لكن عماني الحب وذات مرة طلب مني اخطب له وحده من اللي في كليته في بلاده مع انها رفضته من قبل وفضحته في ادارة الجامعه واشتكت عليه عشان كان يتكلم عليها مع اصحابه ويوهم اصحابه انه يحبها وفيه بينهم حب وجذيه المهم لما طلب مني جذيه وافقت على خطبتها بالتلفون وقلبي يعتصره الألم لكن قلت في نفسي انا احبه والحب مو أنانية مع اني هو اللي مثل علي دور الحب والزواج المهم ان البنت رفضت فرجع يمثل علي دور الحبيب ومن غبائي صدقت وانتظرت لحظة تخرجه لأنه في كلية تاخذ سنوات اكثر من كليتي المهم كنت اساعدع حتى في مشروع التخرج ومع هذا كان ديما ينقلب علي حاولت كذا مرة ابعد عنه لكن بمجرد ما كان يحس اني راح ابتعد يرجع يبكي ويطلب مني ابقى جانبه واحبه وكان دايما يقنعني ان اضراب شخصيته نابع من تربية معقدة واسرة غير مترابطة وكان دايما يقولي انا مومضبوط ومحتاج لعلاج نفسي فكان يكسر خاطري اكثر واحبه اكثر المهم جاء هو للاستقرار والعمل في بلدي وطبعا كان يوهم الكل انه جاء لبلدي لأنه يحبني ويبي يقعد جنبي والحقيقة انه كان يكثر الزن على ابويه عشان يجيبونه هنا علشان يخلص من حياته الصعبة في بلده وكان دايما يعايرني اني ترك بلده عشاني وكنت غبية أحس بالذنب حتى والدته قالتلي لاتخلينه يضحك عليك هو كان راح يجي بيك ومن غيرك بس هو علطول يحب يبين بدور الشهيد المسكين وكان استحالة يعيش هناك لأنه اهله ما راح يصرفون على واحد عاطل ومن الصعب يلقى شغل هناك ففي كل الأحوال راح يترك بلده الهمم كنت اظن ان لما نقرب من بعض ان الأمور راح تتحسن بينا بي ما صار هالشي بل كثرت اهاناته لي ولبلدي ولأهلي وزادت معاملته قسوة حقي . لما كان في بلده كنت اسأله ليش تعاملني جذيه كان يقولي السبب هو البعد وبعيد عن العين بعيد عن القلب ولما جه لبلدي تكررت معاملته القاسية بل اصبحت أسوأ. المهم انه كان كثير العلاقات النسائية لما كان في بلده وحتى لما جاء لهنا المهم كان كل شوي يدخل النت ويتعرف على وحدة ويتعلق فيها وتتعلق فيه لأن كان يمارس نفس الاسطوانه اللي كان يرددها حقي ولما كنت ازعل واتخانق معاه كان يقولي انا شاب وماتزوجت لما نتزوج يكون لك حق علي ومن حقك تضربيني بالحذاء وكان علطول يقولي لما تقنعين أهلك بالزواج مني تعالي واتكلمي وفي واقع الأمر اهلي كانوا رافضين كما توقعت ودخلت في حرب شديدة مع اهلي خصوصا أبي واخوتي كانوا من بعد الثقة العميا اصبحوا يشكون فيني لكثرة خروجي الغير معتاد ومزاجي اللي انقلب فجأة كنت علطول اصرخ عليهم واتخانق معاهم واخرج من غير اذنهم عشان اروح اخرج معاه واخليه يتمشى ويغير جو وضغطت عليهم بكل الصور عشان يزوجوني اياه واستمر الموضوع خمس سنوات حتى بلغت 28 سنة ووافق أهلي فجأة ووحددوا موعد للملكة فوجدته يقولي ليش ماكو خطوبة فقلتله ماعندنا خطوبة وبعدين انت تعرفني وانا اعرفك عدل فقالي عشان الواحد يجهز نفسه ويكون نفسه فقلتله وليش ما كونت نفسك كل هالسنوات وبعدين انت كنت قاعد تقولي زني على أهلك وقوليلهم اني اجنبي ايه بس احوالي المادية ممتازة تبيني الحين اقولهم يبي يكون نفسه فقالي انا امزح معاكي المهم انا توقعت انا اهلي يطلبون مهر غالي جدا عشان يعجزونه ويوروني ان العيب من عنده لقيتهم ما طلبوا شي بالعكس قالوا أي شي لأنهم كانو متوقعين انه ماعنده شي اصلا فلم قلتله هالكلام عصب وقالي لازم اعطيكي مهر يكسر عينهم وكان متفق معاي اني اخذ قرض باسمي واعطيه اياه على أساس انه يقدمه لي كمهر وبعدين نرجعه للبنك علطول بعد الزواج وبعدين فكرت فيها وقلتله حرام القرض هذا ربا ومانبي نبدي حياتنا بربا وقلتله انا عندي معاشي وحاول تاخذ من اهلك فلوس وارجعهم لك بعدين واهله كانوا رافضين يعطونه المهم انه والده عطاه وعلى الفلوس اللي عندي قدم لي المهر جدام اهلي ونفس الشي حصل بخصوص الشبكة شريتها من فلوسي ووهمت اهلي انها من عند المعرس وقبل العقد شرط أهلي مؤخر كبير فاتصل فيني وقالي بمامعناه على شنو يعني هالمؤخر فزعلت منه وكتمت في قلبي وقلتله لا تخاف لو صار شي راح أتنازلك عن كل شي احنا ماندور على الفلوس كل الموضوع ومافيه انه اهلي حاسين انك راح تبهدلني بعد الزواج وغير جذيه شافوا اشلون اتغيرت شخصيتي بشكل سيئ نتيجة معرفتي بك فكلهم توقعوا ان واحد يغير بنت مثلي جذيه ويقلب مخها ويقلبها على أهلها اكيد واحد ماله امان وراح ياخذني يلعب فيني شوية وبعدين يتركني فحطوا هالمؤخر الكبير ولو كان اهلي استغلاليين كانوا حطوا مهر كبير جدا لن فلوس المؤخر هي اللي تندفع في الحال وتصير في ايد البنت وهي الضمان اما بالنسبة للمؤخر فكون ان البنت تستلمه من الزوج او لا فهذا بعلم الغيب لأنها ممكن تتنازل عنه لطيبتها وكرم اخلاقها وممكن يساومها على الطلاق يعني في كل الأحوال المؤخر هذا ما هو مضمون المهم تم عقد الزواج وبعده بيومين رجعتله المهر اللي يخص والده اما معاشي فاستعملناه في تأثيث الشقة ولوازمها علما باني كنت شارية كل الأجهزو الكهربائية تلفزونات واجهزة مطبخ وكل شي تقريبا وبعدين رحت انا وشريت الأثات وظليت ادفع اقساطه من معاشي واهلي مايدرون عن شي حتى ما عدوا مهري ولحد الحين علبالهم ان مهري عندي مع اني بينت لهم اني صرفت معظمه على شغلات خاصة فيني لازم تدفعها الزوجة مو الزوج ولو ان بعد الزواج الرجل لازم يتكفل بكل شي وما يضر ان الزوجة تساعده لكن مو كل شي عليها تقريبا واهلي حتى ما شرطو عليه سكن معين حقي ولا خدامة ولا شي وفعلا قعدت في شقة صغيرة جدا ومن غير خدامة لمده طويلة وكنت دايما احاول اغطي عليه جدام اهلي وارفعه لفوق وبعد فترة بدت تجيلي خدامة مرة بالأسبوع وبعدين لما حملت جبنا خدامة تجيلنا كل يوم لكن مو مقيمة عندنا تجينا بس 3 ساعات ونص وتمشي وطبعا كانت هذي مأساة لي لأن كنت حامل وتعبانة وارجع من دوامي متأخرة واجي بدل ما أرتاح وانام كنت اوقف على راسها واتابع شغلها لأنها موعندي طبعا انا عارفه ان الخدم كلهم واحد مقيمة ولا غير مقيمة بس على الأقل ارجع من الدوام انام وارتاح والقى شغلات الطباخ جاهزة مو ابتدي كل شي من أول واطبخ من الألف للياء وغير جذيه اللي غير مقيمة يكون وقتها محدود وطبعا لازم انا استغل هالوقت زين لكن لو عندي علطول ولقيت ان شي معين ماسوته الصبح اخليها تسويه بالليل وجذيه المهم صبرت على جذيه لأن شقتنا صغيرة مافيها مكان للشغالة وغير جذيه الشغالة اول ما تجي البلد يبيلها فلوس وايدة مقدم للوكيل ولها وغير معاشاتها بعدين المهم ظليت جذيه وكانوا اهلي وايد يعزموني على استقبالات ولادة وزواج وكانت اروح اولا لأن كان دايما يقولي خليك معاي انا يضيق خلقي من غيرك وبعدين يقولي روحي فكنت احس بالذنب واقعد معاه وغير جذيه ما كان تتوفر عندي فلوس عشان اجيب هدايا محترمة يعني مومعقولة قبل الزواج اجيب هدايا قيمة وبعد الزواج اجيب أي شي والناس راح يفسرون هذا انه زوجي فقير وفاقرني معاه وان مستواي قل بعد ما تزوجته وهالشي فيه اهانة حقه فما كنت اروح واتحجج بأي حجة . كنت اتعامل مع اهله مثل اهلي وأعز وفي شهر عسلنا ما كان عنده فلوس حتى نقعد في فندق فقعد ينقلني من بيت اهله لبيت اخوه ورضيت ووهمت اهلي اني قاعدة طول هالمده بالفندق على ما يجي اثاثنا حتى لما وصل الأثاث قعد فترة طويلة يتردد على بيت اهله وكان يكسر خاطري وما احب اني احسسه اني باخذه من اهله واعزله عنهم فكنت اقعد عندهم معظم الوقت وننام عندهم بعد واحيانا كنت انام على الأرض تخيلوا عروس تنام على الأرض وأثاثها جديد مقطوط في شقتها وتحملت هذا كان على قلبي مثل العسل لأني أحبه حتى لما سفرني لبلده لشهر العسل كنا نمشي على قدنا لأن مافي فلوس وقعدنا في شقة أهله هناك وطبعا ماكنت ماخذه راحتي لأني مضطرة للبس الحجاب علطول والمصيبة كان كل شوي يجيني ويقولي ليش مبوزة هذا جزاي اني مسفرك اونسك فقلتله انا ما جبرتك لو قاعدين بالديرة احسن ولصارت عندنا فلوس زايدة نسافر للعمرة على راحتنا مو ضروري الا الحين اللي ماعنده فلوس ما لازم يسوي الي انت سويته المهم رجعنا البلد ويعلم الله شكثر حبيته وداريت كرامته ومشاعره كان وايد يتهاوش معاي ويغلط فيني وفي اهلي وبلدي كالعادة وكنت اسكت ويدش اهو ينام ولا على باله وانا اقعد آكل في عمري لا وكنت اركض وراه عشان اراضيه ما كنت حتى أعذبه ولا أخليه يركض وراي علشان يرضيني لا والله أبد وحتى لو صار جذيه أرضى علطول بس عشان ما اضايقه مع اني لما ازعله او يكون هو زعلان لأي سبب يذلني على مايرضى هو جذيه يحي يزعل الكل وبمجرد ضغطة زر يبي الكل يسامحه لكن هو يذل الناس عشان يسامحهم. المهم صبرت على كل شي لأني احبه وسقط الحمل الأول وبصراحة كان واقف يمي خير وقفة والغريبة بعد ان جدام اهلي كان دايما يظهر العطف والحنان الزايد عن حده حتى انا صدقته واعتبرت المشاكل اللي بينا مجرد مشاكل زوجية عادية وان اكيد هو يحبني صحيح ان كان في امور كثيرة تبين انه مايحبني لكن عمت عيني عنها وكنت دايما أسأله انت سعيد معاي فكان يقولي اكيد ما كنت احلم اتزوجك ولا كنت احلم ان وحده في دلالك وعزك ممكن تقوم فيني وتخدمني جذيه وتسويلي اللي عمري ماشفته حتى في بيت أهلي وكان دايما يقولي اني صبورة وبنت أصل واني مستحملته ودايما يسألني شلون وحده مثلك تحب واحد مثلي على قد حاله وأقل بعد وفاشل في شغله ودراسته وكذاب ومنافق وماله صاحب فكنت اقوله كافي ان قلبك طيب واكيد مع الوقت بتتغير وكان دايما يقولي لو كنتي متزوجة واحد كم بلدك كان قعدك في فيلا او دور على الأقل وخدم وحشم وفلوس فكنت اقوله اهم شي المودة والحنان والحب مو الفلوس المهم عدت أول سنة زواج ورحنا احتفلنا بعيد زواجنا في فندق حلو ووقتها كان هو عاطل وقاعد في البيت وكنت انا واقفة جنبه وما أعايره وما قلت لأهلي حتى وبعدين استلم شغل جديد وكلنا كنا ندعيله وبعد فترة حسيت انه تغير علي فجأة انتو تدرون المرة تحس اذا زوجها متغير عليها وكان بعد ما ياخذ حاجته مني يعطيني ظهره وماكانت هذي عوايده وكلمته عن سبب التغير فكان يرد علي انه نفسيته تعبانة مو أكثر المهم استمر الموضوع وكانت تجيله تلفونات وايد وكان يرتبك ويقولي هذا صاحبي ودمه ثقيل لاتردين عليه فاستغربت لأني عمري ما رديت على تلفوناته حتى أهله لما يتصلون ماكنت أرد الا لو كان نايم المهم الموضوع اتكرر وايد وفي كل مرة يزداد ارتباكه فشيت أكثر وحفظت الرقم اللي كان دايم الاتصال فيه وقررت أتصل وانصدمت لما ردت علي وحدة وحبيت اتأكد أكثر فقلت اسم وحده معاه في الشغل ولقيتها تقولي نعم انا هي فلانة فسكرت الخط في وجهها. وظليت كاتمة في قلبي وقعدت أجرر منه كلام يمكن يقر ويعترف ابدا ولا هو راضي طبعا ست الحسن اتصلت فيه وقالتله انه في احد اتصل بيها وورته الرقم اللي اتصل فيها وعرف انه رقمي ومن ساعتها ابتدى يشتمني بشتايم قذرة ما اقدر اذكرها وقالي اني ظالمته ومافيه بينه وبين البنت أي شي الا الاحترام ولما سألته ليش كنت تكذب وتقولي انها صديق ودمه ثقيل قالي عشان ماتشكين فيني وانا البنت كانت تتصل عشان تكتبلي عقد الشغل وان بتصرفي خربت كل شي وقالي اني تسببت في فضيحة له في الشغل كأن انا متبلية عليه ولما سألته اشمعته البنت جت وورتك الرقم اللي اتصل فيها ليش مارحات لأي واحد ثاني في الشغل ولا هي على راسها بطحة وفي بينك اصلا شي غير عادي عشان جذيه كلمتك انت بالذات المهم ابتدى يتعامل معاي كأني انا اللي غلطانه بحقه وكأني انا اللي متعرفة على رجل اخر غير وبالتالي هو بيعاقبني المهم ظليت ساكته وزاد اهماله حقى حتى لما عرف اني حامل مرة ثانية استمر في تعذيبه حقي تصوروا كنت طول المدة حاسة ان في شي مو مضبوط وفي شواهد واضحة ومع هذا موقادرة اتكلم لأني لو تكلمت راح يكذب وينكد علي وممكن حتى يحلف بالله كذب كان يطلب مني بطريقة غير مباشرة اني اشوف واسكت وكان يهملني بالساعات الطوال 8-9 ساعات مايتصل فيني ولا يرد على تلفوناتي ولما كنت اواجهه كان يقولي مالك كلمة علي الا لما تمسكيني بالجرم المشهود فكنت كل يوم ابكي لدرجة ان القرنية في عيني انجرحت وكل يوم انام زعلانة وكان بالليل ياخذ حاجته مني بعدين يبتعد عني كأن فيني جرب لحد ما تمكنت من كشفه وواجهته وظل ينكر بكل وقاحة وبعدين مشيت وراه بالسيارة ولقيته ماخذها يفسحها وانا مرمية في البيت ولما اتصلت فيه قالي ماعليه انا نفسيتي تعبانه وقاعد اتمشى غعلى البحر ولما رجع البيت ما كلمته وسويت نفسي ماشفت شي وثاني يوم قعدت اجرر منه كلام ومواكو فايدة لحد ما زهقت وقلتله اني شفته مع الهانم واكتشفت انه طول المده اللي كان يهملني فيها كان بيخرج معاها يفسحها من غير أي شعور بتأنيب الضمير ولما عرف انه مسكت عليه الدليل صرخ وقالي راح اتزوجها واتزوج عشرة غيرها واخليكي خدامة لها وماراح اطلقك وراح اعقلك لا متزوجة ولا مطلقة فتركت البيت ورحت عند اهله طبعا ما اقدر اروح لأهلي عشان انتوا عارفين انهم زوجوني له غصب المهم جالي عند اهله وقعد يقل أدبه علي جدامهم وبعدين لما رجعت قعد يبكي ويوقلي سامحيني الموصضوع خلاص انتهى والبنت تركتني انا اسف سامنحيني انا ظلمتك ومن هالكلام كل يوم في شهر رمضان يقولي هالكلام فصدقت وطلبت منه ان يبتعد عني لحد ما يفكر يختار منو المهم استمر في اهماله حقي وصدقت انه كان مستحي مني للي سواه فيني وبعدين اكتشفت ان مازال على علاقة معاها لأن ظل يزن عليها لحد مارجعوا لبعض وتكرر الموضوع ووصلنا لدرجة الضرب واهانات مالها اول من اخر لدرجة اني هجيت من البيت ورحت نمت في المستشفى عشان اهرب منه طبعا وةلا أثر فيه وكان كل مرة يطلب مني افتح له صفحة جديدة وارجع اكتشف ان مازال معاها لحد مازهقت ورحت لبيت اهلي واضريت اضحك عليهم واعطيهم اعذار لتواجدي عندهم المهم اني مكن ساعة ما وصت لبيت اهلي وانا أطلب منه الطلاق وكان يرفض ويقولي ما اقدر اتخلى عنك تخيلوا الوقاحة كان يقولي انا اعرف ان مافي وحده تريحني مثلك وعارف اني لو تزوجت فلانة راح تتدمر حياتي لأنها شيطانه وتعرف تاخذ حقها وظالمة ومو طيبه ويهودية ومومستعدة تتنازل ولا تضحي بشي مثلك فشرايك اتزوجها ولو ما نفع الحال معاها ارجعلك وحتى لو طلقتك لا تقولين حق أحد من اهلك وسوي روحك كأنك لسه متزوجتني لأن اهلك لو عرفوا لا يمكن يرجعونك لي شوفوا الوقاحة لأي درجة ومو بس جذيه كل ما اكلنه يقولي احبها شسوي لما شفت الوضع قاعد يتدهوررحت عند اهلي من مده طويلة وكل ما قلبي يلين اكتشف ان مازال على علاقة معاها ويجي يكذب علي ويقولي انها طلعت من حياتي وانا اتصل فيها بس هي ماترد علي شوفوا الأعذار والحجج كأن هالكلام يثبتلي انها طلعت من حياته المهم اترجيته يطلقني ويسعدني ولو لمرة في حياته ويخلصني من عذابي فقعد يماطل مرة يقولي خليني افكر ومرة عطيني فرصة ومرة يقولي انطريني اجمع المؤخر ومرة ما اقدر على بعدك واتصل مرة فيني وقالي احسن شي ننفصل ولا تحاولين تأثرين علي عشان اغير رايي فانفجرت فيه وقلتله انت من تظن نفسك انا اللي طالبة الطلاق من مده وانت اللي قاعد تتلزق فيني فقالي لو كنتي تبين تتطلقين صج كانت جت منك انتي المبادرة أول شي وكان ما قعدتي تردين على تلفوناتي وتكلميني فانهرت وقلتله انا كنت اسوي معاك الأصول حتى ما بعد تركت البيت وكنت احاول الم الموضوع ونوصل للطلاق من غير ما الأهل يتدخلون وهذا لمصلحتك وكنت احاول اشوف هل انت تستحق الفرصة الثانية اللي انت قعدت تزن علشان اعطيك اياها بس الواضح ان الأصول ماكانت تنفع وكان لازم أرفع عليك دعوى واخلي أهلي يدخلون في السالفة واخذ كل حقوقي منك فعلا لما حاولت أبعد عن الفضايح كنت غلطانة وقلتله حسبي الله ونعم الوكيل فيك مو عشاني لكن عشان البيبي اللي راح يتربى مثل اليتيم ولما قلتله جذيه قالي شفيها انتي حنونة وتقدرين تربينه فقلت له الظاهر تربيتك في اسرة كلها خلافات خلتك تظلم البيبي وتخليك يعيش في أسرة مفككة مثلك هل قادرين تتصورون حجم البلوة اللي انا فيها انا خسرت أهلي وعيشة حلوة واسرة سعيدة ومركز اجتماعي زين وفوق هذا زوج وبيت شفتوا مصيبة اكثر من جذيه؟؟؟شفتوا جحود أكثر من جذيه. آسفة طولت عليكم بس الله يخليكم أغيثوني وأرجوكم لا تنجرفون ورا الحب لأنكم ما تدرون عن نوايا اللي جدامكم ولا تبيعون أهلكم حتى لو الرجال فرش نفسه على الأرض وقالك احبك ودوسي علي في الرايحة والجية لا تصدقينه ياأختي واللي يحبك يطلبك من أهلك ولو أهلك رفضوا وقعد يوزك ويحرضك على اهلك اتركيه في الحال لأنه لو يحبك صج مايخرب علاقتك بأهلك بالعكس يقرب بينكم .