ياريت يشاركو جميع الأخوات المتزوجات وخاصة لمن لديها الخبرة

قرأت في إحدى المشاركات للأخت ومض عن التعامل مع أهل الزوج واستفد منها كثيراً الله يجزاها كل خير ولكن أنى أبغى أتكلم في هذا الموضوع بشيء من التفصيل وأتمنى مشاركة جميع الأخوات وبالذات من لديها الخبرة في التعامل مع أهل الزوج وخصوصاً خوات الزوج ولأني أعاني كثيراً من التعامل مع أهل زوجي حبيت إني استشيركم واستفيد من تجاربكم وخبراتكم وأتمنى أن أجد مشاركةعن كل المحاور الي بطرحها واجابة عن كل الاستفسارات الي بستفهم عنها ولا تبخلو علي بأقل التفاصيل المهمة في كيفية التعامل مع أهل الزوج لأني بصراحة ماعندي الخبرة الكافية في هذا الموضوع.

أولاً : بالنسبة للزيارة :
أم زوجي وزوجي يتهموني دائماً إني مقصرة معاهم وإني مااحب الاندماج والاختلاط معاهم مع إني أروح كل اسبوع مرة ومعاملتي معاهم ممتازة جداً ومع كثرة الزن من زوجي طلبت منه إنو يوديني عندهم وزاد عدد زياراتي لهم في الأسبوع من مرتين إلى ثلاث مرات بس مش كل اسبوع ولقيت نتائج سلبية لكثرة النطنطة والزيارة منها :
1- زوجي ماقام يقدر إني بعض الأحيان يكون عندي شغل في البيت أو إني بعض الأحيان أكون تعبانة أو مالي نفس أروح وكل ماشافني في وجهه يقول يالله ألبسي بوديكي عند أهلي .
2- أم زوجي قامت تستكثر علي البيت وتقولي ليش ماتسكني معانا أحسن ولكني رفضت بشدة
وتبغاني أروح معاها على قولتهم عصريات لفلانة وزعطانة وأنا بصراحة بيتوتية جداً ويغلب علي حب جلسة البيت.
هذا بغض النظر عن كثرة المشاحنات والمقارنات والتدقيق في كل كلمة وحركة نتيجة لكثرة الاحتكاك .
وبصراحة أنا لما شفت أن الموضوع راح يسيئ أكثر طلبت من زوجي إني اكتفي بيوم واحد في الاسبوع ويالله يالله وافق وبرضو يلومني ومع كذا والله إني أشوفها كثيرة لأني ماارتحت ابدا لهم ولا قدرت انسجم معهم.
فأيش رايكم هل اقلل من زيارتي لهم وكيف اقدر اقنع زوجي خصوصاً أنه ولد امه ويسمع كلامها سواء صح ولا غلط؟
ثانياً : بالنسبة للهيأتي ولبسي :
أنا بصراحة أحرص كثيراً أن لبسي يكون متغير دائماً مع أنه ما يكون جديد وزوجي يخاصمني ويطلب مني إني ألتزم بلبس واحد أو ألبس قميص لأنهم زي أهلي وأنا بصراحة أحب إن هيأتي تكون جيدة حتى عند أهلي وحتى قبل ماأتزوج ويطلب منى إني ماأحط مكياج بس أنا ماطاوعته ويتهمني دائماً بأني مااسمع كلامه.
فياترى فيها شي لما ألبس جديد وأروح عندهم ولا لما أحط مكياج ؟
ثالثاً : بالنسبة لأشيائي الخاصة :
أعاني كثيراً من خوات زوجي يحبو يشاركوني في ملابسي واكسسواراتي وشنطي وكل شي خاص فيني لدرجة أنهم توصلو للذهبي .
وياريتهم يطلبو مرة ولا مرتين لا على طول الخط وكل واحدة تتطلب شي والمشكلة مو عن نقص وحالتهم المادية ممتازه وملابسهم واكسسواراتهم من احسن الماركات بس استكثار وحب امتحان وتمحيص ومع أني إذا رحت السوق اشتري لهم لكن مافي فايدة تضل عينهم على الشي الي اشتريه ومايرتاحو إلا إذا استخدموه لدرجة أن اخته الكبيرة طلبت مني طقم من طقومات الذهب واعطيتهاولبسته فويش رايكم وانا بصراحة ماأقدر أقول لا، بس متضايقة جدا جدا من هذا الأسلوب لدرجة أنهم بعض الأحيان يطلبو مني شي جديد لسى مالبستو فويش رايكم وكيف اتعامل معاهم وكيف امنعهم أنهم يطلبو مني مرة ثانية ؟ وبصراحة بينت لزوجي إني متضايقة من هذا الأسلوب وتعالوا شوفو التهزيء والسب والشتم بشكل ماتتصوروة فهل أنا غلطانة طيب أنا حرمة متزوجة يعني لازم يكون لي خصوصيتي ولبسي الخاص فيني صح ولا لا وش الحل أرجوكم ؟
وفيه الكثير بس أنا اكتفيت بطرح هذه المحاور وياريت تجاوبوني قبل ماأرجع لأن كلها شهر بالكثير وارجع الرياض وارد مرة ثانية للمشاكل ووجع الراس .